Qeqertalimmi sanaartugassanut aningaasaliissutit 64,2 millionit koruunit ingerlatsinermut nuunneqartut 

Kommune Qeqertalimmi qinikkat kommunip ingerlatsinermut missingersuutaanik, namminneq akuerisaminnik, malititsiniarnertik ajornartorsiutigiuarsinnarpaat. Ingerlatsinermi aningaasat maannamut atorneqartut missingersuutaasunit amerlanerungaatsiarput. Tamanna nutaajunngilaq. Tassami kommunip ukiup sisamararterutaani siullermi missingersuutaani sippuineq 18,1 millionit koruuniusoq qinikkanut ilisimatitsissutaavoq.

AAMMA ATUARUK:

Kommune Qeqertalik millionilikkaanik atuivallaartoq

Qinikkat aasaq taama ilisimatinneqarnerat aningaasaqarnerup ilorraap tungaanut aallarneranik kinguneqanngilaq. Killormuanilli sippuineq annertusiartuinnarpoq. Taamaalilluni ingerlatsinermut missingersuutit maanna 56,4 millionit koruuninik qaffannissaat ingerlatsiviup qinikkanut innersuussutigaa.

Aningaasat taakkua suminngaanniit aaneqassanersut kommunimi qinikkat pingasunngornermi ataatsimiikkamik oqaluuseraat. Borgmesteri Simigaq Heilmann (D), aningaasat qanoq pissarsiarineqassanersut pillugit isummaminik saqqummiussivoq.

Taassuma aningaasat 59,2 millionit koruunit, sanaartugassanut atorneqartussaagaluartut, sanaartugassanut aningaasaateqarfimmiittut, ingerlatsinermut atorneqarlutik, sanaartugassanut atorneqarunnaarnissaat siunnersuutigaa. Suliniutit taakkua allaffissornikkut allatigullu suli aallartinneqannginnerat, tassa uninnganerat, borgmesterip erseqqissaatigaa. 

Illuatungiliuttut aningaasat amerlanerunissaat akuerseqataaffigigaat 

Illuatungiliuttut, Siumut Atassullu, oqaluuserisaq nalunaaquttap akunnerini sisamangajanni oqallisaareersoq, borgmesterip siunnersuutaanit allaanerusumik saqqummiussipput. Taakkua aningaasat sanaartugassanut atorneqartussat suli 5 millionit koruuninik ikinnerulernissaat siunnersuutigalugu, kommunip karsianut sanaartugassanit 64,2 millionit koruuninik utertitsinissaq siunnersuutigaat. 

Tamanna borgmesteriutitaqartut akueraat. Taamaalilluni sanaartugassatut pilersaarutaasut 64,2 millionit koruuninik nalillit aningaasartaarunneqarput, kommunillu ingerlatsinermi karsianut nuunneqartussanngorlutik. Borgmesterip aalajangiineq tamanna eqqissiallaatigeqaa.

- Kakkaak. Assorujussuaq nuannaarpunga, Simigaq Heilmann oqarpoq.

Sippuinerit agguataarnerat

Sermitsiaq Kommune Qeqertalimmi sanaartugassat suut 64,2 millionit koruuninik nalillit aningaasartaarunneqarnersut pillugit Kommune Qeqertalimmut attaveqarpoq. Allaaserisap suliarineqarnerani kommunimit akisoqanngilaq.

AAMMA ATUARUK:

Kommune Qeqertalik missingersuutiminik suli sippuinerulertoq

Missingersuutinik sippuineq 56,4 millionit koruunimiippoq. Taakkua ataatsimiititalianut sisamanut agguataaraanni assigiinngitsunik aningaasartaqarput. Ataatsimiititaliaq Inua 8 millionit koruuningajannik, Inuit, 17,5 millionit koruuningajannik, Timi Tarni 14,3 millionit koruuningajannik Inoqarfillu 17 millioningajalluinnarnik missingersuutiminnik maannamut sippuisimasut qinikkat ataatsimiissutaanni allassimavoq.

Frantz Lundblad (S), kommunalbestyrelsimi illuatungiliuttunut ilaavoq. Kommunillu maanna inissisimanera kommunip oqaluttuarisaanerani aatsaat taama ilungersunartigisoq, suliaq pillugu oqaaseqarnermini naliliivoq.

- Kommunitta oqaluttuarisaanersani killiffimmik aatsaat taama erloqinartigisumik nalaataqarpugut, aningaasarpassuarnik sippuinissaq naatsorsuutigineqarpoq, Frantz Lundblad oqarpoq.