Kommune Qeqertalik missingersuutiminik suli sippuinerulertoq   

Kommune Qeqertalimmi qinikkat ukioq mannamut missingersuutiminnik, siorna akuerisaminnik, malinninniarnertik suli ajornartorsiutigivaat. Tamanna qinikkat sisamanngornermi aggustip qulingani ataatsimiinneranni oqallisaavoq.

Allattoqarfiup qinikkanut allagai naapertorlugit kommuni ukioq manna ukiup affaani siullermi missingersuutiminit 28,2 millionit koruuninik atuineruvoq. Borgmesterip sippuineq ataatsimiinnerminni ilaatigut ima oqaaseqarfiaa:

AAMMA ATUARUK:

Kommune Qeqertalik millionilikkaanik atuivallaartoq

- Tamanna pingaartumik 2026-mut missingersuusiornermi ataatsimut isigalugu missingersuutit amingartumik inissinneqarsimanerannik pissuteqarpoq.

- Aningaasanik atuineruneq ilaatigut akissarsianut tunngassuteqarpoq. Sulinngittariaqartarnerit aningaasarsianik annaasaqaataanngitsut saniatigut paarlatsinik atuiffiusariaqartut kommunitta aningaasaqarneranut kalluaapput, Simigaq Heilmann (D) oqarpoq.

Sippuinerit ataatsimiititaliani aalajangersimasuni ima agguataaqqapput: Ataatsimiititaliaq Inuit 9,6 millionit koruunit. Timi Tarni 8.4 milliionit koruunit aamma Inoqarfik 9,6 millionit koruunit.

Kommunip aningaasaatiminik sippuinera Inuit Ataqatigiinneersup, Niels Kristensenip taaseqataaffiginngilaa. Suleqatigiit borgmesteriutitaqartut tassa Demokraatit, Inuit Ataqatigiit Naleraq aamma illuatungiliuttut Siumut Atassullu oqaluuserisamik akuersinngillat. 

Borgmesteri: Akisussaasuuvunga

Kommunimi akisussaanerpaaq, borgmesteri, Simigaq Heilmann, akisussaaffigisami taama inerneqarnera pillugu akuersinani aamma taasivoq. Taassuma taama ingerlaannartoqassappat ukiup naanissaanut amigartoorneruneq perataannaasoq ilaatigut aarleqqutigaa.

- Naatsorsuutit akuerineqarsinnaanngillat ilisimallugu ukiup naanissaanut 56 millionit koruuninik amigartooruteqartussaalluta. Taamaammat kommunalbestyrelsimit piumasaraarput aningaasanik aqutsineq ingerlatsinermi maannamit sukannerluinnartumik ingerlanneqartariaqartoq, borgmesteri oqarpoq.

AAMMA ATUARUK:

Qeqertalimmi borgmesteri: Akileraarut qaffaqqinneqariaannaavoq

Aningaasat ingerlatsinermi sukannersumik ingerlanneqassasut, taassuma ilaatigut piumasaraa. Suleqatigiit borgmesteriutitaqartut sippuinermik akuersinatillu tusaatissatut tigusinnginnerat, Siumumeersup Frantz Lundbladip apeqquserpaa. 

- Siuttut akisussaaffitsik akuerinngilaat. Borgmesterip akisussaaffia annerpaaq tassaavoq qulakkiissallugu missingersuutinik sippuisoqannginnissaa. Taava qanoq paasisariaqarpa partiit tamarmik, aamma siuttut, aningaasatigut killiffik akuerinngippassuk? Taava kiap akisussaaffigivaa una taamannak sippuineq? Akisussaasoq kinaasoq paasisariaqarparput siuttut akisussaaffigiumanngippassuk, taanna oqarpoq.

Taassuma oqaatsini naagaalu borgmesteri akisussaasuunerminik oqallinnermi siullermeerluni nassuerutiginnippoq: 

- Uangaavoq akisussaanerpaaq, qanorluunniit isornartorsiortigigaluarukku, Simigaq Heilmann oqarpoq.

Siumut: Atorfilittat nalornissapput

Borgmesterip aaqqiissutissatut siunnersuuteqarnermini taasaa tassaavoq ingerlatsinermi sukannerluinnartumik, tassa allaffissornikkut atorfilittat aningaasanik aqutsissasut. Tamannali qanorpiaq paasineqassanersoq Siumumeersup paasiuminaatsippaa.

- Atorfilittat aningaasanik sukannersumik ingerlatsinissaannik piumaffigiinnarneqarsinnaanngillat. Sukannersumik ingerlatsineq qanoq isikkulik takorloorneqarpa? Atorfilittaalluni aamma paaserusunnassooq qanoq piumasaqarfigineqarnerluni, maannakkummi qulequttamik tunineqaannarput.

- 28 millioninik sippuinermi atorfilittat suliakkerneqarnerat assut tupigaara. Sumi qanorlu sipaartoqassanersoq uagut qinikkat suliassarigaluarparput, Frantz Lundblad oqarpoq.

Taama oqartoqareersoq borgmesteri paasissutissamik allamik aamma saqqummiusseqqippoq. Ataatsimiititaliani qinikkat sipaarniutinik aamma suliaqassasut, borgmesterip erseqqissaatigaa.

Sippuinerulerneq

Kommune Qeqertalik ukioq manna ukiup sisamararterutaani siullermi 18 millioninik sippuivoq. Maanna sippuineq 10 millioninik ilalluni, 28 millionit koruuninngorpoq.

Missingersuutit aaqqinneqarnissaannik suliaqartoqassasoq kommunalbestyrelsi juunip qiteqqutilernerani ataatsimiikkami aalajangerpoq. Tamannali allaffissornikkut naammassineqarsimanngimmat borgmesterimit sakkortuumik uparuarneqarpoq.

- Allaffissornikkut naammassineqanngilaq. Iliuuseqarfigineqarnissaa piumasaraarput, Simigaq Heilmann oqarpoq.