Qiteraq Eugeniusip aningaasannannissani pingaartinnerusimavaa — maannali timmiarniarnissaq kiffaanngissuseqarnerlu pingaartitarilerlugit

Bang!

Qiteraq Eugeniusip timmiarsiutitoqqaminik timmiarsiut-Stevens-imik miteq immap qulaatigut meterip missaanik qutsissuseqarluni timmisoq aallaariarpaa.

AAMMA ATUARUK

Kulturini marlunni ilivitsuuneq

Amerlasuut miteq qanilluinnarlugu saneqqussimagunarpaat, mitermi nakkangajakkaluariarluni timminini aaqqeriarlugu ingerlaqqipallappoq.

- Timmiapalaat!

Motoorini sakkortusivaa, nalunaaquttallu akunneranut 30 knob-it missaannik sukkassuseqarluni siumut aallarmat, motoorip sarpiisa umiatsiap tunuatungaa qalaneqalersippaa.

- Timmiaq taanna ullumikkut iluatsitsivoq, Qiteraq Eugenius nipaatsumik oqarpoq. 

Naak Qiteraq Eugenius aallaaniartuaannarsimagaluarluni, ulluinnarni inuunera ukiut pingasut sisamalluunniit matuma siornatigut inuuneranit ullumikkut allaanerulluinnarpoq.

Taamanimi ullui inuit 30-t sinnerlugit ukiullit ulluinnarsiutigisartagaasa assinganik ulapaarfiusaramik: sulisarami.

- Makikkaangama oqarasuaat sianeqattaarluni aallartikkajuttarpoq. Nalunaaqutaq qulingiluanit tallimanut – minnerpaamik – allaffimmiittarpunga. Tamatumalu kingorna angerlartarlunga.

Qiteraq Eugenius Nuummi illunik tuniniaasartutut taamanikkut sulivoq.

- Ullut ilaanni unnukkut arfineq-pingasut tungaanut sianeqattaartoqartarami. Taamanikkut Nuummi inissarsiortoqartorujussuugami, oqaluttuarpoq.

Kiisami sulinngiffeqaleraangami ikinngutini ilagisarpai pinialuttarluniluunniit. Tamakkununngali piffissaa killeqartaqaaq.

- Piffissaqarfigisinnaasakka killeqartaqaat, oqarpoq.

Taamatulli inuuniarluni aalajangersimavoq. Taamatullu ilinniagaqarluni. Aningaasarsiorluarnissarmi pisariaqarmat. Pissutsimmi taama inissisimapput.

- Ullumikkut kingumut qiviaraangama taamanikkut qanoq kiffaanngissuseqartigisimanerlunga naluara. Immaqa angalanissamut akissaqartarpunga, kisiannili tamanna qatsuppara, ullumikkut tamakku pingaaruteqanngillat, Qiteraq Eugenius oqarpoq.

Seqinnarissuup ataani aquuteralaap aquutaata eqqaaniippoq, aquutaa assami illua’tungaanik tigummiarlugu, assammilu aappaanik timmiarsiutini tigumiarlugu. Taanna paassarsunnippoq.

Umiatsiap qeqertat aputeqarluartut Nuup kujataatungaaniittut sanioqqukkiartuaarpai. Anori nillertoq qullikuulersitsivoq, ulussanilu titarnertut ittunik pilersitsilluni. Tamaaniilluni allaffimmi sulineq, illunik tuniniaasarneq aningaasaqarnerlu Ruslandimi illoqarfittut ungasitsigisumiittutut ipput.

Umiatsiaq talerpimmut sangoriasaarpoq.

Timmissat ataatsimoortut qangattakaalersimapput, Qiteraq Eugeniusillu toqqaannartumik sanguffigai. Miterniarneq aatsaat aallartilerpoq.

90-ikkunni meeraasimasoq

Qiteraq (Niels Olsen) Eugenius oktobarip 31-anni 1990-imi inunngorpoq – angajuminit ukiunik sisamanik nukarliulluni aamma najaminit ukiunik sisamanik angajulliulluni.

Angajoqqaavi sulisartorujussuupput, meeqqatillu amerlanertigut kingulerussimasut meeqqerivimmut aasaraat eqqaamavaa.

Angajoqqaami suliffiat angerlarsimaffimmini ulapputigaa, taamaattumillu oqaluuserineqanngitsoorusunngilaq.

Tamannali artorsaatiginngilaa. Meeqqerivik atuarfillu nuannareqai, angajoqqaavisalu sulisarnerat angerlarsimaffianni initunani annerusumillu oqaluuserineqartarani.

Nuummili 1990-ikkunni meeraanermini misigisani nuannerluinnartutut eqqaamavai. Taamani oqarasuaatinik angallattagaqanngilaq, iPadeqarani internetikkullu kiffartuussiveqarani, illoqarfiillu pingaarnersaanni sanaartornerit alliliinerillu suli aallartilluarneqanngitsut.

Qiteraq Eugenius ilaqutaalu Nuussuarmi Kakillarnani (Nuummi illoqarfiup immikkoortuisa ilaani, aaqq.) — immamut asimullu qanittumi — najugaqartuaannarsimapput.

- Meeraalluni suut tamangajaasa nammineq periarfissaralugit misinnartarpoq. Kangillinnguit Atuarfiata silataani qulliit nalunaaqutaq qulinut qaminneqaraangata angerlartariaqartaratta killiliiffigineqartarpugut, allatigulli kiffaanngissuseqartarluta, oqaluttuarpoq.

Qiteraq Eugenius atuanngiffimmini arsaannermik alorarnermilluunniit sammisaqartorujussuusarpoq. Ilaannikkullu aamma aallaaniartarluni. Akkaata aalisarnermik ilinniartippaa, angutaatalu aallaaniarnermik ilinniartillugu.

- Meeraallunga suut tamangajaasa ataatannit ilikkarpakka, oqaluttuarpoq.

Qiteraq Eugeniusip atuarneq pikkoriffigaa. Karakterigissaarnissani suliassamilu pitsaasumik suliarinissaat nuannarisarai, unamminertupajaaq isigisaramigit.

Naluara suna patsisaanersoq. Inuppassuit angusaqarluarniartanngillat, uangali taamaaliortuaannarpunga, oqarpoq.

- Suut tamangajaasa unammissutiginiartarikka isumaqarpunga.

Suliffissatut siullermik pilerigisaa tassaavoq eqqaavilerisunngornissaq. Meeraallunimi isumaqarsimavoq eqqaavilerisut pingasunngornikkuinnaq sulisartut.

- Paasilerparali taamaanngilluinnartut.

Jakkit qarlittariit aamma nujarissartarneq

Qiteraq Eugeniusip 2011-mi festertillutik ikinngutini Danmarkimit tikeraartoq illunik tuniniaasartutut qanoq akissarsiaqarnersoq aperaa.

- Kisitsisinik taasaqarmat eqqarsarpunga, kakkaak. Taamaalillunga pileritsatsippaanga, taama eqqaamasalersaarpoq.

Qiteraq Eugenius taamanikkut Nuummi Videocenterimi tuniniaasuuvoq, tassanilu dvd-nik, cd-nik, mamakujunnik sodavandinillu tuniniaasarluni. Tamatuma kingorna illunik tuniniaasarnermut sooq sangunerluni naluaa.

- Imaanngikkaluarpoq illunik nalilersuinermik soqutigisaqarluinnartuugama. Tuniniaanermut tunngassuteqarneruvoq. Illulli arlaatigut tuniniagassaqqilluartuupput — tunineqarsinnaasut annerpaartaraat, oqarpoq.

- Aammali nalunngilara aningaasarpassuarnik aningaasarsiffiusinnaasoq. Aningaasallu taamanikkut malersugarilluarakkit. Taamanikkut aningaasat uannut aamma pingaaruteqaramik, oqarpoq.

Qiteraq Eugenius Danmarkimi Copenhagen Business Schoolimi aningaasaqarnermut tunngasunik ilinnialerniarluni 2015-imi aalajangerpoq.

- Inuit qarlittariinnik atisalersortaramik nujarissartarlutillu, uangali nutsakka tikkortittarpakka atisanillu nerutuunik angisoorsuarnik aamma seeqqunnut killittunik bluseqartarlunga, oqaluttuarpoq.

- Piffissap ilaani naleqqutinngitsutut misigivunga, taava nutsakka killortippakka nujarissartalerlungalu.

Ilinniartuunermini inuit namminermisut soqutigisallit, tassa illunik tuniniaasartunngornissaminnik soqutiginnittut naapittarpai. Taamaalilluni ilinniarnini sivitsoriartortillugu takorluugai anneruleraluttuinnarlutik.

Ilinniarnerminit diplomeqalerami 2017-imilu aningaasaqarnermut tunngasunik ilinniagaqarsimasutut taasinnaalerami, suliffeqarfimmit Nuummi illunik tuniniaasartutut ilinniartunngornissaminik neqeroorfigineqarpoq, Danmarkimilu ilinniaqqinnini nangillugu.

Neqeroorutigineqartumut akuersivoq, illoqarfimminut uterpoq ukiullu marluk Nuummit Danmarkimut uteqattaareerluni ingerlaqqissinnaajunnaarluni.

Illunik tuniniaasartutut sulinermini umiatsiartaarnissaminik — aamma nammineq najugassaminik inissiamik pisinissamut — akissaqalerpoq.

- Pisoorsuanngunngilanga, aningaasarsiorluarlungali, oqarpoq. Aningaasanik amigaateqanngilanga, oqarpoq.

Qiteraq Eugeniusip allaffimmini sulinngikkaangami, aallaqqaammut ikinngutini ilagilluartaraluarpai, arriitsumilli sulisarnini nukimmik atuiffigineruleraluttuinnarlugu.

- Ikinngutinnik peqateqarnissannut nukissaqartarnera piffissap ingerlanerani minneruleraluttuinnarami, oqaluttuarpoq.

Umiatsiamilli angalarusussuseqartuarpoq – Qiteraq Eugenius imaani kangerlummilu angalaartilluni piffissami sivikitsumi suliffimmini tatineqarnerminit aniguisinnaasarpoq. Ilaannikkuinnaq.

- Pinngortitami nukissannik katersisinnaavutit – aamma ilungersoraluaraangavilluunniit, oqarpoq.

- Oqarasuaatigali attaveqaqqileraangat sajukulaaqattaarluni aallartittarpoq.

Qiteraq Eugeniusip sianertut ilaannikkut akineq ajorpai, suliffimmili pingaarutilimmik pisoqarsimaneranik eqqarsaat peerluinnaruminaalluni.

- Ilaannikkut sulinissara suli eqqarsaatigalugu innartarpunga, iteraangamalu sulinissara eqqarsaatigiuartarlugu.

Piffissap ingerlanerani ikinngutiminik ilaqartarnini piffissaqarfigiunnaarpaa. Peqqiilliortalerpoq, niaqorloqqajaasalerlunilu naarluttalerami.

- Qinngakkut aallunga sakissakkullu anniarlunga itertalerama napparsimakulallungalu, taama eqqaamasalersaarpoq.

Aallaqqaammut tamanna isiginngitsuusaaraluarpaa, 2022-mili qinngamigut aalluni sakissamigullu anniarluni iterami nakorsiarpoq.

Uippakajaarputit, oqarfigineqarpoq.

Qiteraq Eugenius napparsimalluni sulinngiffeqalerpoq. Aallaqqaammut piffissap affaani sulisarpoq, kigaatsumillu sulisarnini sivitsoriartortissallugu. Tamakkiisumilli isiginnissinnaanera killeqaqaluni.

- Piffissap ilaani naartorineqartutut pequliallunga innangaannarusuttarpunga. Makinnissannullu nukissaqartarnanga. Suliartornissannut ernumasalerlunga.

Qiteraq Eugenius arlaleriarluni napparsimalluni sulinngiffeqartariaqartarpoq. Peqqinnerulinngilaq ajornerulernanilu.

- Sivisuumik allanngortoqanngilaq, oqaluttuarpoq.

Soraarsitaallunilu iperagaaneq

- Aamma unioqqippaa.

- Naamik!

Immameeqqilerneranni mitit arfineq-pingasut missaat miterlu qingalik ataaseq umiatsiamit ungasilliartuinnarput. Timmiarsiut pisoqaq uumisaarivoq, Qiteraq Eugeniusillu timmiarsiutini nutaanerusumik taarserpaa.

- Pokémonimi qanormaa oqartarpat: ‘Tamakkerlugit pisarisinnaanngilatit’ imaluunniit taamatupajaaq, oqarpoq illarlunilu.

Umiatsiaq arriitsumik ingerlavoq. Motori qatimaalaarpoq. Qiteraq Eugeniusip qinngutimigut timmiarpassuit takusani tikkuarlugit.

Serfaq, immami taartumi takuneqarsinnaarpiartanngilaq, appa serfamit qaqornerusoq – aamma alleq, piniassallugit nuannarinerpaasaasa ilagaat.

- Alleq takisuunik paperoqarpoq. Kusanarluinnartumik. Aamma isigaat tigerisut titarniusaqarlutik. Tungujortut. Aappaluttumillu qaamasumik siggoqarluni. Kusanaqalutik timmisarput, oqaluttuarpoq.

Qiteraq Eugenius 2022 naalersoq suliartorami allakkat soraarsitaanerminut tunngasut nerrivimminiittut naammattoorpai.

- Tamanna tupaallaatigeqaara. Eqqarsaaterpassuillu niaqqunni kaavilerlutik, oqaluttuarpoq.

Qiteraq Eugeniusip qarasaasiani qamippaa — inissiaq najukkani tunivaa, angajoqqaaminullu meeraanermi angerlarsimaffimminut nuulluni, qimmeq Kalle pisiaraa sulinngiffeqalerlunilu.

- Inissiap tunineranit iluanaarutikka inuussutigaakka qimmeralu ilagalugu Nuup ilaquttamalu illuaraata Kapisilinniittup akornanni uteqattaartarlunga. Annerusumik tamanna inuuneralugu, oqaluttuarpoq.

Ukiualuit qaangiummata Instagramimi quppernermini Ilisimatusarfimmi ilinniakkamik nutaarluinnarmik SILA-mik taaguutilimmik ussassaarummik takusaqarpoq.

AAMMA ATUARUK

Kalaallit nerisassaataat katsorsaatitut

- Taanna uumassusilerinermik bacheloritut ilinniarneruvoq tassaallunilu Kalaallit kulturiat, pinngortitaq misilittagaallu aallaavigalugit ilinniartut siunissami ilisimatusartunngornissaannut pinngortitamillu ilisimasaqalernissaannut piareersaatigineqartoq.

- Ilinniartitsissutigineqartussaq atuaqqissaarpara, pilersaarut atuarpara eqqarsarlungalu: ‘Soqutiginangaarami!

- Qiteraq Eugenius 34-nik ukiulik taamaalilluni maanna aalajangertussanngorpoq: Aningaasaqarnermut tunngasut eqqarsaatigalugit inuuneq siornatigutut ingerlateqqissavaa, imaluunniit allaanerulluinnartumik aallartissanerluni? Kingulleq toqqarpaa.

Siorna februaarip pingajuanni uumassusilerinermik Ilinniarfimmi nutaami ilinniartut aqqaneq-marluk ilagalugit ilinniarfimmut iserpoq.

- Peqqissimissutiginngisaannarparalu.

- Nuup kujataani qeqertat akornannut uterutta, Qiteraq Eugeniusip tamaani miteq kiserliortoq takugamiuk seqinnersiutini niaqqumi qaavanut inisseriarlugit isigiinnavillugu eqqissisimalluni aallaasini tiguaa.

- Timmissap niaqua immap qaavatigut malinnit taartunit ersiaqqalaarpoq. Taava tassanngaannaq timmilluni immap qulaatigut ingerlalerpoq.

- Qiteraq Eugeniusip timmiaq aallaamminik malinnaaffigaa. Igippoq.

Kiffaanngissuseqarneq pingaarnerpaavoq

- Toqusimavoq, umiatsiaaraq qanillimmat Qiteraq Eugenius oqarpoq.

Timmiaq puttavoq. Umiatsiaaraq sinaatigut sikulluni qungasiatigut tiguaa.

Maliit umiatsiamut attuussaannerat aalatitsivoq. Miteq ameerpaa, sakiaalu pilallugu. Assai ingerlaannaq aaginnanngorlutillu meqquinnanngorput.

Qiteraq Eugeniusip uumassusililerinermik ilinnialernermi kingorna ulluinnarni inuunini allanngorluinnartutut isigaa.

- Sulinngiffeqarnissaq pingaartinnerpaavara. Sunngiffimmi sammisartakkat pingaartingaarpakka, siornatigut illunik tuniniaasartuuninniit pingaartinnerungaarlugit.

Ilinniarfimminiinngikkaangami Pinngortitaleriffimmiluunniit ilinniartutut sulinngikkaangami imaani angalaartarpoq.

- Silaqqitsillugu isersimaannarnissara ajornakusoortittarpara, aninissaralu takorluuginnavittarlugu, oqarpoq.

Silamiitsillunilu aallaasaartarpoq. Imaluunniit nammineq oqarneratut toqoraasarpoq.

Pisaminik ilaquttani imminullumi pilersuisuuvoq. Ukiup qanoq ilinera apeqqutaalluni piniagassat assigiinngitsut piniartarpai - maanna imaani timmissat piniagarai. Nipisanniarniarfissanngornissaa tungaanut.

- Ukioq kaajallallugu piniarsinnaanera pissutigalugu maani najugaqarnera nuannaraara, oqarpoq.

Qiteraq Eugeniusimut aningaasat maanna isumaqanngingajapput. Biilini, angallatini qimminilu akissaqarfigigunigit naammagaa.

- Ajoraanni aningaasat isumaqanngillat, oqarpoq.

Qiteraq Eugeniusip uumassusililerinermi bacheloritut 2028-mi imminut taasinnaalissaaq, ilinniakkanilu atorlugu Kalaallit Nunaat pinngortitarlu pillugu nunarsuarmut paasissutisseerusuppoq.

Ilinnikkap SILA-p tunngavia assigalugu ilisimasani namminerlu piniartuunini atassuserlugit, aalisartut piniartut ilisimatusarnerullu silarsuaanut attaviliisinnaanissani aamma neriuutigaa.

- Illuatungeriit imminnut kamaanneranniit uumassusililerisuunerup piniartuunerullu akornanni inississilluni paasissutissiisinnaaneq pitsaanerusumik oqaloqatigiissinnaanermik pilersitsissaaq, oqarpoq.

- Eqqortutut misinnarpoq.