Qaanaami immiaaqqat
nungussimasut, sulili viinninik pisiassaqartoq KNI A/S uppernarsaavoq.
- Aap, Qaanaami
immiaaqqat nungupput. Paasivara pisiniarfimmi suli
viinneqartoq, Juliane
Henningsen Heilmann KNI A/S-mi attaveqaqatigiinnermut pisortaq Sermitsiamut allappoq.
Qaanaami immiaaqqat
nungussimasut, sulili viinninik pisiassaqartoq KNI A/S uppernarsaavoq.
- Aap, Qaanaami
immiaaqqat nungupput. Paasivara pisiniarfimmi suli
viinneqartoq, Juliane
Henningsen Heilmann KNI A/S-mi attaveqaqatigiinnermut pisortaq Sermitsiamut allappoq.
Qaanaamut immiaaqqanik timmisartukkut
tikisitsisoqarsinnaanersoq misissorneqarpoq.
- Immiaaqqanik timmisartukkut
tikisitsinissaq pillugu misissuivugut, taamaattorli inuussutissat allallu
pingaarutillit salliutinneqarmata nalunaarutigissavara, Juliane H. Heilmann allappoq,
nangillunilu:
Qaanaami pinerluttulerinermi inatsimmik unioqqutitsinerit
Qaanaami Pituffimmilu pinerluttulerinermi inatsit tunngavigalugu politiinut nalunaarutiginninnerit ukiuni kingullerni tallimani:
2021: 98-it
2022: 113-it
2023: 48-rut
2024: 55-it
2025: 51-it
Najoqqutaq: Kalaallit Nunaanni Politiit ukioq 2025-mut nalunaarutaat
- Timmisartup inissaqassusaa
apeqqutaalluni tikittuullattaarput, soorlu yoghurtit, qallersuutissat ningittakkallu tikittoorutigisimavaat, Juliane
Henningsen Heilmann allappoq.
Qaanaap Pilersuisuanut umiarsuakkut immiaaqqat ukioq kingulleq tikisinneqarsimasut pallet-it 58-iusimasut ilisimatitsissutigineqarpoq.
Juliane Henningsen Heilmannip Pilersuisumi ukiumut
naammattunik nioqqutissaqartarnissaa sulissutigineqartoq aamma oqaatigaa.
- Maanna
siunissami iliuusissat pilersaarusiorneqarput, nioqqutissanillu naammattunik
ukiumut piniarneqartussanik suliaqartoqarpoq, Juliane Henningsen Heilmann allappoq.
Umiarsuaq pajuttaat Malik Arctica Qaanaamut pajulluni juulip aappaani ukiormanna siullerpaamik tikissasoq, Royal Arctic Linep nittartagaani takuneqarsinnaavoq.
Qaanaami politiit suliaannut sunniuteqartoq
Qaanaap Pilersuisuani immiaaqqanik pisiassaarunnera imigassartortoqarsimatillugu sulianik ikilisitsisoq, Qaanaami politiit maluginiarpaat. Allanillu suliaqarnissamut ukkassinerunissamut tamanna periarfissiisoq, politiit ilisimatitsipput.
- Maluginiarparput immiaaqqat nungunnerisa kingunerisaanik suliassat ikileriarujussuarnerat, Julie Elmelund, Kalaallit Nunaanni Politiit attaveqaqatigiinnermut suliaqartoq allappoq.
Qaanaaq illoqarfiusoq eqqissisimasoq politiit aamma oqaatigaat, piffissalli ilaani aamma politiinut ulapaarfiusinnaalluni.
- Qaanaami imigassartorsimanerup kingunerisaanik sapaatip akunnerata naanerani angerlarsimaffimmi eqqissiviilliortitsinerit kinguaassiutitigullu pinerlunnerit amerlasarput, Julie Elmelund allappoq.
