GREENLAND SCIENCE WEEK
Sapaatip akunnera ilisimatusarnerup aqqani
Ilulissat, Sarfannguit, Kangerlussuaq aamma Nuuk ullumi tallimanngornermiit aallartittumik sapaatip akunnera ataaseq ilisimatusarnerup aqqani assigiinngitsorpassuarnik sammisaqartitsisoqassaaq. Tassami Greenland Science Week aallartippoq - innuttaasullu qaaqqusaapput, aaqqissuisut ilisimatitsipput.
Ilisimatusartut Kalaallit Nunaanneersut saniatigut sumiiffinni assigiinngitsuni aaqqissuussinerpassuarni ilisimatusartut nunanit allaneersut aamma peqataassapput, ilisimatusarnerup sapaatip akunneranut "Greenland Science Week"-imut atatillugu ingerlanneqartussanut.
Asseq toqqorsivimmit: Leiff Josefsen
Innuttaasut ilisimatusartullu akornanni oqaloqatigiinneq ingerlavoq nunatsinni sumiiffinni assigiinngitsuni.
Tassami ukioq manna Greenland Science Week aallartereerpoq ingerlanneqassallunilu novembarip 14-iat tungaanut.
Ilulissat, Sarfannguit, Kangerlussuaq, Sisimiut aamma Nuuk, tassaapput ullumikkut aaqqissuussinernut assigiinngitsorpassuarnut qaaqqusisut.
Allaaserisami matumani sammisat Ilulissani pisussat qimerluulaarpagut. Ilulissanimi sammisat pissanganartorpassuit ingerlanneqarput, taakkunanilu innuttaasut tikilluaqqusaapput.
Dronet pillugit workshop Ilulissani ingerlavoq, taanna tallimanngormat ullaakkut aallartinneqarpoq. Kingusinnerusukkullu ualip ingerlanerani innuttaasut marluk, tassa Bernhardt Olsen, sisorartartoq, aamma Jørgen Kristensen, qimussertartoq, DMI-meersoq Martin Olesen peqatigalugu saqqummiiutigalutik oqaloqatigiissapput, nunap immikkoortuani silap pissusaata allanngoriartornera oqaluuseralugu.
Silap pissusaa aamma takornariaqarneq oqaluuserisani qaffasinnerpaamiipput
Arfininngornermi silap pissusaa Ilulissani suli oqaluuserineqassaaq, tassani piniartoq Niels Davidsen aamma borgmesteriusimasoq, Palle Jerimiassen, ilisimatuut marluk, Sascha Schiøtt Pinngortitaleriffimmeersoq aamma Ole Bøssing Christensen DMI-meersoq peqatigalugit Ilulissat kangerluata sermersua aamma Qeqertarsuup tunuani silap pissusaata allanngoriartornerata malitsigisai sammineqassapput.
Sammisassat arlallit qaqilerneqassapput, taakkulu tamarmik silap pissusaata allanngorneranut tunngassuteqassapput, tassani ilaatigut tikinneqassallutik silap allanngornerata attaveqaasersuutinut, aalisarnermut, takornariaqarnermut suliffissuaqarnermullu sunniutai.
Kingusinnerusukkut arfininngornermi "akisussaassuseqartumik takornariaqarneq" oqaluuserisaniippoq. Tassani takornariaqarnermik ingerlatsisoq Konrad Seblon, qimussernermik ingerlatsisoq Jørgen Kristensen aamma Ilulissani Kangiata Illorsuata pisortaa, Karl Aakattak Sandgreen peqataassapput, taakkulu oqaluuserissavaat qanoq iliorluni piujuartitsisumik takornariaqarneq ineriartortinneqarsinnaanersoq, takornariaqarneq piffissaq takornariaqarnerpaaffiup avataatigut takornariartitsinermik ineriartortitsineq, takornariariaatsit assigiinngitsut, takornariaqarneq aamma ilisimatusarneq peqatigiisinneqarnerat kiisalu aamma qanoq iliorluni UNESCO-p nunarsuarmi kingornussassatut eriagisassatut toqqagaa illersorneqarsinnaanersoq.
Qilassuup ataani oqaluttualerineq
Arfininngornerup unnukkuani Ilulissani aamma qilassuup ataani oqaluttuaqattaannerit ingerlanneqassapput, taannalu Kangiata Illorsuata silataani ingerlanneqassaaq - peqataarusuttunut kaammattuutigineqarpoq oqortunik atisalersorsimanissaq, aaqqissuusineq silami pissammat, taannalu aallartissaaq arfininngorneq nal. 20:00 Kangiata illorsuata silataani.
Sapaammi Illumi suleqatigiilluni sammisaqartoqassaaq (workshop). Siulleq tassaavoq silaannaap allanngoriartorneranut tunngasunik nangitsineq, tassani aamma siunissamut isiginnilluni allannguutit sammineqassapput, aammalu ilisimatusartut pingasut DMI-meersut silap Issittumi allanngoriartorneranut oqaluttuarisaaneq sammisassavaat, Kalaallit Nunaanni avatangiisit qanoq allanngoriartorsinnaanerat pillugu pisinnaajumaartussat marluk saqqummiunneqassapput kiisalu silap pissusaanut, sermersuarmut imermullu aakkiartorneranut takussutissat sammineqassallutik.
Sapaat ullup qeqqata siorna dronet pillugit suleqatigiilluni sammisaqartoqassaaq, taanna tallimanngornermiit nangitsinerussaaq nal. 15:00 missaani aallartissalluni.
Tamatuma kingorna Polar Geo Engineering pillugu suleqatigiilluni sammisaqartoqassaaq, taanna qulequtaq ilisimatuut akornanni oqallisaangaatsiartarpoq. Pineqartormi nassuiarneqarsinnaavoq pinngortitap ingerlarnga inunnit sunnerneqarsinnaasoq allanngortinneqarsinnaasorlu, pingaartumik siunertaralugu co2-mik aniatitsineq annikillisarniarlugu taamaalillunilu nunarsuarmi kissatsikkiartornera annikillisarniarlugu. Sammisaqarnermi tassani ilisimatusartut pingasut Cambridge University-meersoq, University College London-imeersoq kiisalu Oxford University-meersoq aaqqissuussinermut akisussaasuussapput.
Peqatigiiffik Illu aamma Bergen Universiteti Norgemeersoq Ilulissani pisussanik aaqqissuisuupput.
