Sermersooq: Umiarsuit takornariartaatit akitsuusersorneqarnerat sumiiffinni arlalinni atuutissaaq
Kommuneqarfik Sermersuumi takornarianit umiarsuarnik takornariartaatinik tikittartunit amerlanerusunik isertitaqarnissaq siunertarineqarpoq. Kommunimi sumiiffinni arlalinni tikittussat akiliuteqartalernissaat maanna siunnersuutigineqarpoq.
Illoqarfiit pingaarnersaata kommuneqarfiata angalaffissat nutaat pingasut ilaasut nunamut niugunik 50 koruuninik akiliiffigisartagassaattut ilanngukkumavai.
Toqqorsivimmit assi: Leiff Josefsen
Illoqarfiit pingaarnersaata kommunia 2024-mi takornariartitsinermut atatillugu Namminersorlutik Oqartussanit 3 millionit koruuningajannik aningaasaliiffigineqarpoq, taakkualu umiarsuarnut takornariartaatinut ilaasut nunamut niuffiannut ataatsimut avatangiisinut aserfallatsaaliuinermullu akiliummik 50 koruuninik akiliisitsisarput.
Kommunip kujataani Ivittuuni aamma Kangilinnguit eqqaanni kangianilu Tasiilap eqqaani Ikkattimi akitsuummik atuutilersitsinermigut aningaasat taakku amerlanerulersinniarpai.
Illoqarfiit pingaarnersaata kommuniani sumiiffiit kujasinnerpaat pillugit ima tunngavilersuipput:
- Sumiiffiit eqqaaneqartut soqutigineqarnerat ukiuni kingullerni annertusiartuinnarsimavoq. DR-ip piviusulersaarusiaata ”Grønlands hvide guld”-ip takutinneqareernerani oqallisingaatsiarnerup kingorna Ivittuunut aamma Kangilinnguanut soqutiginninneq suli annertusinerussasoq naatsorsuutigineqarpoq, Aningaasaqarnermut Inuussutissarsiornermullu Ataatsimiititaliami politikkerinut februaarip qulingani ataatsimiittussanut Suliffeqarfiup iluani kiffartuussivimmit innersuussummi allassimavoq.
Soqutigineqarneruleriartortut
Ivittuut aatsitassarsiorfiusimasoq inuit akornanni illoqarfittut qimaannakkatut taaneqartarpoq. Tassani 1854-imiit 1987-imut kryolitimik aluminiumiliornermi atorneqartartumik piaasoqarlunilu avammut assartuisoqartarpoq. Ivitttuut Kangilinnguanit 4 kilometerit missaannaanik ungasitsigivoq.
Ikkatteq, aamma nunaqarfik inuerutisimasoq Tasiilamiillu 14 kilometerit missaanni kimmut ungasitsigisoq pillugu aqutsisoqarfik ima allappoq:
- Ikkatteq aammattaaq soqutigineqaraluttuinnarpoq, takornariartitsisartullu nunaqavissut ukiuni arlalinni takornarianut takutitassatut atortarpaat. Kalaallit Nunaat piffissami kingullermi Amerikamiut præsidentiata soqutigingaarmagu tamatumalu kingunerisaanik nunanit tamalaanit tusagassiuutitigut sammineqangaarmat umiarsuarnik takornariartaatinik ingerlatsisut Ikkatteq soqutiginerulerumaaraat naatsorsuutigineqarpoq, aningaasaqarnermut ataatsimiititaliamut saqqummiussami allassimavoq.
Akitsuummit kommunimut tuttartumit aningaasat „takornarianut minnerunngitsumillu illoqarfimmiunut iluaqutaasumik attaveqaasersuutinut suliniutinut assigiinngitsunut atorluarneqartassapput“.
