Sermitsiami ukioq qaangiuttoq: Ukioq manna tamaviaarnarnerpaavoq

2025 naajartorpoq, taamaattumillu ukiumi matumani qanoq pisoqarsimaneranik killiffissiorfissanngorluni.

Taamaammallu suliffeqarfitsinni ukioq naangajalersoq kingumut qiviarparput. Sermitsiami pisortaaneq Masaana Egede ukiumi matumani suut puigunaatsuunersut, unallernarnerpaasimanersut kiisalu suut tulluusimaarutissaanersut pillugit aperaarput.

Ukioq imaannaanngitsuusoq oqarpoq:

- Ukioq 2025 sulilerninniit ingasannerpaavoq. Inatsisartunut qinersineq, kommuninut qinersineq, mittarfiit pillugit ajornartorsiutit, ulluinnarni inuuneq – minnerunngitsumillu spiralilersuinikuunermut suliaq, arnanut eqqugaasunut, inuiaqatigiinnut Kalaallit Nunaata Danmarkillu attaveqarneranni aalajangiisuulluinnartoq.

2025-mi pissutsit pissaganarluinnarput, ukiummi affaa siulleq USA-p Kalaallit Nunaannik soqutiginninnera aaqqissuisoqarfinni ulluinnarni sulinermut allannguisuulluinnarpoq.

- Taamaakkaluartoq nunarsuup sinnerata uagutsinnut malinnaalluinnarnerani, Sermitsiami sulisut tamarmik pisuni taama pingaaruteqartigisuni tusagassiuutitigut siuttuusimammata tulluusimaarutigaara, Masaana Egede oqarpoq.

Tulluusimaarutigisassarpassuaqartoq

Tulluusimaarutissammi ikittuinnaanngitsut pisortaq isumaqarpoq.

Sermitsiami allaaserisat amerlasuut nunani tamalaani tusagassiuutinit issuarneqartartut oqaatigaa, taamaalillunilu maani sulinermi Kalaallit Nunaata, Danmarkip USA-llu attaveqatigiinnerat pillugu oqallinneq namminiilivinnissamuinnaq tunnganngitsoq qulakkeerneqarpoq.

- Tulluusimaarutiginerpaasara tassaavoq ukkatarinnissimanerput. Ulluinnarni pisartut pingaarutillit allaaseriuaratsigit: pirorsaasunik amigaateqarneq, peqqinnissaqarfiup tatineqarnera, mittarfiit aallartisarnerannut ajornartorsiutit, attaveqaatit, aatsitassarsiorfiit — aamma piniarnermut tunngasut kulturitsinnut pingaaruteqarluinnartut.

- Avatangiisitta Trump namminiilivinnerlu annerusumik oqaluuserigaat taamaaliorpugut, Masaana Egede oqarpoq.

Qinersinermi unnuit pissanganartut pingaarutillillu

Ukioq manna marloriarluni qinersisoqarpoq. Inatsisartunut marsip aqqarngani qinersineq, kommuninullu apriilip aallaqqaataani qinersineq.

Pisut taama pingaaruteqartigisut tusagassiuutini suliarineqarnissaat annertuvoq.

Masaana Egedep qinersinerup unnukkua immikkuullarissutut taavai. Tusagassiortut, aaqqissuisut, nutserisut, tuniniaasut, allaffimmiut, ilusilersuisut aqutsisullu pitsaanerpaamik tusagassiinissat eqqarsaatigalugit unnuamut ataatsimoorlutik sullipput.

- Sulisuvut kingulliit ullaassakkut pingasut qaangilaarnerani angerlarput. Aqaguani ullaakkut arfineq-pingasut missaanni iserama tusagassiortut taakkua ilaat arlallit allaffimminni issiareerput. Aperaakka sooq taama siusitsigisumik suliartoqqinnersut, imalu akiinnarput: "Masaana, pingaaruteqarmat.“ Taama oqarmata qullilivunga, pisortaaneq oqaluttuarpoq.

Tusagassiorfimmi allannguutit

AAMMA ATUARUK

Sermitsiaq AG-lu kattullugit aviisimi ataatsimi sapaatit-akunnerisa naaneranni saqqummertalissapput

Naak ukioq manna Sermitsiamut pitsaasumik angusaqarfiugaluartoq, annernarsinnaasunik aamma aalajangiisoqartoq Masaana Egede oqaluttuarpoq.

- Nuuk Ugeavisimik saqqummersitsisarunnaarnissamik aalajangerneq tulluusimaarutiginnginnerpaavara. Aalajangiineq pisariaqarluinnarlunilu pissusissamisoorpoq – oqitsuinnaanngilarlu. Nuuk Ugeavis illoqarfiup kulturikkut kingornussaanut ilaavoq, aallussilluartumit ingerlanneqartoq. Mia qujanaq, oqarpoq.

Tamannali kisiartaalluni allannguutaanngilaq. Tusagassiorfiup digitalimik atuineruleriartornera, nittartakkatigullu saqqummersittakkatta pitsaanerulersinnissaat sulissutigiuarpaa. Ukiumilu nutaami naqitat ataatsimut kattunneqassapput, taamaalilluni Sermitsiaq AG-lu sapaatip-akunnerata naanerani aviisitut ataatsimut tallimanngornermi saqqummersinneqartalissallutik.

Atuagassiat takinerusut, assiliartalersorluakkat sapaatip-akunnerata naanerani saqqummersinneqartut atuartartut naatsorsuutigisinnaavaat, pisortaaneq oqarpoq.

- Nunatsinni tusagassiorfinni pitsaanerpaatut ingerlaannarnissarput tunaartaraarput – Kalaallit Nunaanni nutaarsiassat pingaarnerpaat oqaluttuariuaannarumallugit, Masaana Egede naggasiilluni oqarpoq.