Siumut Qeqertalik: Raajaleriffik annaanneqassaaq
Kommune Qeqertalimmi Siumumi politikkerit Polar Seafoodip Aasianni raajaleriffiata matunnginnissaa, sulisullu 116-it suliffimminnik annaasaqarnissaat inuiaqatigiinnut annertuumik kinguneqatussaq pinngitsoortinniarlugu politikkikkut iliuuseqartoqassasoq piumasaraat.
Kommune Qeqertalimmi Siumumi politikerit Aasianni raajaleriffiup matuneqarnissaa ernummatigaat, taamaattumillu politikkikkut iliuuseqartoqarnissaa piumasaraat.
Assi toqqorsivimmiit
Aalisarnermut Naalakkersuisup Peter Borgip Aasianni raajaleriffik matuneqarnissaanik ulorianartorsiortoq pillugu nalunaarutaa kingulleq tassaavoq, Polar Seafood aamma Royal Greenaland nammineerlutik oqaloqatigiissuteqartariaqartut. Oqaloqatigiinneq tamanna kinguneqarsimanngitsoq, Polar Seafoodimi pisortaq Bent Salling sisamanngornermi Sermitsiamut oqarpoq.
Polar Seafoodip nalunaarutaa Kommune Qeqertalimmi politikerinit ernumagineqarpoq, Siumumilu ilaasortat politikkikkut iliuuseqartoqassasoq piumasaraat.
Ajornartorsiut ilungersunartoq
- Siumut isumaqarpoq, ajornartorsiut taama annertutigisoq piaarnerpaamik politikkikkut akuliuffigineqartariaqartoq. Taamaattumik piumasarivarput kommunalbestyrelsi immikkut ittumik ataatsimiinnissaa piaartumik piviusunngortinneqassasoq. Paneeraq Sandgreen aamma Aqqa Samuelsen Siumup kommunalbestyrelsimi politikkikkut gruppia sinnerlugit allapput.
Piaarnerpaamik iliuuseqartoqartariaqarnera partiip ujartorpaa.
- Kommune Qeqertalimmi borgmesteri innuttaasut sinniisoraat, taamaattumillu suliaq taanna utaqqisitsinertaqanngitsumik salliutinneqartariaqarpoq. Ataatsimiinneq immikkut ittoq ingerlanneqanngippat, innuttaasut tatiginninnerat annertuumik innarlerneqarsinnaavoq.
Peter Borg iliuuseqartariaqarpoq
Peter Borgip aalisarnermik ingerlatsisut taakku marluk oqaloqatigiinnissamut isumaqatigiillutillu aaqqiissutissarsinissaannut kajumissaarneri naammanngitsut partii isumaqarpoq.
- Aalisarnermut Naalakkersuisoq Peter Borg oqariartuutigaa ingerlatseqatigiiffiit marluk ataatsimoorlutik aaqqiissutissamik nassaarnissartik pillugu oqaloqatigiissutigisariaqaraat. Tamanna Siumumiit aaqqiissutissatut taamaallaat isiginiassallugu naammaginngilarput – maanna iliuuseqartoqartariaqarpoq, Siumumi politikerit naqissuserpaat suliffiit kisimik pineqanngitsut, aammali ilaqutariit, meeqqeriviit, meeqqat atuarfiat, inuussutissarsiutit allat illoqarfiullu siunissaa pineqarput.
