Troels Lund Vivian Motzfeldtilllu sakkuttut Utoqqarmiut Kangerluarsunnguanni qujassuteqarfigaat
Danskit illersornissamut ministeriata nunanullu allanut naalakkersuisup sakkutuut Utoqqarmiut Kangerluarsunnguanni innaallagissiorfimmi sungiusartut naapippaat.
Illersornissaqarfiup pisortaa Michael Hyldgaard, illersornissamut ministeri Troels Lund Poulsen naalakkersuisorlu Vivian Motzfeldt Utoqqarmiut Kangerluarsunnguanni sakkutuut ilaannik oqaloqateqartut.
Foto: Christian Klindt Sølbeck/Ritzau Scanpix
Arfininngornermi ullaap tungaani Kalaallit Nunaanni sakkutuut politikerinit ilassineqarlutillu qujassuteqarfigineqarput.
Illersornissamut ministeri Troels Lund Poulsen nunanullu allanut naalakkersuisoq Vivian Motzfeldt (S) Utoqqarmiut Kangerluarsunnguanni innaallagissiorfimmut pulaarput, tassani danskit sakkutuui paasinermut ilapittuipput.
Tusagassiortut Kalaallit Nunaanneersut, Danmarkimeersut nunanillu tamalaaneersut ilaatigut sakkutoorpassuit maanna maaniittut Kalaallit Nunaanni ulluinnarsiutaalissanersut illersornissamut ministerimut apeqqutigaat.
- Piffissaq tamakkerlugu Kalaallit Nunaanniititaqarpugut, qanga aamma taamaappoq. 2025-llu ukiaani sakkuttut amerlanerusut najutsinnissaat aalajangerparput, taamaammallu NATO-mi iligisat amerlanerusut maaniinnissaat kissaatigikuttoorpara.
- Nalinginnaasut nutaat
Kalaallit Nunaanni ataavarnerusumik sungiusartarnissanut maanna pilersaarusiortoqarpoq. Taakku illersornissaqarfiup pisortaata maanna nerriviata qaaniittut, illersornissamut ministeri oqaluttuarpoq. Illersornissaqarfimmi pisortaq Michael Hyldgaard aamma Utoqqarmiut Kangerluarsunnguanni innaallagissiorfimmeeqataavoq.
Vivian Motzfeldtip sakkutuut maanna najuunnerat Kalaallit Nunaanni “nutaatut nalinginnaasoq” tusagassiortunut nunanit allaneersunut erseqqissaatigaa.
- Kisimiinnginnitta kalaallit innuttaasuinit malugineqarnissaa pingaarpoq. Taamaammallu ullumikkut maaniippugut, taanna nangilluni oqarpoq.
Sakkutuulli aamma innuttaasut ilaannut ernumatitsinerat Vivian Motzfeldtip ilanngullugu ilisimaaraa. Taamaammallu oqaloqatigiilluarnerup sunniutaa erseqqissaatigaa.
- Ullumi kingusinnerusukkut innuttaasunik ataatsimiititsinissatta oqaatiginissaa pingaaruteqarpoq. Inuit oqaloqatiginissaat pingaaruteqarpoq, naak apeqqutit tamarmik ullumikkut akineqarsinnaanngikkaluartut.
Ataatsimiinnerpassuit ingerlanneqassasut
Tusagassiortut arlallit suleqatigiissitami nutaami USA-mik isumaqatiginninniarnerit qanoq ingerlanerannut akissutissarserusupput.
- Oqaatigeriikkatsitut ataatsimiinnerit ingerlalluarput. Suut killissarinerlutigit erseqqissumik oqaatigereerparput. Ataatsimiinnerpassuit ingerlanneqassapput, taamaammallu eqqissillutik sulinissaannik periarfissittariaqarivut isumaqarpunga, Vivian Motzfeldt oqarpoq.
Politikerit marluullutik kingorna sakkutuunut saaffiginnillutik tamaaniinnerannik sulinerannillu qutsavigaat.
Kingorna sakkutuut TV-mik assiliissutit saavanni sivikitsumik sungiusarput, kingornalu angalaqatigiit angallatinut helikopterinullu uterput. Oqaatigineqareersutut arfininngornermi kingusinnerusukkut innuttaasut ataatsimiitinneqarlutillu politikerit doorsteperlutik tusagassiortunik naapitsissapput.
