Nutaarsiassat naatsut

Pisuussutit tuniniagaanngitsut

Kommune Kujallermi borgmesteri Malene Vahl Rasmussen allakkat ammasut atorlugit ersarissumik USA-mi præsidentimut allattoqarfianullu ammasunik allagaqarpoq. Kalaallit Nunaanni nunap pisuussutai atorneqarsinnaanngillat Kalaallit Nunaanni inatsisit, tamat naalakkersueqataanerat innuttaasullu kissaataat tamakkiisumik ataqqineqartinnagit.

Allakkami kommunip nittartagaaniittumi erseqqissarneqarpoq aatsitassanik pingaarutilinnik ilaatigut saffiugassanik qaqutigoortunik soqutiginninneq pillugit tatisiniartoqassanngitsoq maleruagassanillu atuuttunik avaqqutaarisoqarani. Borgmesteri naapertorlugu aningaasatigut suliffissanilluunniit neriorsuisoqassanngilaq inatsisit atuuttut, avatangiisinik mianerinninneq sumiiffinnilu tapersersuineq avaqqunniarlugit.

Allakkani erseqqissarneqarpoq nunanit tamalaanit susassaqartunit suleqateqarnermi sumiluunniit pisariaqartoq Kalaallit Nunaanni naalakkersuinikkut ingerlatsiviit, aalajangiisinnaassuseqarneq nunanillu allannit suleqatigiinnerit ataqqineqarnissaat.

Paamiuni pasinartulimmik toqunermi inuk tigusarineqartoq

Arnaq 60-inik ukiulik Paamiuni najugalik tallimanngornermi januaarip 23-ani toqusimasoq nassaarineqarpoq. Toqusoqarnera politiit pasinartulimmik toqusoqarneratut misissorpaat. Tallimanngornermi unnukkut nal. 22.45 politiit ilisimatinneqarput, erngerlutillu paasiniaalerlutik toqusoqarnerani pisut paasiniarlugit. Tassunga atatillugu naalagaaffimmi pinerluttoqartillugu paasiniaasartut kiisalu Retsmedicinsk Institut aggersarneqarput. Unnuk taanna angut najukkamiittoq tigusarineqarpoq suliamilu unnerluutigineqarluni.

- Angut pasineqarpoq suliami assigiinngitsut misissorneqarneranni, vicepolitiinspektør Malik Sandgreen nalunaarpoq.

Angut sapaatiummat Sermersuup eqqartuussiviani inatsit tunngaviusoq malillugu killisiorneqarpoq, tassani ulluni 25-ni tigummigallarneqarluni. Eqqartuussivimmut sassartinneqarneq matoqqasumik ingerlanneqarpoq, taamaattumillu politiit annertunerusumik oqaaseqarsinnaanngillat.

Arnamut qanigisaasut ilisimatinneqareerput.

Ilulissani taaguutissamik unammisitsineq

Ilulissani sumiiffimmi ataatsimiititaliaq meeqqanut 76-inut sulisunullu 20-nut inissalimmik meeqqerivimmik meeraaqqeriviutigisumik ammarlaamik taaguutissamik unammisitsivoq, avannaata Kommunia nittartakkamini allappoq. Siusinnerusukkut meeqqat meeraaqqerivimmit Mikisumit meeqqerivimmillu Angajomit aggerfeqarput. Innuttaasut tamarmik unammisitsinermi peqataasinnaapput, ajugaasorlu 1.000 koruunimik akissarsitinneqassaaq.

Inatsisartuni ataatsimiinnerit ullormik ataatsimik ilassutaat

Inatsisartuni aalajangerneqarpoq februaarip aappaani Ukiaanerani ataatsimiinnerit aappaat ullormik ataatsimik ilaneqassasoq. Ataatsimiinneq nal. 11.00 aallartinneqassaaq, Naalakkersuisut siulittaasuata naalagaaffiup inissisimanera pillugu saqqummiissalluni nunarsuarmi pisut sakkortuut peqqutigalugit. Partiit oqaaseqartartui tamarmik saqqummiinissaminnut minutsini qulini periarfissaqassapput, kingornalu ilaasortat apeqquteqarsinnaallutik.

Naalakkersuisut inuussutissarsiuteqartullu oqaloqatigiinnerat

Inuussutissarsiornermut, aatsitassanut, nukissiornermut, inatsisinik atuutsitsinermut naligiissitaanermullu Naalakkersuisoq Naaja H. Nathanielsen sapaatit akunnerani qaangiuttumi inuussutissarsiornermi siuttunik ilaatigut Sulisitsisunik ataatsimeeqateqarpoq. Aningaasaqarneq nunallu inuussutissarsiornikkut ineriartornera oqaloqatigiissutigineqarput, nunarsuarmit malugineqarnerujartornermut atatillugu inuussutissarsiortunut pinartoqanngitsoq, suleqatigiittuarnikkullu ineriartornissamut aningaasaliinissamullu periarfissat pillugit suleqatigiinneq ingerlateqqilluni.

Nalorninartulimmi atugarissaarneq paaralugu – nutaarsiassat qamillugit

Piffissami nunarsuarmit tamarmit sammineqarnerujussuup toqqissisimannginnerullu nalaani Peqqissutsimut Meeqqanullu Naalakkersuisut Anna Wangenheim Nivi Olsenilu atugarissaarneq sianissutsikkullu peqqissuseq pillugit tusagassiuutinik katersortitsipput. Taama Sermitsiaq.gl allappoq.

Tusagassiortunik katersortitsinermi sammineqarpoq nutaarsiassat ulloq unnuarlu ingerlaartuartillugit sianissutsikkut peqqissuseq innuttaasutut qanoq isumagineqarsinnaanersoq. Naalakkersuisut inuit kajumissaarpaat tusagassiuutit tutsuiginartut toqqartaqqullugit, inuit attaveqaqatigiittarfii qanilaarlugit, ileqqunillu pitsaasunik taarserlugit. Naqissuserneqarpoq peqqinnissaqarfik ulloq unnuarlu ammasoq, angajoqqaallu pingaaruteqarluinnartut meeqqamik toqqissisimanissaannut eqqissisimasunik silatusaartumillu pisut meeqqaminnut oqaloqatigiissutigalugit.

Innuttaasut tigussaasumik siunnersorneqarput ilaannikkut nutaarsiassat qamittaqqullugit ingasattajaartumik paasitinneqarneq tarnikkut tatineqaataasartoq pinngitsoortinniarlugu.

Sisimiuni nunarsuarmi tamarmi kræftimut ulloritinneqartoq malunnartinneqartoq

Februaarip 4-ani 2026-mi nunarsuarmi tamarmi kræftimut ulloq malunnartinneqarpoq, ullormi tassani kræftimik pinaveersaartitsineq sammineqarluni nunarsuarmi tamarmi kræftimik akiuiniarnerit sammineqarlutik. Tassunga atatillugu Neriuffiit Kattuffiat Nunatsinni peqatigiiffiit peqatigalugit ataatsimoorlutik pisoqatigiisitsiniarput taaguuserlugu ”Neriunnerput qaminngisaannarpoq”. Aaqqissuussineq kulturikkut illumit Taseralimmit aallartissaaq katersortarfimmi naggaserneqarluni, tassani kaffi, tii kaagillu sassaalliutigineqarlutik. Aaqqissuussineq toqqaannartumik Sisimiut TV-mi aallakaatinneqassaaq, sumiiffimmilu radio aamma peqataassalluni.