UNNIA
DR Kalaallit Nunaanni aalajangersimasumik aaqqissuisoqarfimmik pilersitsivoq
DR-ip Kalaallit Nunaat pillugu allaaserisaasa ilaat aalajangersimasoq, ullaat tamaasa saqqummertartoq ima qulequtaqarpoq: ´Morgenpost fra Grønland´ (Kalaallit Nunaanniit ullaakkut tusagassiaq, aaqq.). Atuagassiami siullermi Nuummi tusagassiortorpassuit allaaserineqarput – taakkualu ilaat marluk DR-imi tusagassiortoq Karoline Engelund assimi takuneqarsinnaapput.
Assi: Karoline Engelund, DR
Ditte Christiane Jensen, DR Ung-imi aaqqissuisoq, atuagassiami Journalisten-imi sakkutuut kisimik Issittumi ulapputinngitsut aammali Danmarks Radio taamaaliortoq oqaluttuarpoq.
- Oqaluttuarisaanermi pisimasut Kalaallit Nunaat qitiutillugit nunarsuarmik allannguisuupput – inuusuttunullu attuumassuteqarluinnarput, taakkuami siunissaat nalorninartorsiortinneqarmat. Taamaattumik P3-mi sulisut DR-ip Kalaallit Nunaanni aaqqissuisoqarfianiipput inuusuttut isiginnittaasiat aallaavigalugu ineriartorneq oqaluttuaralugu nassuiassallugu, oqarpoq.
Go’ Morgen P3-mi aallakaatitassiap aaqqissuisua, Liva Magnhezi, inuusuttunik oqaloqateqarniarluni Sisimiuniippoq.
Assi: Liva Manghezi
DR Ung inuusuttunut aallakaatitassialiortartoq Danmarks Radiop immikkoortortaqarfigaa.
Qaammatip aallartinnerani nunarsuarmi pisut pissutigalugit tusagassiortorpassuit nunanit tamalaaneersut, ilaatigut Danmarkimit, maanga tikissimapput. Qallunaallu tusagassiuutitigut suli sunniuteqarpasipput.
TV2-p Nukaaka Tobiassen Nuummi tusagassiortutut atorfinitsippaa, DR-ilu siunissami nunami tamaani aalajangersimasumik aaqqissuisoqalertussaavoq.
DR naapertorlugu aaqqissuisoqarfimmi nutaarsiassanik tusagassiortut marluk P3-millu tusagassiortut assigiinngitsunik amerlassusillit tusagassiisartutut sulissapput, atuagassiaq Journalisten allappoq.
