Trumpip niuertoq Kalaallit Nunaannut attuumassuteqartoq Issittumi Ataatsimiititaliarsuarmi siulittaasunngortikkaa
Amerikami niuertoq Tom Dans, upernaaq Usha Vancemik Avannaata Qimussersuanut qaaqqusisuunerartoq, USA-p Issittumi Ilisimatusarnermut Ataatsimiititaliarsuani (USARC) siulittaasunngorpoq.
- Ataatsimiititaliarsuarmi siuttuunerup saniatigut Amerikamiut suliffissuaqarfiisa suliffeqarfiillu Issittumi soqutigisaannik illersuinissaq akisussaaffigissavara — aamma nunap immikkoortuani aningaasaliissutinik, pisuussutinik ineriartortitsinissamik attaveqaatinillu siuarsaaniarlunga sulininnik ingerlatseqqinnissara qilanaaraara, Tom Dans toqqagaanini pillugu LinkedIn-imi allappoq.
Assi: U.S. Arctic Research Commission (USARC)
Amerikamiut Kalaallit Nunaannik soqutiginninneranni pingaarnertut peqataasut ilaat Donald Trumpimit qaffasissumik atorfinitsinneqarpoq.
Tom Dans pineqarpoq, taannalu Amerikamiut marsimi tikeraarneranni malinnaavigineqaqisumi pingaarnertut inissisimaffeqarnikuuvoq. Tassani præsidentip tulliata J.D. Vancep nulia Usha Vance Nuummut Sisimiunullu tikeraalertoq nalunaarutigineqarluni.
Donald Trumpip Tom Dans USA-p Issittumi Ilisimatusarnermut Ataatsimiititaliarsuani (USARC) siulittaasutut toqqaqqammerpaa, ataatsimiititaliarsuup nittartagaani tusagassiuutitigut nalunaarummi atuarneqarsinnaavoq.
Tom Dan ataatsimiititaliarsuarmi siulittaasutut præsident Trumpimut Amerikamilu innuttaasunut sullissinissani tulluusimaarutigalugu LinkedInimi allappoq.
- Issittoq ingerlalluaqqilersitsigu
- Ataatsimiititaliarsuarmi siuttuunerup saniatigut Amerikamiut suliffissuaqarfiisa suliffeqarfiillu Issittumi soqutigisaannik illersuinissaq akisussaaffigissavara — aamma nunap immikkoortuani aningaasaliissutinik, pisuussutinik ineriartortitsinissamik attaveqaatinillu siuarsaaniarlunga sulininnik ingerlatseqqinnissara qilanaaraara.
- Issittoq ingerlalluaqqilersitsigu, Tom Dans allappoq.
Issittoq "nunarsuup kitaata qaavatut“ ittoq, USARC-ip tusagassiuutitigut nalunaarutaani Dans allappoq.
- USA-p asasatta nunarsuamilu pingaarnersaasup inissisimaffia, Tom Dans oqarpoq.
Jørgen Boassenip angalaqatigigaa
USARC USA-p præsidentianut kongressimullu Issittumi ilisimatusarnikkut anguniagassanut tunngatillugu siunnersuisartuuvoq.
USA-mi novembarimi 2024-mi præsidentimut qinersisoqarnissaa sioqqullugu, Tom Dans isummersuummi allaqataasutut maluginiarneqarpoq. Tassani USA qinersinerup kingorna Kalaallit Nunaat kiffaanngissuseqarluni nunatut nammineq USA-mik suleqateqalernissaa anguniarlugu oqaloqatigiinneq aallartitsisariaqartoq tunngavilersuutigaa. USA-p isumannaatsuunissaa taamaaliornikkut anguniarneqassalluni.
Tom Dans Trumpimik tapersersuisoq ilisimaneqarluartoq Jørgen Boassen peqatigalugu Kujataani ukioq manna februaarimi angalavoq, tassani Amerikamiut Kalaallit Nunaanni suliffeqarfinnut aningaasaliinissaat ajornannginnerulersinniarlugu attaveqaateqalernissaq siunertarineqarluni.
