Angut 27-nik ukiulik Ittoqqortoormiini angummik 39-nik ukiulimmik ukioq manna augustip 30-ani toqutsisimasutut eqqartuunneqarnera ataasinngornermi aallartippoq.
Angut pisuunnginnerarpoq illersuisullu pinngitsuutinneqarnissaa piumasaralugu, unnerluussisussaatitaasullu ukiuni arfineq-marlunni parnaarussaaqqanissaa piumasaraat.
Angut 27-nik ukiulik Ittoqqortoormiini angummik 39-nik ukiulimmik ukioq manna augustip 30-ani toqutsisimasutut eqqartuunneqarnera ataasinngornermi aallartippoq.
Angut pisuunnginnerarpoq illersuisullu pinngitsuutinneqarnissaa piumasaralugu, unnerluussisussaatitaasullu ukiuni arfineq-marlunni parnaarussaaqqanissaa piumasaraat.
Unnerluutigineqartoq politiinit marlunnit eqqartuussivimmukaanneqarpoq. Qernertumik atisaqarlunilu nasartalimmik tujuuloqarpoq. Eqqartuussineq tamaat oqaaseqarumanani issialluni isingerusaarpoq.
Unnerluussissut naapertorlugu angut 27-nik ukiulik angummik 39-nik ukiulimmik arlaleriarluni timaatigut kapuuilluni toqutsisimavoq. Angutillu kaporneqarnini toqqutigaa.
Taanna aami qeqqani nalalluni toqungasoq Ittoqqortoormiini illumi aggustip 30-anni ullaakkut nassaarineqartoq, unnerluussisussaatitaasup Lars Petersenip oqaatigaa. Matu paarnaaqqanngilaq aserorneqarsimananilu.
Pasineqartoq ualikkut tigusarineqarpoq unnerluutigineqarlunilu, aqaguanilu eqqartuussivimmut sassartinneqarluni taamanili tigummigallarneqalerpoq.
Atisai aarasaartut
Ittoqqortoormiini aggustip 29-ani 30-anilu ernguttoqarsimasoq, unnerluussisussaatitaasoq oqaluttuarpoq. Illumi angutip 39-nik ukiullip toqungasup kingorna nassaarineqarfissaani inuit arlallit ataatsimoorsimapput. Unnerluutigineqartoq toqutaasorlu ilaasimasut, unnerluussisussaatitaasup paasissutissiissutigaa.
- Toqutaasoq aalakuungaatsiarpoq, allallu ingerlaqqimmata illumiiginnarsimalluni. Takunnittunik apersuinermi unnerluutigineqartoq allat ilagalugit ingerlaqqissimanersoq imaluunniit aamma illumiiginnarnersoq paasiniassavarput, Lars Petersen oqarpoq.
Unnerluutigineqartup tujuuluararigunagaa qatanngutaata inaani politiit nassaaraat. Aattaqarpoq, DNA-millu misissuineq naapertorlugu toqungasumeersuulluni. Unnerluutigineqartoq tigusarineqarnermini uinequteqarlunilu alerseqarpoq angutip 39-nik ukiullip aavanik aattalinnik.
Unnerluussisussaatitaasup unnuaq taanna qanoq pisoqarsimanera paasiniarlugu ilisimannittut arfineq-marluk aggersarpai. Tallimat ullumi nassuiaatinneqassapput, aqagulu marluk nassuiaatinneqassallutik.
Unnerluutigineqartup unnuaq taanna susoqarsimanersoq eqqaamannginnamiuk oqaaseqarusunngitsoq, illersuisoq Martin Due Lomholdt oqarpoq.
Unnerluutigineqartoq tassani najugaqartoq
Ilisimannittoq apersorneqartoq siulleq tassaavoq angut Ittoqqortoormiineersoq. Taassuma illuani toqungasoq nassaarineqarpoq. Ikinngutini arfineq-pingasut missaanniittut, ilaatigut unnerluutigineqartoq toqutaasorlu, ilagalugit angerlarsimaffimmini tallimanngornermi ualikkut festerpoq.
Unnerluutigineqartoq ilimannittup illuani taamani najugaqarallarsimavoq. Festertoqartoq unnukkut angerlarpoq.
Festerneranni nuannisartoqarpoq. Aalakoorput pinnguaatinillu pinnguarlutik. Unnukkut allamut nangikkiassallutik aalajangerput, tamarmik – angut 27-nik ukiulik toqutaasorlu kisimik pinnatik – anipput.
Ilisimannittoq naapertorlugu angut 27-nik ukiulik illumi eqqiaaniarami ilaanngilaq. Kingorna malinnikkumaarluni oqarpoq, takkunnanili.
- Ikinngutima illuani sinippunga, ullaakkullu angerlarama politiit takkussimapput illunnilu toqutsisoqarsimasoq paasitillunga, ilisimannittoq oqarpoq.
Ilisimannittup tullia arnaavoq Ittoqqortoormiineersoq. Taanna aamma festeqataavoq, aalakuungaatsiarami unnerluutigineqartoq qanoq pissusilersorsimanersoq eqqaamanngilaa.
Ilisimannittoq siulleq assigalugu unnuup ingerlanerani unnerluunneqartoq toqutaasorlu kisimik ilaanatik tamarmik allamut nangikkiarsimallutik oqaatigaa.
Ilisimannittut taakku marluk videokkut attaveqaqatigiinnermi peqataapput, ilisimannittullu pingasut allat ualippat nassuiaassapput. Ilisimannittut kingulliit aqagu nassuiaassapput. Suliap decembarip 29-ani naammassinissaa naatsorsuutigineqarpoq.
