USA-p Kalaallit Nunaanni sakkutooqarfiata eqqaa akuutissamik PFAS-eeqartoq paasineqartoq

USA-p sakkutooqarfiani Pituffik Space Basemi imeq peqqissutsimut ajoqutaasinnaasumik akuutissamik PFAS-imik akoqartorujussuunera misissuinermi paasineqarpoq.

Politikenimiit imermik misissuinerit inerneri USA-p sorsunnermut ministereqarfiata nittartagaaneersut misissorneqarsimapput.

PFOS akuutissanut PFAS-imut atasut, imermi liiterimi ataatsimi 1100 nanogramiunerat misissuinermi paasinarsisoq, aviisi allappoq. Professor Anders Baun Danmarks Tekniske Universitetimeersup EU-mi killigititaasumit 250-eriaammik qaffasinnerusoq oqarpoq.

- Akuisa qaffasippallaarujussuarnerat peqqutissarsiorneqarsinnaanngilaq, taanna oqarpoq.

PFAS eqimattami akuutissanut tusindilikkaanut fluorilinnut taaguutaavoq. PFOS taakkua ilagaat.

Akuutissat taakkua arrortikkuminaatsuusut, hormoninut akornutaasinnaasorineqarlutillu kræfteqalersitsisinnaasorineqartut, danskit oqartussaasuinit pasitsaanneqarpoq.

Professor Anders Baunip Pituffik Space Basep PFOS-eqarnera, Amerikamiut sakkutuuisa qapuk atorlugu ikuallattunut qamisaatinut sungiusarnerminni ukiuni qulikkuutaani atuisarnerannik pissuteqartoq Politikenimut oqaatigaa. 

Sakkutooqarfiit allat assigalugit qapuit atorneqartut taarserneqanngitsut

Kalaallit oqartussaasuisa Pituffimmi PFAS-imik atuisoqarsimaneranik ilisimasaqaratik Politikenimut ilisimatitsissutigaat, "nunarpassuarmili" qamiterutini qapuliortartuni atugaasarnikuunerat pissutigalugu taama pisoqarsimassangatippaat.

Amerikamiut sakkutooqarfiisa qapuk atorlugu ikuallattumut qamisaateqarnerat PFAS-imik akulinnik taarsersuisimanerat 2017-imi saqqummiunneqarpoq. Pituffilli sakkutooqarfiit taarsersuiffiunngitsutuaasut ilagigaat, Politiken allappoq.

Aviisip Amerikamiut Kalaallit Nunaanni sakkutooqarfimmi qapuk atorlugu ikuallattumut qamiterutinik PFAS-imik akoqanngitsunik qanga atuisalersimanerat Amerikamiut sakkutuuinut apeqqutigaa, saaffiginnissulli akineqanngilaq. Sakkutooqarfimmi paasissutissiisup atiminik isertuussisup, qamiterutit qapuit "ukiualunnguit matuma siorna" apuussimanerarpai.

Pituffik Space Base, Thule-basetut siornatigut ilisimaneqartoq, USA-p Kalallit Nunaanni sakkutooqarfituaraat. Kalaallit Nunaata avannaaniippoq.

USA Kalaallit Nunaanni sakkutooqarfigisimasai siornatigut 17-iupput.