Nuup qeqqani neriniartarfik nutaaq aningaasaliiffigigaa

Nuummi sutorniartarfiit neriniartarfiillu ineriartortuarput. Ivalu Restaurant & Bar, Martin Heilmann Kristensenimit siulersorneqartoq, maannakkut illoqarfiit pingaarnersaata qeqqani ammarneqarpoq.

- Aatsaat taama annertutigisumik suliniuteqarpugut, Martin Heilmann Kristensen Sermitsiamut oqarpoq.

Taanna Kammak Company ApS-imi, Nuummi Ivalu Restaurant & Barimik piginnittumi, pingaarnertut piginneqataavoq. Aningaasaliissutimi annertussusaa isertuuppaa.

Neriniartarfik nutaaq Naapittarfimmi, Aqqusinersuup Imanerullu akornanniittoq, Nuummi illoqarfiup qeqqaniippoq.

Inuit untritilippassuit Naapittarfik, Ivalu Restaurant & Bar, takujuminarluinnartoq ullut tamaasa sanioqquttarpaat. Neriniartarfik Brugsenip eqqaani illumut tungujortumik qalipaatilimmiippoq, tassanilu piffissap ilaani kalaalimineerniarfeqarsimavoq.

Europap kujasissuanitut neriniartarfeeraq Skandinaviamiutut kaffisorniartarfittalik

Ivalu Restaurant & Bar oqartussanit akuersissutinik kingulliusunik pissarsisoqareersoq pingasunngornermi septembarip 30-ani ammarneqarpoq.

Suliffeqarfik millionilikkaanik aningaasaliilluni Naapittarfik 2-mi illu nutaaliaasumik neriniartarfittut, kaffisorniartarfittut imerniartarfittullu pisatsersorpaa.

Neriniartarfimmik piginnittut tassaapput Kammak Company. Kalaallit danskillu Qaqortumi najugaqarlunilu inuussutissarsiornermik suliaqartumik siuttoqartut.

Kammak Companymi piginneqataassutit 30 procentii inuussutissarsiortunut suliaqarfimmi misilittagaqarluartunut sisamanut tunivai. Martin Heilmann Kristensenip ingerlatseqatigiiffimmi piginneqataassutit 70 procentii suli pigigamigit taamaalilluni Kammammi pingaarnertut piginneqataavoq.

Martin Heilmann Kristensen Ivalu Restaurant & Bar pillugu ima oqarpoq:

- Nuummi neriniartarfiit ima inerisagaasimatigipput nerisassat pisatsersueriaatsillu nutaaliaanerulernissaannut piareersimallutik. Neriniartarfeeqqamik Europap kujassissuamiorpalaartumik Skandinaviami kaffisorniartarfimmik nutaaliaasumik ilalimmik pilersitsivugut.

- Nunanut tamalaaneersunut naleqquppoq. Issiaviit franskisoorpalaartut kaffisorniartarfimmilu nutaaliaasumi issiaviusinnaasut nerriviillu sanasumit qisunnik sanaat atorpagut.

Aallaqqaammut unnukkuinnaq ammasassasoq

Neriniartarfik aallaqqaammut unnukkuinnaq ammasassaaq. Sulisoqarniarnerup sulisunillu ilinniartitsinerup naammassinissaata tungaanut taamaassaaq.

Kingorna ullup qeqqanut ammartalissaaq. Salatit, burgerit pizzallu ullup qeqqanut sassaalliutigineqassapput, unnukkullu nerisassiat assigiinngitsut Europap kujataamiorpasissut, soorlu pizzat pitsaasut sivisuumik nillertumi pullassikkanik qaqortuliartallit aamma sassaalliutigineqartassapput, Martin Heilmann Kristensen oqaluttuarpoq.

Illu Kommuneqarfik Sermersuup 2010-mi Nuummi kalaalimineerniarfissatut sanatitaa ukiut quliinnaat missaanni atorpoq.

Taamanimiilli illu qaammarissiamik qalialik igalaarsualillu, coronap nalaani misissortittarfittut atorneqarnera kisiat eqqaassanngikkaanni, inoqanngilaq.

Sanilit, Kalaallit Nunaanni Brugsenip, kommunip illuutaa 2022-mi neqerooruteqartitsinermi pisiaraa, pisiniarfiutileqatigiiffiulli illutaassamut pilersaarutai piviusunngortinneqanngisaannarput. Maanna Ivalu Restaurant & Bar inimik, tassa quleriit aappaanni quleriillu siullerni 250 kvadratmeterinik angissusilimmik, atuisunngorpoq. Kammak Companyp illu tamaat KNB-mit (Brugsenimit) attartorsimavaa.

Martin Heilmann Kristensen Kammak Companymi pingaarnertut piginneqataanerup saniatigut pisortaaneruvoq. Kammak Kûnguak kaffisorniartarfinni Qaqortumiittumi Sisimiuniittumilu ilaatigut ingerlatsisooreerpoq.

Kammak Sisimiuni aamma unnuisarfiuteqarpoq, Qaqortumilu aningaasaliisut peqatigalugit Qaqortumi akunnittarfissualiornissamik pilersaaruteqarpoq.

Nuummi kaffisorniartarfiup ornigarneqarluartup matunera uggornartoq

Qanittukkut Nuutoqqami Kammak Kûnuak Cafe anginngitsoq ornigarneqarluartartoq matuneqarpoq. Attartortitsisup initaa allaffinngortinniarmagu taama pisoqarpoq.

- Illoqarfiup erlinnartuutaata mikisup, illoqarfimmut iluaqutaangaarsimasup annaanera uggornaqaaq, illoqarfimmimi tamarmi takornariarpassuit Nuutoqqamut takuniaanerminni oqaluttuarisaanermi pisut akornanniitillutik nuannaarutigisimaqaat, taanna oqarpoq.

Martin Heilmann Kristensen Kammak Companymi pingaarnertut piginneqataasoq Søren Heilmann aamma Lars Christiansen upernaaq piginneqataalersimapput. Søren Heilmann Gentoftemi najugalik ilaatigut WePlayAgain-imi golfimut atortunik atornikunik tuniniaasarfimmi siulittaasuullunilu, pilersitsisuullunilu piginneqataavoq.