Visit Ilulissat pisortartaartoq
Karsten Høy Avannaata Kommuniani takornariaqarnermut siuarsaanermut ingerlatsivimmi Visit Ilulissani februaarip aallaqqaataani pisortanngorpoq.
Karsten Høy Visit Ilulissani pisortatut atorfinippoq. Saamerlermiit Visit Ilulissat siulersuisuini ilaasortat: Jan Cortzen, Bent Petersen, Laila Sandgreen. Qeqqata tungaani saamerleq: Visit Ilulissani pisortaq Karsten Høy.
Assi: Avannaata Kommunia
Avannaata Kommunia suliffeqarfimmik Visit Ilulissat-mik illoqarfiup, pilersaarutit malillugit ukioq manna kingusinnerusukkut nunanit tamalaanit mittarfittaarfissap, takornariaqarneranik ataqatigiissaarisussamik nukittorsaasumillu pilersitsivoq.
Inuussutissarsiutinik ingerlatsisoq Karsten Høy Visit Ilulissani februaarip aallaqqaataani pisortanngorpoq, kommuni nittartakkamini taama ilisimatitsivoq.
"Ilulissat nunarsuarmi immikkuullarissutut tusaamaneqartorujussuuvoq, takornariafissatut periarfissagissaarluni tamaanilu suliffissanik ataavartunik pilersitsinissamut periarfissaqarluarpoq, aamma inuusuttunut,” oqarpoq Karsten Høj, Karsten Høy, Visit Ilulissani pisortaq oqarpoq.
Karsten Høy Ilulissani peroriartortoq soorlulusooq angerlaannarluni oqaluttuarpoq:
"Angerlartutut misigisimanarpoq. Tamannalu pissutigalugu uannut pingaaruteqarluinnarpoq, ineriartortitseqqinnissami najugarisap aallaaviginissaa. Naleqarnerulersitsinermi najukkami ingerlataqaqataanertik akuersaarnartumik pissarsiaqaatigisariaqarpaat,” taanna erseqqissaavoq.
Karsten Høy inuussutissarsiornermik siuarsaanermut tunngasunik suliaqartareerpoq, Namminersorlutik Oqartussat inuussutissarsiornermik siuarsaanermut ingerlatseqatigiiffianni Nalik Venturesimi ukiuni 15-ini, 2023 tikillugu, pisortaanikuulluni.
2023-miilli ilaatigut sivikitsumik Greenland Rubymi pisortaasimavoq.
”Nunatsinni inuussutissarsiutinik ineriartortitsiniaraanni naammagittartuusariaqarpoq, oqaloqatiginnittuusariaqarluni akimullu suleqatiginnissinnaasariaqarluni. Tamanna uanga qiteralimmioraara”, oqarpoq.
