Vivian Motzfeldt ataatsimiinnerup kingorna: USA-p nunap killeqarfii ataqqissagai naqissuserparput
Nunanut allanut tunngasunut naalakkersuisup Vivian Motzfeldtip ulluni makkunani ullut ilungersunartut sivisuullu atugarai. Washingtonimi ataatsimiinneq qanoq ingerlasimanersoq Sermitsiamut oqaasinngorpaa.
Assi: Oscar Scott Carl
- Nunat tamalaat inatsisaat piusut taakkua tunngavigalugit ingerlatsinissaq soorunami pingaarnerpaatut oqariartuutigaarput. Killeqarfiit allanngutsaalisaanerat, inatsisit ullumi nunarsuarmioqatigiit, nunallu assigiimmik eqqarsartaasillit sinaakkutigisaat taakku ataqqineqassasut. Taavalu nunatta annerusumik suleqateqarnissamik ammanera, nunatut inissisimanerata annertuumik akisussaaffimmik peqartikkaatigut, Vivian Motzfeldt Washingtonimi Lars Løkke Rasmussenimik tusagassiortunik katersortitsereernermi Sermitsiamit apersorneqarnermini oqarpoq.
Vivian Motzfeldtip Lars Løkke Rasmussennillu præsidentip tullia J.D. Vance aamma USA-p nunanut allanut ministeria Marco Rubio ulllumi ataatsimeeqatigaat, tassanilu præsident Donald Trumpip Kalaallit Nunaata tiguarnissaanut kimigiisernera eqqartorneqarpoq.
Nunanut allanut tunngasunut naalakkersuisup periarfissaq tamanna atorlugu inuiaqatigiinni toqqissisimajunnaartoqarnera ataatsimiinnermi peqataasunut paasitinniarsimallugu oqarpoq.
- Ataatsimiinnermi uanga kalaaliullunga, nunatsinniillu aggerlunga, nunatsinni misigissutsit aqqusaakkagut aammalu ukiup ataatsip iluani tatineqaraluttuinnarnerup inuiaqatigiit akornanni ersinermik toqqissisimannginnermillu pilersitsisoq nalaassimanerata ataatsimeeqatigisatsinnut paasitinnissaa pingaartissimaqaara, oqarpoq.
Vivian Motzfeldtip USA-mik ataatsimeeqateqareerluni tusagassiortunik katersortitsinissamut piareersartoq.
Assi: Oscar Scott Carl
Nunat allat politikkikkut soqutigisaat pimoorunneqartut
Vivian Motzfeldtip ullumikkut ataatsimiinnermi Kalaallit Nunaat, Danmark USA-lu isumaqatigiinnissaat iluatsinngitsoq oqarpoq. Isumaqatigiinngikkaluarlutik nunanit tamanit akuerineqarsinnaasumik siunnersuuteqarpoq:
- Aaqqiissutissamik nassaartoqanngikkaluartoq taamaattoq siumut isigisinnaanerulaalernermik neriuuteqalaalernermillu pilersitsivoq. Kisianni taamatut oqareerlunga suleqatigiissitap qanoq ingerlatsiumaarnissaa, naggataatigullu aamma politikerit akornanni naapeqatigeeqqinnerit ingerlanneqartussat eqqarsaatigalugit oqaaseqarfigissallugu ajornakusoortikkakku. Kisianni nuannaarutigalugu ullumi ataatsimiinnermi inimi najuuffigisatsinni ataqqeqatigiinneq piummat aammalu tusarnaarneqaratta, Vivian Motzfeldt oqarpoq.
Nunat killermiut qanimut suleqatiginissaat Kalaallit Nunaata soqutigigaa oqaatigeqqippaa, aamma Kinamiut russillu Kalaallit Nunaanniinnerarneqarnerat USA-p oqaasii akerlilersimallugu.
- Ataatsimiinnermi Kinamiunik russinillu attaveqarnatalu suleqateqannginnerput erseqqissaatigaara, aammalu Kinamiit nunatsinnut aningaasaliisoqannginnera.
Vivian Motzfeldtip ataatsimiinnermi Kalaallit Nunaat isumannaallisaanermut politikkimut tunngatillugu soqutigisaqarnikkut tuniorarneqaannarani aammali tunniussisartoq erseqqissarpaa:
- Aamma illersornissaq pineqartillugu nunarput kisimi tigusisuunngitsoq oqariartuutigaarput. Nunarput aamma tunniussaqarmat, tassa Pituffik eqqarsaatigalugu, Vivian Motzfeldt oqarpoq.
