Canadamiut aatsitassarsiornermik ingerlatsiviat Anortech Nuup Kangerluani, Nuummit 80 kilometerit missaanni ungasitsigisumiittumi, "Qaqqami qorsummi“ taasaminni anorthositisiorfiliornissaminnik suliniuteqarpoq.
Ingerlatseqatigiiffiup pisortaata Jim Cambonip, qanittukkut Torontomi aatsitassarsiorneq pillugu nittarsaassinermi Namminersorlutik Oqartussat Greenland Day-ianni peqataasup, LinkedInimi allaaserisaani ingerlatseqatigiiffiup 2027-mi piiaanissamut akuersissummik qinnuteqarnissani naatsorsuutigineqartoq, atuarneqarsinnaavoq.
Canadamiut aatsitassarsiornermik ingerlatsiviat Anortech Nuup Kangerluani, Nuummit 80 kilometerit missaanni ungasitsigisumiittumi, "Qaqqami qorsummi“ taasaminni anorthositisiorfiliornissaminnik suliniuteqarpoq.
Ingerlatseqatigiiffiup pisortaata Jim Cambonip, qanittukkut Torontomi aatsitassarsiorneq pillugu nittarsaassinermi Namminersorlutik Oqartussat Greenland Day-ianni peqataasup, LinkedInimi allaaserisaani ingerlatseqatigiiffiup 2027-mi piiaanissamut akuersissummik qinnuteqarnissani naatsorsuutigineqartoq, atuarneqarsinnaavoq.
AnorTechimi pisortaq Jim Cambon Hudson Ressourcesimi, Kangerlussuup eqqaani White Mountainimit anorthositimik piiaanissamut akuersissutaateqartumi, siusinnerusukkut pisortatut atorfeqarnikuuvoq.
Assi: Trine Juncher Jørgensen
Kalaallit Nunaanni ukiuni 25-ngajanni misilittagaqartoq
Pisortaq Jim Cambon Kalaallit Nunaanni aatsitassarsiornermik piiaanermillu ukiuni 25-ngajanni misilittagaqarpoq.
Hudson Ressourcesimi 2007-imiit 2024-mut sulivoq, taannalu Kangerlussuup eqqaani White Mountainimit anorthositimik piiaanissamut 2015-imi akuersissummik tunineqarluni.
Jim Cambonip Nuup Kangerluani aatsitassarsiornissamut akuersissut sulissutiginiarlugu White Mountainimi suliniummi 2024-mi piginneqataajunnaarpoq. Nuup Kangerluani annertuumik minguitsumillu anorthositimik suliffeqarfimmiit nassaarfigineqarnikuuvoq. Sumiiffimmi ujaqqanik aserorterilluni piaasoqarnissaa sulissutigineqarpoq, tassa akuutissanik imermillu atuisoqassanani.
Piiaanissamut akuersissummut qinnuteqarneq
Jim Cambon naapertorlugu suliffeqarfiup misileraaffik qaartiteriffigeqqammerpaat, tullinnguuttorlu tassaavaoq aatsitassanik qillerinissaq, naatsorsuutigineqarporlu ukioq manna aallartinnissaa.
- Avatangiisinut sunniutaanik naliliineq pisuussutillu suussusersineqarnerat naammassineqareerpata 2027-mi piiaanissamut akuersissummik qinnuteqarsinnaaneq naatsorsuutigaarpoq. Suliami tassani nunaqartut tusarniaaffigineqarnerat qitiussaaq, Jim Cambon paasissutissiivoq.
Assartuineq unammilligassaasoq
Ingerlatseqatigiiffiup issittumi silarluttarneranilu sulinerat unammilligassaqanngilaq, assartuinermiinnermiipporli.
- Silap allanngorarnera unammilligassaanngilaq, atortunik inuillu akikitsumik sumiiffimmut tassungalu assartuinissaq ajornakusoortuuvoq, Jim Cambon oqarpoq.
Canadamiut suliffeqarfiutaat Anortech Kalaallit Nunaanni aatsitassarsiornermik ingerlatsisut pingajuattut anorthositimik piiarusupput. Greenland Anorthosite Mining Qeqertarsuatsiaat avannaata kangiani Piiaaffik Itersarmiut Allerni anorthositimik piiaanissamut akuersissummik 2025-mi tunineqarpoq, aamma 2015-imi Lumina Sustainable Materials Kangerlussuup eqqaani White Mountainimit anorthositimik piiaanissamut akuerineqarpoq.
