Kommunini marlunni borgmesterit raajaleriffitik pillugit ilungersorput

Kalaallit Nunaanni politikkikkut inuussutissarsiornermilu amerlasuunut kalluaasoq isumaqatigiinneq sapaatit-akunnerini makkunani pivoq.

Avannaani borgmesterit marluk kommunalbestyrelsiisalu fabrikkit marluk raajanik aalisakkanillu tunisassiortut matuneqarnissaannik pinngitsoortitsiniaallutik sapaatip-akunnerini makkunani ilungersorput. Fabrikkit taakku illoqarfinnut marlunnut kommuninullu inuussutissarsiorfiupput.

Kommune Qeqertalimmi Avannaata Kommunianilu kommunalbestyrelsit borgmesterillut Simigaq Heilmann (D) aamma Lars Erik Gabrielsen (S) siuttoralugit akerliupput.

Kommunini taakkunani marlunni politikkikkut siuttut Naalakkersuisut Inatsisartuillu Ilulissani Aasiannilu raajaleriviit aalisakkeriviillu matunnginnissaat anguniarlugu politikkikkut aaqqiissutissamik nassaaqqullugit ersarissumik kajumissaaripput.

Gabrielsen: - Aasianni ingerlatsinerlunneq

- Ilulissani suliffissuaq politikkikkut matuniarneqarnera unitsilli.

Avannaata Kommuniani borgmesteri Lars Erik Gabrielsen, Siumut, kommunip nittartagaani avannaata.gl-imi allappoq.

Borgmesteri ima nangippoq:

- Aasianni aalisakkerivimmi ingerlatsinerlunneq Ilulissanit annaanneqassanngilaq.

Raajanik aalisakkanillu tunisassiornermik ingerlatseqatigiiffiup Polar Raajat siulersuisuisa Aasianni suliffissuup matuneqariaannaanermik aarlerinartoqarnera nalunaarutigereeraallu Lars Erik Gabrielsenip ”Ilulissani politikkikkut matusiniarsarinerit” unitsinneqarnissaat nalunaarutigaa.

Polar Raajat aalisarnermik ingerlatsisunit namminersortunit, Polar Seafood Greenlandimit aamma Polar Seafood Denmarkimit, pigineqarpoq.

- Suliffissuaq matuneqarpat sulisut 115-it suliffitsik annaassavaat. Taamaammat politikikkut ataavartumik aaqqiissuteqartoqanngippat, tunisassiassat killeqarmata aningaasatigut ingerlatsilluarsinnaannginnatta, 2026-mi ukiakkut suliffissuaq ataavartumik matusariaqassavarput.

Polar Raajat siulersuisuini siulittaasoq Bent Salling Sermitsiami februaarip qulingani saqqummersumi oqarpoq.

Namminersorlutik Oqartussanit pigineqartup Royal Greenlandip Ilulissani tunisassiorfiata raajanik tunisineq unitsikkallarnissaa  piffissaq ungasinnerusoq eqqarsaatigalugu aaqqiissutaasinnaasoq Polar Raajat isumaqarput.

Bent Salling: Polar kommunilu sukataarput

Bent Salling Kommune Qeqertalimmi kommunalbestyrelsimik sapaatip-akunnera sioqqullugu  ataatsimeeqateqareerluni, tassa februaarip qulingani, kommuni Aasianni tunisassiorfiup matunnginnissaa anguniarlugu Polaritut aaqqiissutissamik nassaarniarluni  (Naalakkersuisunut aaqq.) sukataartoq oqarpoq.

Tamanna borgmesterip Lars Erik Gabrielsenip paasilluarsinnaavaa, Ilulissanili matusisoqarnissaa akigineqassanngippat:

- Polar Seafoodip Aasianni fabrikiani suliffiit 115-it ulorianartorsiortinneqarnerat ilungersunarpoq, soorlu tamanna ersertoq.

- Suliffeqarfiulli namminersortunit pigineqartup Polar Seafoodip nammineq aaqqissuussaanermigut niuernikkullu unammilligassaqarnini pissutigalugu aalisakkerivimmik tassanngaannaq matusisariaqalernini politikkikkut akisussaaffinngortinnissappagu ilungersunarneruvoq.

- Sermitsiamilu allassimaneratut aaqqiissutissaq tassaavoq Ilulissani inuiaqatigiit suliffissuata ingerlalluartup matunissaa, Lars Erik Gabrielsen nangippoq.

Ilulissani suliffissuaq Royal Greenlandimit pigineqarpoq, taamaasillunilu innuttaasunit pigineqartoq borgmesterip tikkuarpaa.

- Ilulissat illoqarfiuvoq ukiuni qulikkaani arlalippassuarni aalisartoqarfiusoq, aalisartut angerlarsimaffigalugu nunaqavissut kilisaatinik mikinerusunik atortulerlutik aalisarnerminni aallaavigisaat.

- Raajaleriffik raajanik patajaatsumik tulaassuivigiuarpaat, politikkikkut aalajangiinerit tunngaviginagit, kisianni tunisassiassat pinngortitami tulaassorneqartut tamaaniimmata.

Aamma aalisartut Aasiannut tuniniaanissamut periarfissaqarluarnerat nassuerutigaa.

- Taamaaliunngillat. Politikkikkut pissuteqanngitsumik, kisianni umiatsiaat, kiffartuussiviit, sannaviit inuussutissarsiornermilu attaveqaatit Ilulissaniimmata. Politikkimut tunngassuteqarnani niuernerup aalajangertarpaa. Royal Greenland Ilulissani raajaleriffimminik matusissagaluarpat tunisassiat nungussaanngillat. Najukkami aalisartut raajaleriffimmik nutaamik namminneerlutik pilersitsissallutik oqariartuuteqareerput. 

- Kinguneri assigiiginnassapput. Raajat Ilulissani tulaanneqartartuaannassapput, taamaattumik politikkikkut akuliuttoqaraluarpat Aasiaat tunitsivissarsiornermi ajornartorsiuteqalertuassaaq.

- Politikkikkut Ilulissat sanngiillisinneratigut Aasianni aalisakkerivik pilerinartunngortinneqarsinnaasoq isumaqaraanni, tamanna sianiilliornerullunilu akisussaaffeqanngitsuliorneruvoq, Lars Erik Gabrielsen isumaqarpoq.

Ilulissani tunisassiorfik aningaasanik isaatitsilluartoq

Ilulissani Royal Greenlandip raajaleriffia nunami ingerlalluarnerpaat isertitaqarnerpaallu ilagigaat naqissuserpaa.

- Royal Greenland aningaasatigut unammilligassarpassuaqareersoq uppernarsarluarneqareernikuuvoq. Aalisakkerivimmik ingerlalluartumik sinneqartooruteqarfiusumillu matusinikkut ingerlatseqatigiiffissuup aningaasaqarnera pitsanngortinneqarnavianngilaq, ajornerulersiinnassavaa. Naggataatigut tamanna inuiaqatigiit aningaasaqarniarnerannut pitsaanngitsumik sunniuteqassaaq.

Polar Seafoodip Aasianni Polar Raajat tunisassiorfiata ingerlaannarnissaa qulakkeerusukkuniuk, imminut qiviartoqartariaqartoq oqarpoq.

- Assersuutigalugu Nuummi aaqqissuussinermik salliutitsitaqarsimanini isumaliutigisinnaavaa, sumiiffinni allani ingerlatseqatigiiffiup pisortanit pigineqartup pitsaasumik ingerlanneqartut matunissaannik piumasaqanngikkaluarluni.

- Oqallinneq illoqarfiit akornanni aaqqiagiinnginninngortillugu pikkunaallisinniarneqartariaqanngilaq. Apeqqut tunngaviusoq uaniippoq, inuiaqatigiit pigisaat ingerlalluartoq aalisakkerivik sinneqartoorfiusoq sanngiillisissavarput, suliffeqarfiup namminersortunit pigineqartup piffissaatillugu ingerlataminik tulluarsaasimannginnera pissutigalugu?

- Akissut ersarippoq, Lars Erik Gabrielsen oqarpoq.

Ima naggasiivoq:

- Tunisassiassat aalajangiisuupput. Inuussutissarsiornermik ingerlatsinerup tunisassiassat malittarai. Tamatuma politikkikkut allanngortinniarsarineqarnera Ilulissani aalisakkeriviup matuneqarneratigut kukkuneruvoq, uungaannaq isigineruvoq inuiaqatigiillu aningaasaqarniarnerannut ajoqutaassalluni.

Qeqertalik: Ilaqutariit pilersuisinnaanerminnut tunngavitsik annaassavaat

Kommune Qeqertalimmi borgmesteri Simigaq Heilmann, Demokraatit, aamma akerliuvoq. Kommunip ajornartorsiornerani Naalakkersuisut Inatsisartullu politikkerinut iliuuseqaqqusivoq.

Ilaatigut Polar Raajat Aasianni raajaleriffimmik aalisakkeriviillu matusinissamik sulisunillu 115-inik ukiap ingerlanerani soraarsitsinissamik nalunaaruteqarsimanerat, suliffeqarfiullu suliffissuup ataannarnissaanik piffissaq ungasinnerusoq eqqarsaatigalugu politikkikkut aaqqiissutissamik ujartuisimanera pissutaavoq.

Kommunip nittartagaani Qeqertalik.gl-imi ima allappoq (aviisimi matumani isummersuutaa ilaavoq):

- Siornatigut oqariartuutigereernikuuara Inatsisartut Naalakkersuisullu politikikkut piumassuseqarlutik nuna tamaat ineriartortinnissaanut akisussaaffimmik tigusisariaqartut.

- Maanna aperisariaqarpunga Inatsisartunut aammalu Naalakkersuisunut; nunatsinni inoqarfiit minnerusut sumunnaanniarpisigit? Ernumavunga isorliunerusuni kommunini siunissarput pillugu, borgmester allappoq.

Aalisarnermut inatsit nutaaq pissutigalugu Aasianni ilaqutariit amerlanerusut inuussutissarsiutiminnik annaasaqarnissaat suli aarlerinarnerusoq ilaatigut tikkuarpaa.

- Assersuutissaqqippoq peqqinnissaqarfitta aningaasanik atuivallaarujussuarnerata kingunerisaanik nunatsinni isorliunerusuni peqqinnissaqarfinnik sisamap kingorna matusisalerneranut Kommune Qeqertalik eqqugaammat.

Aasiaat illoqarfimmilu ilaqutariit imminnut pilersortut amerlasuut maannakkut nalorninartorsiorneruleriartortut, tamannalu Kommune Qeqertalimmi tamarmi annertuumik kinguneqarsinnaasoq aamma allapoq.

Borgmesterip Naalakkersuisunut Inatsisartunullu aamma Polar Raajamut oqariartuutaa imaappoq:

- Nunamili raajanik tunisassiornermut aaqqissuusseqqittoqartariaqartoq isumaqarpugut.

- Kommune Qeqertalimmi pissutsinut nalorninartorsiorfiusunut aaqqeeqatigiinnissamut, neriuutigaara Inatsisartut Naalakkersuisullu akuersaarlutik akisussaaffimmik tiguseqatigiinnissamik pisariaqarluinnartumik oqariartuuteqarnermut qisuariarumaartut, Simigaq Heilmann allappoq.

Sermitsiap borgmester Simigaq Heilmann apersorumallugu saaffiginiaarsimangaluarpaa, akineqarnani.