Mittarfiit nutaat takornariaqarnermik siuarsaasimapput, tamannalu unnuisarfinnik, bussinik aamma angallatinik angallassisartunik amerlanerusunik kinguneqarsimallutik.
Nuummi mittarfik nutaaq 2024-mi novembarip 28-anni ammarneqarpoq, Qaqortumilu mittarfik nutaaq 2026-mi apriilip 16-ianni ammarneqarluni. Inuussutissarsiummi tamatumani Nuummi aamma Qaqortumi sammisaqartitsisoqarnerulernera erseqqissumik takuneqarsinnaavoq.
– Nuummut takornariartartut amerlanerulerput. Timmisartut amerlanerusut takornarianik Nuummi sivisunerusumik uninngasussanik ilaasoqarlutik angallassisalerput. Soorunami tamanna pingaartumik takornariarfiunerpaaffiani pisarpoq, kisianni aamma takornariarfiunnginnerani ulapinnerulerpugut. Aap, ukioq kaajallallugu suliassaqarnerulerpugut, Nuummi takornarialerisut ilaat Ivik Knudsen-Ostermann Greenland Cruises-imeersoq oqarpoq.
Taassuma oqaatigaa, suliffeqarfiit takornarialerisut amerliartuinnartut, umiatsianillu angallassisartut angallatinik takornarianik angallassissutinik amerlanerusunut aningaasaliisartut.
- Kikkunnut tamanut naammattunik sullissassaqarpasippoq, Ivik Knudsen-Ostermann nangilluni oqarpoq.
Greenland Cruises 2020-mi angallammik takornariartaammik siullermik pisivoq, maannalu arfinilinnik angallassissutaateqarluni.
Angallat nutaanerpaaq tassaavoq Targa 44, ukioq manna Nuummut tikittuni annersaasoq. Taanna arlaleriarluni attartorneqarluni Sisimiunut angalasareerpoq, Kujataani ulluni arlalinni attartorneqarluni angalasareerluni maannalu Ilulissaniilluni.
Umiarsuaq takornariartaat tassaavoq Silver Wind umiarsuarnik takornariartaatinik ingerlatseqatigiiffimmit Silverseameersoq. Greenland Cruisesimi pisortaq Ivik Knudsen-Ostermann aasaq manna ulluni qulini umiarsuarmi angalaqataavoq. Greenland Cruises 2013-imi angallassisaleqqaarmalli Silversea sullinneqartuartarpoq.
Assi: Greenland Cruises
Umiarsuarnik takornariartaatinik takornariartitsisarneq Greenland Cruisesimut pingaarnerpaasoq ilanngullugu oqaluttuaraa, taamaaliunngikkunimi angallatit takornariartaatit taama amerlatigisut pigisinaassanngikkaluaramigit sulisullu taama amerlatigisut sullisorisinnaassanngikkaluaramigit.
Ineriartorneq uppernarsarneqartoq Sulisitsisut suliffeqarfiit amerliartorsimanerannik kisitsisinik uppernarsaatissaqanngikkaluarlutik, suliffeqarfiit amerliartornerat uppernarsarpaat.
Sulisitsisut ingerlatseqatigiiffiit ataavartumik oqaloqatigisarlugillu attaveqaqatigiittarfii aqqutigalugit malinnaavigisarpaat.
Takornariartitsinermik suliaqarneq soqutigineqaleraluttuinnartoq Sulisitsisut aammattaaq maluginiarpaat.
Aamma mittarfittaarneq pissutigalugu siornatigutut aasaanerani Nuummi takornariartartut ikippallaarunnaarput.
Maannami sumi tamaani takornariarpassuaqartarpoq.
– Sinerissalli attaveqaqatigiinnermut qanoq ataqatigiissinnissaa ernummatigaarput, takornariaqarnerummi ineriartortinnissaanut nuna tamakkerlugu pilersaarusiortoqarpasinngilaq, Sulisitsisuni pisortaq Christian Keldsen oqarpoq nangillunilu:
- Takornarialerinerup nuannersortaa tassaagami aallartitsinissap ajornannginnerusarnera.
Suliffiit amerlanersaanni piginnaasaqarnissaq piumasaqaataanngilaq, soorlu kukkunersiuisuugaanni ilinniartitsisuugaanniluunniit.
Assersuutigalugu illoqarfimmi takornariartitsisarnermik angerlarsimaffimmilu kaffisortitsinermik neqerooruteqarsinnaavutit.
Allat aallarnisaanissaminnut aningaasanik pisariaqartitsisarput, soorlu illuaqqanik, qaannanik, bussimik, umiatsiamik assigisaannillu pisinissaminnut. Takornarialerinissamulli periarfissarpassuaqarpoq. Soorlu suliffiup saniatigut aallartitsisoqarsinnaasarpoq.
Tassa sunngiffimmi takornariartitsisoqarsinnaalluni, piffissallu ingerlanerani tamakkiisumik takornariartitsisartunngortoqarsinnaalluni. Sulisitsisut taamaattunik arlalinnik assersuutissaqarpoq.
Sulisitsisut takornarialerinermik ingerlatsisut nutaat malugisinnaaneraat aperineqarami Christian Keldsen ima akivoq:
- Assigiinngitsunik ingerlataqartunik arlalinnik Ilaasortaqarpugut, ilaatigut takornariartitsinermik ingerlataqartunik.
– Suliffeqarfinnik aallartitsisut oqaloqatigilluartarpavut, amerlasuulli suli ilaasortaanngillat. Aaqqissuusseqqinnitsigulli takornariartitsisartut maanna Kiffartuussisartut Angallassisartullu peqatigalugit ingerlatseqatigiinni ataatsimoortippavut, tassanilu sulinermi pitsaasumik sunniuteqarluartarluta, nassuiaavoq.
Christian Keldsen, Sulisitsisut: - Takornarialerinermi neqeroorutigineqartartut assigiinngitsorpassuit takusinnaavavut. Tamanna uppernarsarneqarsinnaanngilaq tamakku naatsorsorneqarsimanngimmata, ilaasortavulli qanoq ingerlanertik pillugu paasissutissiilluartarput.
Assi: Oscar Scott Carl
Sulisut amerliartortut Takornariaqarnerulernera takornariartitsisartut assigiinngitsut kaaviiaartitaannut, isertitaannut suliffissanullu sunniuteqartorujussuuvoq.
Tamatumani Greenland Cruises assersuutissaalluarpoq.
Nuummi mittarfik nutaaq pilersinneqanngikkallarmat angallatinik angallassisarnerup naalernerani angallatini naalagaasussat inuttaasussallu taama amerlatigisut pisariaqartinneqartanngikkaluarput.
Mittarfiliortoqareerneratali kingorna takornariartoqarnerpaaffiup naalernerani Greenland Cruisesip sulisumi ilaannik angerlartitsisariaqartarsimanngilaq.
- Soorunami angallassiffiunnginnerani angallassiffiunerpaaneranut sanilliullugu angallassinerit ikinnerusarput, taamaattorli naammattumik angallassassaqartarmat sulisut aalajangersimasut nalunaaquttallu akunnermusiallit tamaasa sulisiinnarsinnaasarpavut, pisortaq oqaluttuarpoq.
2020-mi ukioq kaajallallugu angallassisartut marluusut, maanna 16-iupput, taartaasartut, allaffimmiut pisortarlu ilanngullugit.
Umiarsuarnut takornariartaatinut sunniuteqartoq Nuummi mittarfiup nutaap kingunerisaanik umiarsuit takornariartaatit ilaasuminnik Nuummi taarsiisarnerat aamma annertusiartuinnarpoq. Siornatigut Kangerlussuarmi taamaaliortarput, maannali umiarsuaq tamaanga tulassinnaammat, Nuummi taamaaliorusunnerusarlutik.
Norgemiut umiarsuaat Hurtigruten 2025-mi takkuteqqippoq, maannalu Kalaallit Nunaanni ilaasuminik taarsiisarluni, Kangerlussuarmili taarsiineq psarunnaarluni Nuummi pisarluni.
Umiarsuaatileqatigiiffiilli ilaasa Kangerlussuaq suli toqqarusunnerusarpaat, tamaani sila allanngorannginnerusarmat.
– Taakku Nuummi ilaasuminnik taarsiisalertinnatik piffissaq takoqqaarusuppaat, Greenland Cruises-imi umiarsuarnik takornariartaatinik aamma kiffartuussisartoq Ivik Knudsen-Ostermann naliliivoq.
- Umiarsuilli takornariartaatit ilaasa Kangerlussuaq atuinnarusuppaat, iluatsilluartarnera sungiusimagamikku. Kangerlussuarmi ukiorpassuarni taamaaliortoqartarsimavoq, oqarpoq nangillunilu oqarluni nunanit allanit takornarialerisut amerlanerusut Nuummi allaffeqalersartut takusarlugit, mittarfik nutaaq umiarsuarnillu takornariartaatinik angallassinerup annertusisimanera pissutigalugit.
- Tamanna nunaqavissunut angallassisartunut ajornartorsiutaavoq, taakkumi niuernerminnik annertusaasinnaasariaqaraluarmata kaaviiaartitaqarnerulerlutillu, tikkuaavoq.
Takornariat Maniitsumi oqaluffimmi kalaallit erinarsoqatigiivinik tusarnaartut.
Assi: Greenland Cruises
Inuiaqatigiinnut sunniuteqartoq Takornariaqarnerulernera inuiaqatigiit nammassinnaagaat, Ivik Knudsen-Ostermann isumaqarpoq.
– Nuummi illoqarfinnilu annerni unnuisarfippassuaqarpoq. Ilulissani ajornartorsiuteqalaarpoq, ingammik silarlukkaangat timmisartullu teknikikkut ajoquteqaraangata takornariat illoqarfimmit timmisartuunneqarsinnaanngikkaangata.
Taassuma ilisimatitsissutigaa Ilulissani angallatinik ingerlatsisut ilaat Air Greenlandimut aasakkut angallassisartut, ilaasut arlaannik pissuteqarlutik Ilulissanit aallarsinnaanngitsut imaluunniit unnuiffissaaruttut angallallugit.
Umiarsuit takornariartaatit eqqarsaatigalugit illoqarfiit mikinerusut nunaqarfiillu immaqa sapersartitaasutut misigisarput, tassa umiarsuarujussuaq 1000-it tikillugit ilaasoqarsinnaasoq tikittoq takugaangamikku. Soorlumi tamanna Ilimanami, Ilulissanit 10-15 kilometerinik kujasinnerusumiittumi aasat tamaasa pisartoq.
Akunnittarfiliortiternerup attaveqaasersuutinillu ineriartortitsinerup takornariaqarnerulernera sumiiffinni amerlanerni piffissap annersaani malinnaaffigisinnaagaa, Ivik Knudsen-Ostermann isumaqarpoq.
- Ilulissani taamaallaat takornariaqarnerpaaffiup nalaani siniffiit amigaataasarput, unnuisarfiillu nutaat sanaartorneqarnissaat sukkanerusinnaasoq, Ivik Knudsen-Ostermann tikkuaavoq.
Mittarfik aaqqiivigineqarli Politikerit Nuummi mittarfik pillugu piaartumik iliuuseqaqqullugit taassuma kajumissaarpai.
– Nuummi mittarfik piffissami sivisuumi ammareerpoq, taamaattorli suli ajornartorsiuterpassuaqarluni timmisartuussinernik akornusersuisunik, ilaatigut isumannaallisaanermi allatigullu ajornartorsiutit pissutigalugit. Nunanit tamalaanit mittarfiuvoq ingerlalluartariaqarlunilu. Politikerit piaartumik iliuuseqartariaqarput, sukkanerusumik eqqortumut ingerlasoqarsinnaaqqullugu. Kalaallit Nunaata tusaamaneqarneranut ajoqutaasarpoq, mittarfittaarpummi timmisartunik itigartitsisariartarpoq isumannaallisaasutut sulisut naammanngimmata, Greenland Cruises-ip pisortaa oqarpoq.
Ilulissani mittarfik nutaaq ammarpat qanoq pisoqassasoraajuk?
– Apeqqut taanna pingaaruteqarpoq. Ilulissanut aamma Ilulissanit timmisartuunneqartussanut pitsaanerpaamik pisoqassasoq neriuppunga. Greenland Airports Nuummi kukkussutigineqartunik ilikkagaqarsimassasoq neriuppunga. Aammattaaq pingaaruteqarpoq takornariat Avannaani ingerlaqqissinnaanissaat unnuiffissallu amerlanerulernissaat. Maannakkut siniffiit amerliartortinneqartariaqarput, Ivik Knudsen-Ostermann oqarpoq.
Takornariat Sisimiuni Sømandshjemmemi imaluunniit Hotel Søma-mi Kalaallit Nunaannik mamarsaatiginnipput.
Foto: Greenland Cruises
Ineriartorsinnaaneq ilappanaateqartoq Sulisitsisut qanittukkut tamanut saqqummiussinerattut mittarfiit ineriartortinnissaannut periusissiat inuussutissarsiornermut periusissianut allanut naapertuutinngillat, tassani takornariartitsinermut inuinnaallu pigisaannik piginnissinnaanermut inatsisitigut killilersuinerit kinguneqavissumik kinguneqarsimapput – maannalu aamma mittarfiit naatsorsuutaannut, Sulisitsisut naliliipput.
– Ingerlatseqatigiiffiit takornariaqarnermut inatsimmit nutaamit akornusersorneqartut immikkut akuersissummik pisariaqartitsisut aalajangiisoqarnissaanik suli utaqqisut aamma takusinnaavavut. Tamanna aningaasaliinissamut kajuminnerulersitsinngilaq, aamma ingerlatseqatigiiffinnik matusisunik allamillu ingerlatsilersunik assersuutissaqarpugut, assersuutigalugu assartuinermik, immikkut akuersissuteqarnerup nalorninartorsiortitsineranik ingerlatitseqqiinnarnissamik silatusaarnerusumik, Christian Keldsen oqarpoq.
– Taamaattumik maluginiarparput soqutiginninneq annertusiartortoq, periarfissaqarporli suli amerlanerusunik. Taamaakkaluartoq isumarput erseqqippoq mittarfiit ineriartornissamut tunngavissaalluartut pitsaasullu, aamma neriuutigaarput piffissap ingerlanerani sinaakkutissat naleqqussarumaarlugit ilimagisanut naapertuuttunngortinniarlugit. Nunatut taamaaliortariaqarpugut, Christian Keldsen Sulisitsisuneersoq erseqqissaavoq.
Ineriartorneq Naatsorsueqqissaartarfiup paasissutissaataasa takutippaat Nuummi mittarfik 2024-mi novembarip 28-anni ammarneqarmalli takornariat amerliartorsimasut. Kisitsisit 2026-mut tunngasut suli takusinnaanngilavut.
Skema 1
Akunnittarfik
Skema 2
Timmisartoq
Skema 3
Takornariartaatit
Naatsorsueqqissaartarfiup kisitsisaatai pillugit Christian Keldsen, Sulisitsisuneersoq ima oqarpoq:
- Takornarialerinermi suliniutit assigiinngitsorpassuit maluginiarpavut. Tamanna uppernarsarneqarsinnaanngilaq, tassami uuttortarneqarsinnaanngimmata, ilaasortavulli qanoq ingerlanertik pillugu paasissutissiilluartarput.
- Kisitsisit atuaraangatsigit takornariat amerliartornerat takusinnaavarput, aamma qularnanngilluinnarpoq takornariat misigisassarsiorniarlutik piumasamittut misigisaqartartut.
– Aamma ilaasortat amerlanerusut sulinerminnik annertusaasut takusinnaavavut, tamannalu sulisussanik pisariaqartitsineq eqqarsaatigalugu erserpoq. Ingerlatsinerni tamakkunani sulisut amerlanerusut pisariaqartinneqarput, tamannalu piffissamik atuiffigisorujussuuarput, Christian Keldsen oqarpoq.
