Naalakkersuisut nersualaarneqartut

Naalakkersuisut Kitaani Tunumilu qaleralittassiissutit saarullittassiissutillu aalisartunut soqutiginnittunut ukioq manna neqeroorutiginiarlugit aalajangernerat nuannersunik oqaasertalerneqarpoq.

Sulisitsisut aamma Inatsisartuni aalisarnermut piniarnermullu ataatsimiititaliami ilaasortanit nuimasunit nuannersumik oqaasertaliipput.

Allatut oqaatigalugu Naalakkersuisut nersualaarneqarput.

Naalakkersuisut aalisakkat pisassiissutit ilaat Aasianni Polar Seafoodip tunisassiorfianut aalisartunit tunineqartarnissaat tunineqartassasut aalajangerpaat. Suliffeqarfissuup tunisassiassanik pilersorneqarnera qulakkeerniarlugu taamatullu suliffissat annaaneqannginnissaat matumani siunertarineqarpoq.

- Naalakkersuisut Aasianni suliffeqarfissuup attatiinnarnissaanik suliniuteqarnerat nuannaarutigaarput.

- Naalakkersuisut maannakkut iliuuseqarnissamut siunnersuuteqarnerat iluaqutigaarput, taamaalillutik suliffeqarfiit uagutsinnut ilaasortaasut maannakkut aalajangersimasumik tunngavissaqalerput.

- Suliffeqarfinnik pissutsinut nutaanut maanna atuuttunut naleqqussarsinnaasunik, allannguinissamullu piareersimasunik pikkorissunik ilaasortaqarpugut.

Sulisitsisut Qeqertarsuup Tunuani immikkoortortaqarfiani siulittaasoq Søren Hansen oqarpoq. Aasianni najugaqarlunilu suliffeqarpoq.

Sulisitsisut Nuummi qullersaqarfianni pisortaq Christian Keldsen aamma oqaatsinik kusanartunik nersualaarinnippoq. Naalakkersuisut nunami suliffissarpassuarnik qulakkeerinninniarnerat pitsaasutut akisussaassuseqarnertullu taassuma oqaatigaa.

- Nuna tamakkerlugu ineriartornerup inuussutissarsiutillu assigiinngitsut, inoqarfiit ineriartorneranni piunissaannullu politikkikkut sammineqartuarnissaq pingaaruteqarpoq.

- Aasianni suliffissuaq inuit 100-t sinnerlugit sulisoqarpoq. Suliffeqarfissuarlu illoqarfimmi sumiffinni allani suliffissaqartitsisuuvoq. Oqaatigilluaannarlugu suliffeqarfissuaq matuneqarpat, allamillu naleqqiunneqarsinnaasumik pilersitsisoqanngippat, illoqarfimmi innuttaasut affaat ataallugit toqqaannartumik eqqorneqassapput. Ilaqutaasut illoqarfimmilu atuisut ilaalu ilanngullugit.

- Piginnittut nuunneqarnissaat aalisarnermilu piginneqataanerup siammarternissaat eqqartorneqartarput, suliffissalli pilersinneqartut pingaarnertut eqqarsaatigineqartariaqarput, oqarpoq.

Pisassiissutit agguaanneqareerpata Aasianni tunisassiorfimmi suliffiit annaanneqarsinnaasut, Inatsisartuni aalisarnermut, piniarnermut nunalerinermullu ataatsimiititaliami ilaasortat marluk isumaqarput.

- Aasianni suliffiit annaanneqarnissaat iluatsissasoq soorunami neriuutigaara. Kommune Qeqertalimmi borgmesteriugallarama aalisarnermut inatsisissatut siunnersuutip tusarniaassutigineqarneranut atatillugu ernumassutigisannik oqaaseqarnikuuvunga, taamatullu isummernera aalajangiusimajuarpara, Inatsisartuni aalisarnermut, piniarnermut nunalerinermullu ataatsimiititaliami ilaasortaq Ane Hansen, IA-meersoq oqarpoq.

NapãtôK’ nuannaarpoq

Taassuma ataatsimiititaliami suleqataata,  illuatungiliuttunit Naleqqameersoq, Jens Napãtôp Aasianni suliffinnik annaassinissamut iluaqutaasinnaasumik aaqqiissutissamik nassaartoqarnera nuannaarutigaa.

- Sulisunut, aalisartunut inuiaqatigiinnullu tamanut pingaaruteqarpoq. Siunissaq ungasinnerusoq eqqarsaatigalugu aaqqiissutissamik suliniuteqartoqassasoq neriuppunga, taamaalilluni inuussutissarsiornermut suliffeqarfissuarmillu isumalluuteqartunut toqqissisimanermik patajaassusermillu pilersitsisoqassammat. Aaqqiissutit tamatigut atorsinnaasut pisariaqartippavut, aamma siunissaq ungasinnerusoq eqqarsaatigalugu ineriartornermik suliffissanillu qulakkeerinnissinnaasut.

- Pisassiissutinik neqerooruteqarnermut peqataasunut pitsaasunik eqqortunillu aaqqiissutissarsiortoqarumaartoq aamma neriuutigaara, taamaalilluni peqataasut tamarmik naapertuilluartumik ataqqinnippaluttumillu pineqarnissaat qulakkeerneqassammat, oqarpoq.

Qanimut suleqatigiinnerulernissaq ujartorneqartoq

Bolethe Hendriksen,  Aasianni akerliussutsimik takutitsinermut marsimi aaqqissuussisoq, kommuniminni innuttaasut tamarmik fabrikkip matuneqannginnissaanik akisussaaqataarusuttut Sermitsiamut oqarpoq. Taamaakkaluartoq kisimiittutut misigaat.

- Inuppassuit ikiuukkusupput, ilaannikkulli kisimiittutut misigisarput. Inuit allannguinissamut piumassuseqartut nukissaqartullu ikiorneqarnissartik aamma pisariaqartittarpaat. Qanimut suleqatigineqarnissaq amigaatigaarput.

- Aasianni eqqaanilu umiatsiaararsorlutik aalisartut arlallit Polar Raajat suleqatigalugu aaqqiissutissarsiortut nalunngilara. Oqaloqatigiinneq periarfissaasoq, taamaattorli ataqatigiissarluarneqarnissaa, ataatsimullu suliniuteqarnissaq pisariaqartoq tamatuma takutippaa.

Taasumali qinikkat ersarinnerunissaat oqallinnermilu peqataanerunissaat amigaatigaa.

- Aalisarnermut inatsisip siullermeerneqarneraniilli oqaaseqartartut erseqqissunik oqariartuuteqarnissaat amigaatigaara. Naalakkersuisut siulittaasuat Jens-Frederik Nielsen siornatigut oqallinnermi ersarissumik oqaaseqartarpoq, maannamulli suli tusarfiginatigut.

Taassuma siunissami qanoq pisoqarumaarneranik akissuteqartoqarnissaa amigaatigaa.

- Polar Raajat tunisassiorfia ingerlaannassappat Aasiannut kommunimullu qanoq kinguneqassava?

- Suliffiit qassit pineqarpat?

- Kommune Qeqertalimmi kaaviiaartitanut ineriartornermullu qanoq sunniuteqassava?

- Aalisarnermut Naalakkersuisoq Peter Borg qaqugu tikiutissava?