Filmiliaritittartoq Brigitte Bardot toquvoq
Brigitte Bardot 22-nik ukioqarluni nunarsuarmi tusaamaneqalerpoq. Filmiliarittartuunermi kingorna uumasunik illersuisunngorpoq.
Brigitte Bardotip uumasunik politikikkut akersuunneranut ilaatigut Canadami puisaaqqanik toqutsisarneq ilaapput. Akerliuniarnermut tunngasumik eqqartuisarneq inuussutissarsiummut tamarmut sunniuppoq, Kalaallillu Nunatsinni piniartunut aningaasarpassuarnik naleqarluni.
Assi: Charles Platiau/Reuters/Ritzau Scanpix
Franskeq isiginnaartitsisartoq Brigitte Bardot
toquvoq. 91-nik ukioqarluni toquvoq. Taama Brigitte Bardotip Aningaasaateqarfia
sapaammi nalunaaruteqartoq, nutaarsiassaqartitsivik AFP allappoq.
Bardot 22-nik ukioqarluni filmimi
”Guutip arnaq pinngortippaa”, taamanikkut uianit Roger Vadimimik
ilitsersorneqartumi nunarsuarmi tusaamaneqalerpoq.
Kingorna filmini arlalissuarni
inuttaavoq – ilaatigut Louis Mallesip filmiliaani "Privatliv" aamma
"Viva Maria!" kiisalu Godardip filmiliaani "Jeg elskede dig i
går".
Naak nunarsuarmi tusaamasaagaluarluni 39-nik
ukioqarluni filmiliaritittartuujunnaarpoq. Nammineerlunilu uninnissani
sioqqullugu imigassamik atornerluisorujussuunini, tusaamasaanerminillu
tunuarsimaarnissamik pisariaqartitsilluni kingorna oqaluttuarpoq.
Brigitte Bardot uumasunik illersuinermik
ingerlataqalerpoq utoqqalinissanilu tikivillugu uumasunik illersuinermik
suliaqarluni.
Ilaatigullu Amerikamiup Paul Watsonip siorna Kalaallit
Nunaanni danskit politiivinit tigusarineqarneranut atatillugu suliamut
akuliuppoq.
Japanimiut oqartussaasa Sikuiuitsumi 2010-mi
Japanimiunik arfannianik saassussisimaneranik, arfanniarnermillu sulinerannik
akornusersuisimasunut Watson
pisuutippaat.
Watson nammineq pisuunnginnerarpoq, Bardotillu
Danmarkip inatsiseqarnermut ministereqarfianut, Watsonip
tunniunneqarsinnaaneranik isummertussamut saaffiginnippoq.
Watsonip iperagaaneranik Kalaallillu Nunaannit
aallarneranik suliaq inerneqarpoq.
Mutinik atisaliornermi amernik atuinissamik akerliuneq
Bardotip pingaartitaasa ilagaat, ingammillu puisinniartarnermik
akiuiniartuusimavoq.
Uumasunik illersuinermik suliaqarnerup saniatigut
Brigitte Bardot nunasisunut akerliusunik oqaaseqartarpoq, tamannalu nunagisamini
Frankrigimi arlalinnik eqqaartuunneqaatigisarpaa.
