KALAALLIT NUNAANNI UNNUK KULTURISIORFIK
Nalaasaarfimmi bamsit
Unnuk Kulturisiorfimmi Dronning Ingridip Napparsimmavissuani Nuummiittumi misigisassat nuannarineqarnerpaat ilaat, ukiut tamaasa januaarimi ammarneqartarpoq. Bamsinut napparsimmavik. Tamatumani bamsit, inuusat uumasuutillu allat atisanik inuusaliat, immikkut ilisimasalinnit nakorsarneqartarput, – aamma peqqissaasunngorniat meeqqanik angajoqqaanillu naapitaqartarnerminni naleqarluartunik pingaarutilinnillu misilittagaqarlualersarput.
Peqqissaasunngorniat meeqqanik angajoqqaavinillu eqqissisimasumik, qanilaartumik erseqqissumillu attaveqarsinnaanermik Bamsit napparsimmavianniinnertik ilinniutigisarpaat – nakorsiat ilumoortut sullissinnaanngornissaat sioqqullugu.
Assi: Leiff Josefsen
Bamsi nalaasaarfeeqqami napparsimasunik misissuisarfimmi nipaalluni nalavoq. Isigaata siorliup illua nimermik nimerneqarluarsimavoq, sanianilu pullattagaq sungaartoq meeqqap assaanit aalataartinneqarluni.
„Ulloq naallugu naarlukkami,“ nukappiaraq ilumoorsaarluni nassuiaavoq peqqissaasunngorniarlu paasinnilluni niaqquminik anngaasoq isigalugu. Narkorsap atortuanik naalaartaammik qungasermioqarluni peqqissaasunngorniap aallussilluarluni bamsip naavi naalaarpai, ilinniaqataalu napparsimasumut nalunaarsuiffimmut allattuillutik.
Peqqissaasunngorniaq aperillattaavoq, annikitsunnguamillu timaatigut toorsisarluni naggataatigullu nappaataanik suussusersilluni. Qanoq katsorsarneqassanersoq paasinarsivoq: Immannguaq nakorsaaserneqassaaq nipittartulerneqarlunilu – isumassorneqarluassallunilu. Nukappiaraq oqiliallassimarpalulluni qungujuppoq. Bamsi ajorunnaassaqqaarpoq.
Bamsit napparsimmaviat Nuummi Dronning Ingridip Napparsimmavissuani, Unnuk Kulturisiorfik ammarneqarpat, nakorsiartitsineq nalinginnaasoq taama pisinnaasarpoq – suliniut tamanna ukiut 15-it sinneqartuni illoqarfimmi ilaqutariinnut meerartalinnut aalajangersimasumik nuannarineqarluartumillu peqataaffigineqartartoq. Minnerunngitsumik meeqqanit, bamsinik asasaminnik nakorsiussisartunut.
Meeqqat toqqissisimallutik bamsiutitik unermillugit napparsimmaviup silarsuaannut pinnguarnikkut siullerpaamik misigisaqartarput. Dronning Ingridip Napparsimmavissuani bamsit nakorsiartarfianni meeqqat naligalugit misissuisoqarlunilu isumassuisoqartarpoq.
Assi: Leiff Josefsen
Napparsimmavik meeqqanut naleqquttoq
Bamsit napparsimmavianni meeqqat mikinerit bamsiutiminnik, inuusaatiminnik allanillu uumasuutiminnik atisanit sanaanik nassarlutik napparsimmaviup silarsuaa takusinnaavaat — siooranatik alapernaallutilli.
Uumasuutit napparsimasut peqqissaasunngorniarlutik ilinniartunit semesterit siullianni pingajuannilu ilinniartunit nakorsiartinneqartarput, taakkualu pisut tamaasa isumagisarpaat: nakorsiartunik isumaginninneq, misissuineq, katsorsaaneq angerlarsimaffimmullu angerlaqqinnissaat isumagisarlugit. Taakkua ilinniartitsisui tunuatungaannit malinnaasarput, aatsaallu pisariaqartitsisoqartillugu ikiorsiisinnaasarlutik.
Tamannami ilinniartunut nuannisartitsilluni sammisaqartitsinerinnaanngilaq, ilinniartinneqarnerannili pinngitsoornagu ingerlanneqartussanut ilaalluni.
Peqqissaasunngorniat Unnuk Kulturisiorfimmi bamsit, inuusat pinngussallu atorlugit napparsimmavimmi passussisarneq pillugu toqqissisimanartumik paasititsiniaasarput.
Assi: Leiff Josefsen
Piviusorsiortumik sungiusarneq
Nivi Willumsen, Unnuk Kulturisiorfimmi suleqataasartoq Peqqissaanermillu Ilinniarfimmi ullumikkut Ilisimatusarfimmut atassuteqartumi ilinniartitsisoq oqarpoq, Bamsinut napparsimmavik ilinniarnermut pingaaruteqartuusoq.
„Ilinniartut ilinniarnerminni piviusorsiortumik misilittagaqarnissaminnut periarfissaqalersarput — toqqissisimanartumilli pinnguarnerpalaartumillu. Nassuiaasussaapput, tusarnaassallutik tatiginnilersitsissalutillu, meeqqamut inersimasumullu meeqqap sanianiittumut, oqarpoq.
Inoqatinut attaveqarneq qitiusumik inissisimavoq. Meeqqat paasisinnaasaannik nassuiaasinnaanissaq ilinniartut kingusinnerusukkut napparsimasunik oqaloqateqaraangamik pisariaqartilluinnartussaavaat.
Ilinniartut namminneq isumassarsiaat
Bamsinut napparsimmavik aalajangersimasumik ingerlanneqartussaanngilaq, ilinniartulli namminneq pitsanngorsaanissanut siunnersuuteqarsinnaallutillu nutaanik isumassarsisinnaassallutik.
„Unnuk kulturisiorfiup kingorna aaqqissuussineq ataatsimut nalilersortarparput. Suut iluatsinneqarpat? Tullissaanut suut pitsaanerulersinneqarsinnaappat? Ilinniartut taamaalillutik piginnittuusutut akisussaaffimmillu tigusisutut misigisimasarput, Nivi Willumsen oqarpoq.
Ilinniartut ilarpassuisa tamanna ilinniarnerminni puigunaannerpaanut ilaatittarpaat — aatsaavissuarmi misigisarpaat ilinniartitsissutigineqartut, iliuuserisat inuttullu attaveqarnerit ataqatigiilluarnerat.
Unnummi kulturisiorfimmi 2026-mi januaarimi pisussami, ilinniartut qulit angullugit amerlassusillit peqataanissaat taassuma naatsorsuutigaa
Peqqissaasunngorniat Unnuk Kulturisiorfimmi bamsit, inuusat pinngussallu atorlugit napparsimmavimmi passussisarneq pillugu toqqissisimanartumik paasititsiniaasarput.
Assi: Leiff Josefsen
Siullermeerluni toqqissisimasumik attaveqaqatigiinneq
Meeqqat napparsimmaviup allaanerulluinnarnera paasissavaat: Napparsimmavik tassaaginnanngitsoq ipittunik meqquteqartoq, nappaatinik ilungersunartunillu ulikkaartoq, aammali tassaasoq qungujulasumik ilassinniffigineqarsinnaasoq, piffissaqarfigineqarluni isumassorneqarlunilu.
Bamsi nakorsarneqareeraangat nipittartulerlugu angerlartinneqarajuttarpoq – meerarlu nutaamik misilittagaqalersarluni.
Misigisaq tamanna tullianik Dronning Ingridip Napparsimmavissuanukarnissaminni immaqa annilaangannginnerulissutigissavaat.
Tassa naak Unnuk Kulturisiorfik aliikkusersuinertaqaraluarluni Dronning Ingridip Napparsimmavissuani „bamsinut napparsimmavik“ aamma iluaqutaasarpoq — peqqissaasunngorniarlutik ilinniartunut peqataasunut meeqqanullu bamsiutiminnik misissortikkiartortitsisunut.
