Piginnaanillit marluk Nalik Venturesimi siuarsaaqataassasut

Karin Pedersen Thorsen aamma Augusta Lundblad Nalik Venturesimi pingaarutilittut inissisimassapput. Nalik Ventures taama nalunaarpoq.

Karin Pedersen Thorsen sullissinermut pisortatut atorfinitsinneqarpoq, Nalik Venturesillu sullitaminut – ilaatigut aallarnisaasunut, suliffeqarfinnut kiisalu kommuninut namminersortunullu – attaveqarluarnerulernissamut suleqateqarnerujartuinnarnissamullu akisussaasuussaaq.

- Nunatsinni namminersorluni inuussutissarsiuteqarneq siuariartorpoq, taamatuttaarlu sineriak tamakkerlugu periarfissatigut ujartuiffiginissaa pingaaruteqarpoq. Matumani Nalik Ventures ikorfartuissaaq, Karin Pedersen Thorsen oqarpoq.

Kalaallit Nunaat nunanit allanit soqutigineqaleraluttuinnarpoq, tamatumalu saniatigut aningaasaliinissamut piumassuseqartoqartorujussuusoq, inuussutissarsiornermik ineriartortitsinermut ingerlatseqatigiiffimmit oqaatigineqarpoq.

- Tapiissuteqarnikkut siunnersuinikkullu sullittakkagut taamatuttaarlu annerusunut aningaasaliiffigisartakkatsinnut qanimut suleqateqarneq nukittorsaqqinnissaanut pitsaasumik attaveqarneq aqqutillu eqqortut pisariaqarput. Karin pineqartunut misilittagartuujunera atorluassavarput, Nalik Ventures allappoq.

Augusta aallarnisaasunut aqutsisunngortoq

Nalik Venturesimi atorfinittut aappaat tassaavoq Augusta Lundblad, taannalu aallarnisaanermut aqutsisutut atorfinitsinneqarpoq, tassanilu Nalik Ventures sinnerlugu Kalaallit Nunaanni aallarnisaanerup ineriartortinneqarnissaanut siuttuussaaq.

„Nunatsinni inuussutissarsiorneq siuarsassagutsigu isumassarsiamiit piviusunngortitsisinnaaneq aamma inerisartariaqarparput - illoqarfinni anginerniinnaanngitsoq, piffinnili tamani periarfissalinni,“ Augusta Lundblad atorfittaani pillugu oqarpoq.

Augusta ukiorpassuanngortuni nunatsinni aallarnisaasunut qanimut sullissisooreerpoq, maannalu aallarnisaanermut ikorfartuineq ineriartorteqqinnissaanut nutaaliornissanut suliaqartussanngorluni, Nalik Ventures allappoq.