Koda Kalaallit Nunaanni nutaamik sinniisortaarpoq

Siunissami Frederik Elsner Kodamut nunatsinni siunnersortitut sinniiisuulissasoq, Koda ilisimatitsivoq.  

Kodami atuuffinni nutaaq aqqutigalugu Frederiup misilittagai, attaveqaatai ilisimasaalu Kodamut attavinnik nunatsinnilu nipilersortarnermik nukittorsaaqataassapput. 

– Kalaallit Nunaat nukittuunik, pilersitsillaqqissunik anguniagaqartunillu nipilersortartoqarpoq, taakkulu ineriartornissamut ersarissuunissamullu pitsaasunik periarfissinneqartariaqarput. Kodamut nunatsinnilu nipilersornikkut pilersitsisartorpassuarnut attaveqaatinik nukittorsaaqataanissamut, piffinnilu ilisimasanut qanilaassusermullu peqataaqataanissamut qilanaarpunga, Frederik Elsner oqarpoq. 

Koda peqatigiiffiuvoq nipilersukkanik pilersitsisut pisinnaatitaaffiinik, sanaavisalu atorneqarneranni akiliuteqartarnermik qulakkeerinninnermik suliaqartoq.  

Maanna Frederik Elsner ilaasortanut sullissinermik siunnersuinermillu kiisalu piffinni ilisimasanik, Kodap nunatsinni ineriartorneranik nukittorsaasinnaasunik akisussaaffeqalerpoq.   

Frederik Elsner nipilersortartutut ilaatigut nipilersoqatigiinni Nanoommi siuttuullunilu taalliortuunermigut ilisimaneqarpoq.  

– Peqatigisaanillu nunatsinni kulturikkut inuunerup siammasissumik ineriartortinneqarnerani akuuvoq, nipilersortartullu akimorlugit annertuumik attaveqaatinik pilersitsilluni, Koda erseqqissaavoq.