Pele Amerikamiunik ataatsimeeqateqartoqarnera pillugu: Illersornissaq niuernerlu pingaarnerpaatissagaluarpavut
Kalaallit Nunaata USA-llu akornanni Nuummi ataasinngornermi marlunngornermilu ataatsimiittoqassaaq. Naleraq peqataasimasuuppat Amerikamiut soqutigisaat allatut iliuuseqarfigineqassagaluartut, Naleqqap siulittaasua Pele Broberg oqarpoq.
- Danmarki peqataatinnagu USA-mik illersornissaq isumannaallisaanerlu pillugit isumaqatigiissuteqarusuppugut, isumaqatigiissummi ulloq Danmarkimiit avissaarutta atuutissaaq, Pele Broberg USA-p Kalaallit Nunaatalu ataqatigiinnerit pillugu oqarpoq.
Assi: Oscar Scott Carl
USA-p Kalaallit Nunaatalu akornanni tatigeqatigiinnermut tunngaviusoq pilerseqqinneqartariaqartoq, Nunanut allanut tunngasunut naalakkersuisoq Vivian Motzfeldt (S) ataasinngornermi ullaakkut oqarpoq. USA-mi præsidentip Donald Trumpip Kalaallit Nunaata USA-miit pigineqalernissaa aqunneqalernissaalu oqariartuutigisareeraalu tatiginninneq innarlerneqarpoq.
Inatsisartuni illuatungiliuttutuaasut Naleqqakkut Amerikamiut soqutigisaannut tunngatillugu Naalakkersuisut isumaat assiginagu siusinnerusukkut oqaatiginikuuaat.
Kalaallit Nunaata USA-llu ataatsimiinneranni suut pingaarnersiussagaluarnerai Sermitsiap Naleqqami siulittaasoq aamma Nunanut allanut Sillimaniarnermullu Ataatsimiititaliami ilaasortaq Pele Broberg (N) aperaa:
Nammineq aalajangiisinnaanerup ataqqineqarnera erseqqissaatigigaa
- Akisussaaffimmik tiguserusuttunik, teqeqqumiiginnarani narrujuummerlunilu, naalakkersuisoqarnissarput pingaaruteqarpoq, Pele Broberg oqarpoq, nangillunilu:
- Amerikamiut uagut kalaallit nammineerluta aalajangersinnaassuseqarnerput siunissarpullu nammineq ilusilersorsinnaagipput uteqqikkaat maluginiarpaa. Naalakkersuisut taanna paasilersimagaat tusarluassagaallu neriuutigaara.
Sooq tamanna pingaaruteqarpa?
- Qineqqusaarnermi USA-mik suleqateqarnissaq qujagineqarpallaanngitsutut nipeqarnikuugami. USA-lu ikinngutiginagu akeranngortinniarsarisutut pineqarnikuummat.
- Nunat allat taamatut pineqarsimatillutik USA-mut qanoq iliornerat maluginiartariaqarparput, naak misigissutsit kalluarneqartaraluartut. Nunat allat USA-mik suleqateqarnerminni inersimasutut pissusilersorput, Broberg oqarpoq.
Illersornissaq pillugu isumaqatigiissut nutaaq pingaarnerpaatinneqartariaqaraluartoq
Naleraq ukioq manna qinersinermi ajugaasimasuuppat Naalakkersuisunilu issiasimasuuguni, illersornissaq niuernerlu pillugit Amerikamiunik toqqaannarnerusumik isumaqatigiinniartoqassagaluartoq oqaatigaa:
- Danmarki peqataatinnagu USA-mik illersornissaq isumannaallisaanerlu pillugit isumaqatigiissuteqarusuppugut, isumaqatigiissummi ulloq Danmarkimiit avissaarutta atuutissaaq, Pele Broberg oqarpoq, taassumalu aamma naalagaaffissuaq niuernikkut isumaqatigiissuteqarfiginissaa kissaatigalugu oqarpoq.
USA Donald Trumpip aqutsinerani nunarpassuarnut niuernikkut sorsulerpoq, Kalaallit Nunaatali Trumpip Kalaallit Nunaannut soqutiginninnera atorluassagaluarpaa, Pele Broberg oqarpoq:
- USA-mik killilersugaanngitsumik niueqateqalertariaqarpugut, tamannali ajornakusoorpoq. Taamaattumik Amerikamiut uagutsinnut pitsaanerpaamik kissaateqarunik niueqatigiilerlutalu aamma taakkununnga tuniniaasinnaatitaanerput paasitittariaqarsimagaluarpavut.
- Præsidenti qanga siuttuusartunit allaaneruvoq
Donald Trumpip Kalaallit Nunaata Amerikamiunit pigineqalernissaa aqunneqalernissaalu pillugit oqaasii ernumagivallaanngilai:
- Præsidentip Kongressimut nunanut allanut siunissami attaveqarnissarput nammineq aalajangersinnaassagipput oqaatiginikuuaa, oqarpoq, nangipporlu:
- USA-mi præsidenti qanga siuttuusartunit allaanerunera paasineqartariaqartoq isumaqarpunga. Oqariartuutigineqartullu pillugit narrujuumernani, taamaaliornermi angusaqarfiuvallaarneq ajorpoq. Akuutinneqarunnaartarput.
