Kalaaleq sisoraaserluni ooqattaasartartoq OL-imi Norgemiut misigissutsikkut sakkortuumik ajugaaffigisaanni peqataaqqaartoq
Sondre Slettemark ukiuunerani OL-imi qallunaat sinnerlugit peqataaqqaartuuvoq, tamannalu naammagisimaarluarpaa.
Sondre Slettemarkip nikuilluni ooqattaasarnermi siullermi marloriarluni uniornini uggoraa, kisiannili angusani naammagisimaarluinnarpaa.
Assi: Pawel Kopczynski/Reuters
Sisoraaserluni ooqattaasartartoq kalaaleq Sondre Slettemark ukiuunerani OL-ertoqarnerani Danmark sinnerlugu peqataavoq, marlunngormallu Italiap avannaani unammiuaarnermi peqataavoq.
Anterselvami sisorartarfissuarmi tusaamasaasumi angutit ataasiakkaarlutik 20 kilometerimut unammineranni peqataavoq, tassanilu 89-init normu 62-iulluni apuuppoq.
- Siuarsimanerunissara neriuutigigaluarpara, naammagisimaarparali. Maaniinnera naammagisimaarpara. OL-erpugut nuannerluinnarporlu, Sondre Slettemark DR 1-imut oqarpoq.
20 kilometerit ingerlanerini sisamariarluni ooqattaasartussaavoq — marloriarluni pallorluni marloriarlunilu nikuilluni. Neriuutigisaatulli ingerlanngilaq.
Sondre Slettemarkip ooqattaasagassat 20-t tamaasa eqqussallugit takorloorsimavaa, kisianni 17-it eqqorpai.
Ooqattaasarnermi siullermi ooqattaasagassat tamakkerpai, nikuillunili ooqattaasarnerup tulliani marloriarluni uniorpoq. Pallorluni ooqattaasarnerup aappaani aamma ooqattaasagassat tamakkerpai, nikuillunili ooqattaasarnermi kingullermi ataasiarluni uniorpoq.
Taamaalilluni minutsinik pingasunik pillarneqarluni ilanngaanneqarpoq, tamannalu sukkanersaanngikkaanni annertuallaarpoq.
Apuuffissamut apuukkami normu 15-iuvoq, sisorartartulli sukkanerusut kingulliullutik aallarnikuummata appariartuinnarpoq.
Norgemiu Johan-Olav Botn marlunngornermi unamminermi kuultinnappoq nunaqqatinilu Sivert Guttorm Bakken, 2025-p naalernerani hotelimi toqungasoq nassaarisimasani, inuulluaqquaa.
- Sivert - apuuppugut, Johan-Olav Botn apuuffissamut apuukkami tv-kkut assiliisumut nilliavoq.
Norgemiut taakku marluk juullinngitsiartoq Italiami Lavazémi qaqqani sungiusartut Sivert Guttorm Bakken toquvoq.
Sondre Slettemark tallimanngorpat oqilaniuulluni unammissaaq. Tamannalu sioqqullugu qatanngutaa Ukaleq aamma qallunaaq-norgemiu Anne de Besche pingasunngornermi 15 kilometerimut arpaliutissapput.
/ritzau/
