Nuummi discimik golferluni unammisarfik siulleq pilersinneqartoq

Discimik golfernermi pinngortitaq qitiusumik inissisimavoq. 

AG-p Lasse Hulmose Jessen Nuffiumanermi naapimmagu tamanna aamma malugisinnaavarput. Tamaaniippoq Nuummi discimik golfertarfiit siullersaat putseruttornerani ersiaqqalaaginnartumiittoq, aallartittarfimmillu ikiseriarfissaq siulleq kisiat takusinnaavarput, tassungalu diski (frisbeetut ittoq) ikiniarneqartussaalluni.

Lasse Hulmose Jessen Kommuneqarfik Sermersuumi sunngiffimmi sammisassaqartitsinermut kulturimullu immikkoortortaqarfimmi ataqatigiissaarisuusoq oqaluttuarpoq timersuut aamma namminerminut nutaajusoq. Suliniummilli aallartitseqataasimalluni.

- Matumik matorluinertut assersuunneqarsinnaavoq, Lasse Hulmose Jessen oqarpoq. Taanna arpariarluni unippoq, discilu assamminit iperarlugu, maannalu silaannakkoorluni koorip ikisiffissap tungaanut aallarluni.  

Qanoq periarnissani Islandimiunit marlunnit, Birgir Ómarssonimit Ólafur Haraldssonimillu ilikkarpaa, taakku Islandimi discimik golfertartut peqatigiiffianneersuupput. Qummoorpallaarlugu nalukkaanni disci anorimit tingitaasinnaavoq.

Discimik golferneq golfertarnertut nalinginnaasutupajaaq ingerlasarpoq. Tassa imaappoq, sapinngisamik nalussinerit ikinnerpaat atorlugit unammiffik naammassineqartariaqarluni. Maani Nuummi unammisarfik qulingiluanik ikisarfeqartoq, kikkut tamarmik akeqanngitsumik atorsinnaavaat aallartinnissaalu ajornanngitsuararsuulluni, Lasse Hulmose Jessen taama neriorsuivoq, taannalu taskimik discinik qalipaatigissaartunik assigiinngitsunik oqimaassusilinnik imaqartumik tuimigut nammalluni.

- Arlaqanngitsunik nalussereeruit qanoq periaaseqartoqartarnersoq paasisinnaalissavat, oqarpoq.  

Timersorneq aaqqiissuussaavallaanngitsoq pisariaqartinneqartoq

Nuummi discimik golfernermi unammisarfissamik isumassarsiaq Lasse Hulmose Jessenip suleqataata Jonas Nilssonip ukiut marluk matuma siorna isumassarsiaraa. Taanna Kommuneqarfik Sermersuumi sunngiffimmi kulturimullu immikkoortortaqarfimmi pisortaavoq, taamanikkullu Nuummi Najukkami Ataatsimiititaliami ilaasortaalluni. Taassuma qatanngutini diskimik golfeqatigiartuleraa AG-miit oqaloqatigaarput.

Maanna ukiut pingasut-sisamat timersuutigereerpaa. Tassa nunani allaniitsilluni - Nuummimi unammisarfimmik peqarnikuunngilaq.

- Aaqqissuussaanngitsumik timersorfissamik amigaateqarnera sivisuumik eqqarsaatersuutigisarnikuuara, Jonas Nilssonip iliuuseqarnissamik kajungilernikuunini pillugu oqarpoq, nangipporlu:

- Isikkamik arsaanneq assammillu arsarneq piffissaligaasumik ingerlanneqartartut nuannaarutigeqaakka, kisianni piffissami aalajangersimasuunngikkaluami periarfissaqartilluni ukiut apeqqutaatinnagit timersuutigisinnaasamik amigaateqartoq isumaqarpunga.

Discimik golfernermik unammisarfik takorluukkaminut tulluartippaa. Najukkami ataatsimiititaliami ilaasortat allat isumassarsiaminut tapersersuitilerpai, 2024-milu decembarimi suliniut kommunimit 200.000 koruuninik aningaasaliiffigineqarpoq. Tassaanngaannilli suliaq aallartippoq... sukkasuujunngitsumik, isumassarsisoq oqarpoq.

- Piffissaq pillugu isumalluarpallaarsimagunarpunga, oqarpoq.

Nunaminertamik ukiuni tallimani atorneqarsinnaasumik akuersissutaagallartumik tunineqarnissaa tusarniaassutigineqaqqaassaaq, tassanilu suliniut nuannarineqarluartoq isumakuluutigineqarpoq. Taava oqaloqatigiinnissamut ataatsimiititsinerit ingerlanneqarpoq, discimik golfernermi unammisarfiup sumiinnissaa pisuinnaat aqqutaannut naleqqussarneqarlunilu ujakkaartartut sumiiffimmi aqqutaannut aamma nalimmassarneqarpoq.

Nunatsinni unammisarfinni siulliunngitsoq

Nuummi discimik golferluni unammisarfik Kalaallit Nunaanni siullersaalluni pilersinneqanngilaq. Qaqortumi, Nanortalimmi Aasiannilu 2023-mi peqalernikuuvoq.

Siullertut taaneqartut marluk Martin Spliidip, Danmarkimi discimik golfernermi arlaleriarluni mesteriusarnikullunilu EM-imi unammeqataasarnikup, suleqatinilu suliffeqarfik Frisbeesport pilersippaa. Discimik golferluni unammisarfiliorusuttunut taakku siunnersuinermik suliaqarlutik.

Martin Spliid suleqatinilu Mikkel Zeeb kommuninut attaveqarlutik Qaqortumi, Narnortalimmi Narsamilu unammisarfinnik ilusilersuiartorlutik Kalaallit Nunaannikarput. (kingullertut taaneqartoq Martin Spliidip nunatsinniinnerani sananeqanngilaq, aamma aallareernerata kingorna sananeqarsimanersoq paasiniaratsigu allaaserisap suliarineqarnerani piffissami killiliussami akissutisinngilarput.)

Martin Spliidip unammisarfimmik ilusilersuiniartilluni ullup ataatsip ingerlanerani sumiiffimmi angalaarluni pinngortitami suut unammiffigineqarsinnaanersut misissortarpai.

- Kalaallit Nunaanni discimik golferluni unammisarfimmik pilersitsiarnermi pinngortitami assiaqutaasinnaasunik amigaateqarnera aporfiusinnaasarpoq, Martin Spliid oqarasuaatikkut oqaloqatiginerani oqarpoq.

Sumiiffiit ilarpassuini orpiit unammisarfimmi assiaqutitut atorneqarsinnaasut piusarput. Martin Spliidilli qaarsut, portussutsit assigiinngissutaat nunamilu tatsit assiaqutitut atortarpai.

Aasianni discimik golfertarfik Philip Jensenimit, taamani illoqarfimmi ilinniartitsisumit, ilusilersorneqarpoq. Taanna unammisarfiup sananissaanut tapiiffigineqarpoq, kommunimit nunaminertamik tunineqarluni Martin Spliidilu siunnersorneqarluni.

- Nunani amerlanerni koorit nunamut assallugit sananeqartarput, maanili qaarsoq qillerneqaqqaartariaqarluni. Martinilu attaveqatigiilerpugut taassumami suliffeqarfiutaa kisiartaalluni taakkuninnga suliaqartuugami, Philip Jensen oqarpoq.

Aasakkut seqerngup kaaviinnarfiani ulloq unnuarlu isikkamik arsaattoqartarpoq. Aasianni ukiorpassuarni najugaqarsimagaluarluni silami timersornermut tunngatillugu pingaarutilik eqqarsaatigisimanngisaannarpaa:

- Kaperlalerpat silami timersornissaq ajornakusuulissaaq, Philip Jensen oqarpoq.

Kangerlussuaq discimik golfernermik aamma unammisarfittaartussaavoq. Claus Bøgelund Forsberg, ornittakkami Orpikkami perorsaasumut ikiorti, suliniummik aallartitsisuuvoq.

Timersorneq meeqqanut atugarliortunut qanoq iluaqutaasinnaatiginersoq takunikuuaa.

- Pisuttuaannaraanni eqqartorsinnaasanik eqqarsartoqaannavittariaqarpoq. Discimik golfertilluni igeriuteqqammisaq imaluunniit igeriunniagaq eqqartorusaarneqarsinnaajuaannarpoq, Claus Bøgelund Forsberg oqarpoq, nangipporlu:

- Itisuumik oqaloqatigiinnissamik periarfissiisarpoq.

Nunatsinnut disciutimi ilai nassarpai, meeqqallu soqutiginninnerat ingerlaannaq tiguarlugu. Taamaammat discinik katersuiniarniarluni aalajangerpoq. Discit 150-init amerlanerusut tunissutigai - nunaqarfimmilu unammisarfeerannguarmik maanna pilersitsinialerluni.

Discit amigaatigiinnarneqartut

Kalaallit Nunaanni Timersoqatigiit Kattuffianni (KNTK) discimik golferluni unammisarfiliornissamik suliniutit tamarmik tikilluaqquneqarput.

- Silami timip atornissaanik, nuannisaqatigiinnissamut ataatsimoornissamullu periarfissat amerlanerulernissaat anguniarlugu iliuuseqartoqarmat nuannaarutigaara, Claus Nielsen KNTK-miit oqarpoq. Taasuma taanna timersuut Nunatsinni qanoq atugaatiginersoq ilisimanngilaa.

Nunanili allani atugaasorujussuuvoq. OL-imi unammissutigineqarsinnaanngikkaluarluni nunani tamalaani pissartanngorniuunnernik aaqqissuussisoqartarpoq. Danmarkimi USA-milu tusindilikkuutaat timersuutigaat, ilaasalu inuussutissarsiutigalugulu aningaasarsiutigaat.

Lasse Hulmose Jessenilli tamanna pingaarnerutinngilaa, taassumami maleruagassat malinneqarnissaat apeqqutaatinnagu inuit nuannisarnissaat pingaartinneruaa:

- Piumagunik tunullutik pinguaatigisinnaavaat, oqarpoq.

Lasse Hulmose Jessenip discimik golferluni unammineq pinngortitami misigisassanut assersuuppaa.

- Pisuttuarneq nuannarinerpaarsuunngikkaanni nunami nuannisaarutigisinnaanera isumassarsiatsialaavoq.

Inuit timersornermik aallartitserusuttut ilitsersorneqarnissaannut periarfissiinissaq suliniummi tullinnguuppoq. Tassunga atugassanik discit 40-t pisiarineqarnikuupput.

Lasse Hulmose Jessenimulli inuit sunngiffimmi timersornermik sammisaqartalernissaannut unammilligassaq annerpaaq ataaseq piuvoq:

- Nuummi discinik suli tuniniaasoqartalernikuunngissoraara, oqarpoq.