Putsup iluaniikkaluaraanniluunniit aamma qaamaneqarpoq

Takusatigut eqqaamanagit nipit eqqaamavai.

Qiarpaluk. Nipit oqaasissaminnik tupittut. Oqaluffiup siarngi. Oqimaatsoq akiugassaarpianngitsoq. Naggataatigullu iliveqarfimmi nipaanneq.Steffen Knulst pingasuinnarnik ukioqarluni anaanaaruppoq. Eqqaamasaani siullersaavoq - inuunermilu sinnerani nanertuutissaanut aallarniutaalluni.

Ilisisunut maanna peqataasanngilaq. Imaanngitsoq aliasunnginnami, aliasunnerliuna inuit aliasuttut akornanniilluni oqimaappallaalersartoq. Nammineq kisimiilluni naggammik qujassuteqartarpoq. Takuneqarsinnaanngitsumik - misigissutsitsigulli misigineqarsinnaasumik.

Toqqissisimanani meeraaneq

Steffen Knulst maanna 31-ngajannik ukioqarpoq. Nuummi amerlanerpaat nalinginnaasutut taajunnanngisaanni peroriartorpoq. Anaanami toqunerata kingorna angummini imigassamik atornerluisuunerminik ajornartorsiuteqartumi najugaqarpoq. Tassanili nakuusertoqarneq ajorpoq.

– Ataatama sunikuunngisaannarpaanga. Naak aalakooraluarluni nuannerusaartuaannarpoq, Steffen Knulst oqaluttuarpoq.

Avatangiisaali atornerluisuupput. Imigassaq ikiaroornartorlu ilaqutariit atugaraat – avissaartuuffigisarlugulu. Angutaa weekendini suligaangat Steffen aanaminit aataminiillu paarineqartarpoq. Kiffaanngissuseqarfiusussaagaluartoq illuatungerluinnaannik pisoqartarpoq.

– Weekendini aanaakkunni aataakkunniitillunga illortaama kinguaassiuutitigut atornerlunneqarpunga, oqarpoq.

Nipaa eqqissisimavoq. Allaanngilaq oqaatsit isumaaniit qimaaqqasoq.

Atornerlugaasarnera ukiuni sisamani pisarpoq, arfinilinnik ukioqarneraniit qulingiluanik ukioqalernissaa tikillugu. Akiuunnissaminik allanullu oqaatiginissaanut mikivallaarpoq ersiorlunilu. Sioorasaarneqartarnera oqarsinnaannginneranut pissutaavoq. Ullorli ataaseq allatorluinnaq pisoqarpoq.

– Kommuunimiit tapersersortima aanaakkunniikkaangama unnukkut sulerisarnersunga apereriataarpaanga. Qerattaannarpunga. Uippallerpunga. Aallaqqaammut kia atornerluttarneraanga sallullunga oqaatigaara, illooqqamami toqussasoralunga ersiorama. Amerlasooriarlunimi sioorasaartarnikuuaanga, Steffen Knulst oqarpoq.

Oqaasinnguinera allannguisoqarnissaanut aqqutissaasorinaraluarpoq. Suna tamarmi oqinnerulissasoq. Taamaattoqanngilaq. Allatigut toqqissisimannginneq aallartippoq. Steffen sumiiffimmiit sumiiffimmut nuutsinneqaqattaalerpoq. Ukiup ataatsip ingerlanerani qulingiluanik assigiinngitsunik angajoqqaarsiaqarpoq. Ima sivikitsigisumik najugaqartarpoq tunnissaminut periarfissaqarani. Angerlarsimasutut misigilersinnaanani. Sumiiffiillu ilaanni toqqissisimannginneq timitaqarpoq - timikkut tarnikkullu persuttagaaneq.

– Naak arnarsiara kingulleq toqqissisimanaraluartoq uia taamaanngilaq. Inuusuttuaraallunga iliveqarfimmiitillunga anaanama ilerrata saniani qiasunga nipangeqqullunga nilliaviginikuuaanga. Maqaasisuusaariga isigikatakkamiunngooq. Sequmillunga, nipaatsumik oqarpoq.

Taamaakkaluartoq anaanaminut attaveqarnera piinngisaannartutut ippoq. Qamuuna amigaataa allat paasisinnaanngisaat ulikkaartutullusooq ippaa. Avatangiisii nakkaakkiartortut anniaateqartulluunniit anaanani pillugu takorloortagai kalluarneqarneq ajorput. Sumiginnaaneq ajortut.

– Ullut tamaasa maqaasisarpara. Immaqa tusassallugu eqqumiippoq, kisianni malugisinnaavara. Nalunngilara uannut ajunngitsuusoq, oqarpoq.

Atassuteqarneq eqqaamasanit pinngunngitsoq. Ataatsimoorluni misiginikuusanik soqanngitsoq. Malugiinnarneqarsinnaasoq – maqaasinerlu. Immaqa meeraaneranit sorlaqartoq: anaanamut qanilaarneq toqqissisimanarnerpaaq, pingasunik ukioqarluni annaanikuusaa. Tunngaviliisussaagaluartoq piunngitsoq. Nammineerlunilu sinneri anigorniagassarilerlugit.

Tarrajummi qaamaneq

Steffen Knulst 21-nik ukioqarluni angajoqqaarsiaminiit nuuppoq. Aappani ineqatitaaraa. Aappariinnerat peqqinnanngilaq toqqissisimanaranilu, inissaqarporli. Marluullutik Danmarkimukarpoq, tassanilu Horsensimi kommunimi sulilerluni eqqaavilerisunngorpoq.

Ilinniagaqanngilaq. Atuarfimmi tapersersorneqanngilaq, atukkat artornarsigaangata tulaavissaqanngilaq. ADHD-eqarluni toqqissisimananngitsumillu peroriartorneq sumiginnagaanerlu atuarfimmi malinnaaniarnermut iluaqutaanngillat. Taamaammat suliffigisinnaasani suliffigisarpai.

Danmarkimiinnerali sivikitsuinnaavoq. Aanaava aataavalu Nuummiittut kræftimik napparsimalerput. Steffen uterpoq. Aataava sapaatip-akunnera ataaseq qaangiummat toquvoq. Aqqusaagai artornarseqqipput, toqulu qanilluni.

– Atugarliornera aallarteqqippoq. Qaammatit marluk ingerlaneranni ilaquttakka sisamat annaavakka, ikinngutikkalu arlallit imminnut toqullutik, Steffen Knulst artorsarpasilluni oqarpoq.

Aliasunnera qamani alliartorpoq. Annaasai tulleriiaaginnavipput. Arlaannullu tuttariaqarput.

– Hashimut qimaavunga. Ikiaroorusaaginnavilerpunga. Ullut tamaasa. Akulikitsumik, nangaarianngivilluni oqarpoq.

Imigassaq attornaveersaarpaa. Qanoq sunniuteqarsinnaanersoq takunikuuaa. Inunnut ilaqutariinnullu qanoq aserorsaataasinnaatigisoq. Hashili oqilisaataavoq. Nammanneqarsinnaanngitsutut ittunut nukissaqalersitsisutullusooq ippoq.

Inuunera eqqissiviilliorfiuvoq. Aappaqartaraluarpoq sivisunngitsumilli. Ulluinnaat sisuuginnartutut misinnarput. Suullu tamarmik misigineranni qaamaneq takkuppoq.

Pania. Rena septembarip qaammataani alianaaqisumi inunngorpoq, maannalu anaanamini Qasigiannguani najugaqaraluartoq inuunerani pingaarutilimmik inissisimavoq. Maanna sisamanik ukioqarpoq, FaceTimelu atorlugu oqaloqatigisinnaanera tamaagaannartinngisaannarpaa.

– Pingaarnerpaavoq. FaceTimekkut takugaangakku nuannersumik timinnut sunniuteqartarpoq. Ikiaroornermiit pitsaanerujussuarmik. Nuannernerpaavoq, Steffen qungujulluni oqarpoq.

Aatsaat taama sivisutigisumik misiginikuunani uumaniaannartutut piunnaarpoq. Aqqummik allamik toqqaarusulerneq.

Timersorneq qimaaffittut

Steffen Knulstip atuisuunini nalunngilaa. Ritalinip ADHD-mut ersiutit sakkukillisarpai, haship nammakkuminarninngortittarpai illarnissamullu periarfissaqalersittarlugu. Piffissalli ilaani taamaakkunnaartarpoq.

– Piffissap ilaani iisartagartorunnaarfeqarlungalu ikiaruussaartarpunga. Paasiniaannarlugu qanoq pinngitsuuisinnaajunnaarsimatiginerlunga. Pinngitsuuisinnaajunnaartunngorusunngilanga. Ajunngitsumik kinguneqarunanngilaq, Steffen Knulst akisussaassuseqarpaluttumik nipeqarluni oqarpoq. Nalorpasinnagu ajorunnarani – aamma atuisuunani ajorunnarani.

Iisartagartorfiginngisaata ikiaroorfiginngisaatalu nalaani isummani aqukkuminaatsissinnaasarpaa. Iluaqutigisinnaasanili nassaaraa. Timersorneq. Inuit pinnguaataasa nukissaanik eqqissisimanerunissaanillu sunnertarpaat. Timaata qarasaatalu tunngavissaanik ikiaroornartup suulluunniit sunniutigisinnaanngisaanik sungiusartarpaa.

– Ikinngutiginerpaasama ilaata ajoraluartumik siorna imminut toquttup timersoriaqatigeqqaarpaanga. 2010-mi, 2014-imili aatsaat pikkoriffigilerpara, oqarpoq.

Sungiusartarnini pimoorukkiartuinnarnerani unammeqataanissamut periarfissaq takkuppoq. Kalaallit Nunaanni pissartanngorniunnermi unammeqataavoq, iluatsillugulu. Nunanullu allanut unammisartut aalajangersimasumik malittarisassaqarput: ikiaroortoqassanngilaq.

– Isertuunniarsarigaluarpara naggataatigullu isertugaajunnaarpoq, taamaammat taamani sungiusaasutta Kim Rosingip timersoqatigiinniit anisippaanga. Taanna ataatatut isigisinnaasattut qaninnerpaagaluarpoq, Steffen Knulst eqqissisimasumik nipeqarluni oqaluttuarpoq.

2019-imi misileeqqippoq. Ikiaroornartoq unitsikkallarlugu Kalaallit Nunaanni tukerseriaanermi aamma illuttut tukerseriaanermi rekortiliinissani qalliartorpaa, 2021-milu iluatsillugu.

– Takorluugaqartalerpunga. Timersornermi angusat takutitsilluarnissarlu takorloortalerpakka. Uannut tamanna nutaajuvoq, Steffen Knulst oqarpoq.

Arctic Winter Gamesimi marloriarluni peqataavoq, 2018-imi 2023-milu. Peqataarngaarnini eqqaamarpianngilaa: timmisartumik aallarnissamut minutsit 45-innanngortut kukutsivoq, sungiusaasualu Kim Rosing, aamma politiinut ikiortaasartoq, timmisartumi sanianut ingippoq.

– Imminut pakatsisippunga. Ukioq taanna bronzennappunga, tulluusimaarutiginaguli, Steffen Knulst oqaluttuarpoq.

2023-mi allarluinnarmik pisoqarpoq. Steffen ikiaruussaaqqavoq, sungiusartarnini pimooruppai sukataarneralu imminut akilerluni: Kalaallit Nunaat sinnerlugu Head Pullimi unamminermini kuultinnappoq.

Atornerluisuunera timersortartuuneralu nikerarput, paatsiveerusimaarfimmilu Kim Rosing tulaavissaajuartuuvoq. Sungiusaasutut politiinullu ikiortitut Steffenip nammatai angusinnaasaalu takusinnaavai. Immaqa aamma taamaammat Kimip ataatatut maligassiuisutut inuunermi toqqissisimanerup allanngujaatsuunerullu qaqutigoorfiani inissinneranut pissutaasoq.

Inuunermi atukkat oqimaaqatigiinnerat

Steffen ukioq manna Arctic Winter Gamesimut peqataanngilaq. Aamma 2026 tamaat ikiaruunngilaq. Suli. Ussersorpallaarani oqaatigaa, paasissutisseerpasiinnarluni. Ikiaruussaavissinnaanani isumaqarpoq. Unikkallartarnerili sunniuteqartarput. Inissaqartitsisarput. Sungiusartarnini maanna pimoorunneruaa. Timiminut uteqqilluni, aalajaatsuunini aalluteqqilerlugu. Inuunerlu artornarsisarlunilu oqileqqittaraluartoq nanertisimaannarunnaarnikuuvoq.

– Arfineq-marlussoriarlunga imminut toqoriaraluarnikuuvunga. Pingasoriarlugu iluatsingajappara, iluatsivinnerlu ajorlugu. Steffen sunnerneqangaarnani oqarpoq. Soorlu oqaluttuassami ilagiinnaraa, nangipporlu:

– Kingullermik misiliigama ukiut aqqaneq-marluk qaangiupput. Eqqarsaatit taamaattut pigerusukkunnaarnikuuakka. Paneqarpunga aappaqarlungalu inooqatigilluakkannik. Nalunngilara asaneqarlunga – arlaatigut. Naammappoq, oqarpoq.

Isumalerujussuarmik soqanngilaq. Suut tamarmik isumaqarnerannik oqaasinnguineq. Piviusumilli nassuerutiginninnerinnaalluni.

– Inuunermi aqqusaakkat oqimaaqatigiipput. Nuannaarpallaassanngilanga aammali aliasuppallaassananga. Ajornakusoorsinnaasarpoq, nipaa oqimaappalulluni oqarpoq.

Immaqa taanna killiffigisimavaa. Aqqusaarnikuusani iperarsimanagit. Sorsunninni suli naammassinagu. Taakkuali akornanniilluni.