Royal Greenland kalaallit assammik arsartartuinut pingaarnertut aningaasaliisunngorpoq

TAAK Royal Greenland ukiuni pingasuni aningaasaliisussatut, isumaqatigiissuteqarfigaa. Taamaalilluni Royal Greenland Air Greenlandilu kalaallit assammik arsarlutik nunanut allanut unammisartui pingaarnertut aningaasaliisuuffigilerpai.

Taama Timersoqatigiiffiit Assammik Arsartartut Kattuffiat tusagassiuutinut nalunaarummi allappoq.

Isumaqatigiissutip TAAK-ip nunanut allanut unammisartunut assammik arsartartut pikkorinnerit anguniagaanut aamma kattuffiup nunatsinni assammik arsarnermi siammasissumik suliniuteqarneranut tapersersuissaaq.

Royal Greenlandimut suleqatissarsiornissaq pingaaruteqarpoq. Nunanut allanut unammisartut piginnaasaqarluartut tusaamaneqarnerulernissaannut aningaasaliinissamik, taamatullu timersornermik meeqqanik, inuusuttunik inersimasunillu Kalaallit Nunaanni sumiiffinni assigiinngitsuni peqataatitsisartumik tapersiinissaq pingaartinneqarpoq.

- Soorunami nunanut allanut unammisartut maligassiuilluartunillu timersornerup iluani siuttuusut tapersersorniarpavut. Uagutsinnulli aamma pingaaruteqarpoq TAAK-ip assammik arsarnermut tamakkiisumik isiginninnerat, Kalaallit Nunaannilu meeqqat inuusuttullu timersornerup ataatsisoortitsineranik pilersitsinerat. Tamanna inuiaqatigiinnut peqataaffigisatsinnut tunniussaqarusunnerput ilutigalugu tulluarpoq, Bodil Marie Damgaard, Royal Greenlandimi sulisoqarnermut attaveqarnermullu pisortaq oqarpoq.

Ukiuni pingasuni isumaqatigiissut

TAAK aningaasaliisartut suleqatigisartakkanilu eqqarsaatigalugit ukiuni kingullerni periusissiorluarnerusimavoq, assammik arsartartut pikkorissut ineriartortinneqarnissaannut aamma amerlasuunut nukittuumik ataqatigiissaarinermik pilersitsisimalluni. Tamanna Royal Greenlandip TAAK-imik siunissaq ungasinnerusoq eqqarsaatigalugu, suleqatissarsiorneranut aalajangiisuusimavoq.

- Royal Greenlandimik isumaqatigiissuteqarnitta nunatsinni assammik arsartartut ineriartortinnissaannut tunngavissaqarlualersippaatigut, unammisarfinni tamatumalu avataani. Royal Greenland nunanut allanut unammisartunut suleqataassaaq pingaarutilik, suleqatigiinnerli aamma pikkorissunik ineriartortitsinermut, inuusuttunik assammik arsartitsinermut ataatsisoortitsinermullu Kalaallit Nunaanni assammik arsarnermit pitsaanerusumik sinaakkusiinissamut pilersisitsinissamut tunngavoq.

- Taamaattumik isumaqatigiissut tulluusimaarutigaarput, aamma Royal Greenlandip nunatsinni assammik arsarnermi ineriartortitseqataasinnaanera nuannaarutigaarput, TAAK-imi siulittaasoq Carsten Olsen oqarpoq.

Isumaqatigiissut ukiuni pingasuni atuutissaaq. Royal Greenland nunanut allanut unammisartut atisaasa saqqaani takuneqarsinnaalissaaq Air Greenlandilu peqatigalugu pingaarnertut aningaasaliisuulissalluni.