TAAK-p arnat inersimasut assammik arsarlutik nunanut allanut unammisartut Nuummi katersuutsissagai

Jakob Larsenip, Nunanut allanut unammisartunut sungiusaasoq, arnat nunanut allanut unammisartut sapaatip akunnerani 10-mi Nuummi katersuunnermi peqataasussat toqqarpai. Katersuunnermi VM-imut anngunniunnissamut piareersassapput, taannalu Canadami decembarimi 2026-mi pissaaq.

- Katersuunnerup aallartinnissaanut aammalu unammisartut tamaasa takunissaannut qilanaarpunga. Unammisartut ilaat atorfinitsinneqarnerma kingorna aatsaat takussavakka. Unammisartut ilaat siullerpaamik takussavakka, atorfininnerma kingorna, Timersoqatigiiffiit Assammik Arsartartut Kattuffianniit (TAAK) tusagassiuutitigut nalunaarummi Jakob Larsen oqarpoq.

Jakob Larsen iligiit sungiusarnissai qilanaarai. TAAK-miillu arnat assammik arsartartut ataatsimoortinneqarlutik sungiusarnissaminnut periarfissaqaleqqinnerat naammagisimaarneqarpoq.

- Arnat assammik arsartartut ataatsimoortinneqarlutik sungiusarsinnaaleqqinnerat nuannaarutigaara. Kattuffik pitsaasumik ingerlanneqarpoq, assigiinngitsunik ineriartortitsineq aamma ingerlanneqarluni. Arnat ataatsimoortillugit VM-imut anngunniunnissamut piareersarnissaat pingaarnertut siunnerfigaarput, kattuffimmiit allapput.