Kalaallit Nunaanni pisanik tunisisussaatitaaneq nunatsinni aalisartunit, umiarsuaatileqatigiiffinnit, oqartussaasunit politikkerinillu ukiorpassuarni oqallisigineqangaarsimavoq.
Arctic Prime Fisheries ApS, aamma APF-imik taaneqartartoq, Tunumi Kujataanilu sinerissap avataani saarullinniarneq pillugu aalisarnermut akuersissuteqarnermini tunisisussaatitaaneq eqqortinngikkaa maanna paasinarsivoq.
Kalaallit Nunaanni pisanik tunisisussaatitaaneq nunatsinni aalisartunit, umiarsuaatileqatigiiffinnit, oqartussaasunit politikkerinillu ukiorpassuarni oqallisigineqangaarsimavoq.
Arctic Prime Fisheries ApS, aamma APF-imik taaneqartartoq, Tunumi Kujataanilu sinerissap avataani saarullinniarneq pillugu aalisarnermut akuersissuteqarnermini tunisisussaatitaaneq eqqortinngikkaa maanna paasinarsivoq.
2020-miit 2025-mut tunisisussaatitaaneq ukiumi ataasiinnarmiunngitsoq, kisiannili 2020-mi, 2023-mi aamma 2024-mi unioqqutinneqarpoq.
Tamanna Aalisarnermut, Piniarnermut, Imminut Pilersornermut Avatangiisinullu Naalakkersuisup Demokraatineersup Peter Borgip Naleqqami Inatsisartunut ilaasortap aalisarnermullu oqaaseqartartup Jens Napãtôp Arctic Prime Fisheries pillugu paragraf 37 naapertorlugu Naalakkersuisunut apeqqutaanut akissutaani kisitsisit takutippaat.
Pisassiissutit 34 procentiinnaat tunigai
Napatôk Naalakkersuisunut apeqqutinik qulinik nassiussivoq, aalisarnermullu ministerip taakku akivai.
Arctic Prime Fisheries ApS 2020-miit 2025-mut saarulliit sinerissap avataani pisat qanoq annertutigisut ukiut tamaasa agguataarlugit Kujataani tunineqarsimanersut Jens Napatôkip ilaatigut Naalakkersuisunut apeqqutigaa.
Naalakkersuisup Peter Borgip Naleqqap aalisarnermut oqaaseqartartuanut akissutaani takussutissiami APF-ip 2020-miit 2025-mut ukiumut sinerissap avataani saarulliit qanoq annertutigisut Nanortalimmi Qaqortumilu tunisarsimanerai takuneqarsinnaavoq. Ingerlatseqatigiiffik taakkunani tunisassiorfeqarpoq.
Arctic Primep 2020-mi pisassat 50 procentii Kalaallit Nunaanni tunitsivinnut ataatsinut arlalinnulluunniit tulaassussaavai. Ingerlatseqatigiiffiup pisassiissutit 34 procentiinnai ukioq taanna pisarisimagai naatsorsuutini takuneqarsinnaavoq.
”Arctic Prime Fisheries ApS-ip aalisarnermut naalakkersuisoqarfik 2020-mi allaffigisimavaa. Taamanikkut containerit qerititsiviusut Islandimit Nanortalimmut nassiunneqartut, aalisakkeriviullu suliffissaqartitsinera tunngavilersuutigalugu tunisisussaatitaanerup siunertaa naammassineqartoq Arctic Prime Fisheries ApS-ip tikkuarpaa, naalakkersuisoq 2020 pillugu ilaatigut nassuiaavoq.
Naalakkersuisut siuliisa Arctic Prime Fisheriesip tunisisussaatitaanera 50 procentiusimasumit 25 procentinut 2022-mi appartippaat. Ingerlatseqatigiiffiup tunisisussaatitaanerata affaannanngortinnissaanut suna tunngaviusimanersoq Naalakkersuisup akissutaani allaqqanngilaq.
Ukiulli tulliani pisassiissutit 19 procentiinnaat ingerlatseqatigiiffiup tunivai. 2024-milu ikinnerulaartut, tassa pisassiissutit 18 procentii tunineqarsimapput.
Taamaalilluni Arctic Prime Fisheriesip saarullittanik tunisisussaatitaanermi ukiut tallimat ingerlaneranni ukiuni 2021-mi aamma 2025-mi taamaallaat malinnissimanera Jens Napatôkip Naalakkersuisunut apeqqutigisimasaani takuneqarsinnaavoq.
Suliffeqarfiit akileraarutinik akiliinngitsoortarnerat ajornartorsiutaanngitsoq
APF-ip ukiuni pingasuni tunisisussaatitaanerup saniatigut naalakkersuisup Peter Borgip ingerlatseqatigiiffiup Kalaallit Nunaanni suliffeqarfinnut akileraarutinik akiliisimannginneranut isummerusunnginnera maluginiarnarpoq.
- Arctic Prime Greenland Islandimiut soqutigisaannut tunngatillugu ’suliffeqarfeeqqatut’ atorneqarsimanersoq Naalakkersuisut maannamut uppernarsaatissaqanngilagut, Aalisarnermut, Piniarnermut, Imminut Pilersornermut Avatangiisinullu Naalakkersuisoq Peter Borg (D) oqarpoq.
Assi: Oscar Scott Carl
Jens Napãtôp apeqqutai marluk suliffeqarfiit akileraaruteqarsimannginnerannut tunngapput. Peter Borg apeqqutinut taakkununnga marlunnut avaqqutaaraluni akissuteqarpoq. Naleqqamit aalisarnermut oqaaseqartartup apeqqutaa kingulleq imaappoq:
“Naalakkersuisut naliliinerat malillugu Arctic Prime Fisheries ApS-ip ukiumut amigartoortuaannarnerat, taamaattumillu inuiaqatigiinnut akileraartannginnerat peqqutigalugu siunissami pisassinneqartarnerannut sunniuteqartinneqartariaqartoq?”
Peter Borgip ima akivaa:
„Avataani pisassiissutit, ingelratseqatigiiffiit inatsisartuttu inatsisaata atuutilersinneqarneranit tassunga ilanngullugu Aalisarneq pillugu Inatsisartut inatsisaanni § 77 naapertorlugu § 9-mik kingusinnerpaamik ukiut qulit qaangiutsinnagit eqqortitsinissaat piumasaqaatigalugu Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni § 24 malillugu agguaanneqartarput.“
APF-ip amigartooruteqartarnera taamaalillunilu Kalaallit Nunaanni suliffeqarfinnut akileraarutinik akiliinnginnera Naalakkersuisut ajornartorsiutitut isiginngikkaat akissutini taamaalilluni erserpoq.
Naalakkersuisup apeqqummut akissutaa
Soorlu Sermitsiami februaarip sisamaani allaaserisami allassimasoq, Naleqqap aalisarnermut oqaaseqartartuata Napatôp Arctic Prime suliffeqarfittut isertortukkut akunnermiliuttuunerarlugu attuumassuteqarnerarpaa.
Inatsisartunut ilaasortap paragraf 37 naapertorlugu apeqqutimi ilaanni Arctic Prime Islandimiut iluaquserniarlugit anngiortumik nioqquteqarfiunersoq Naalakkersuisut aperivai.
„Naalakkersuisut suliffeqarfissuup Arctic Primep Islandimi soqutiginnittunut isortortukkut akunnermiliuttuuneranik maannakkut uppernarsaatissaqanngillat,“ Peter Borg akivoq.
Arctic Prime Fisheries ApS Arctic Prime Coastal ApS-imit tamakkiisumik pigineqarpoq, Islandimiullu ingerlatseqatigiiffiata Línuskip ehf.-ip pingajorarterutingajaa pigaa.
Línuskip Islandimi sunniuteqarluartumit Gudmundur Kristjánssonimit tamakkiisumik pigineqarpoq. Ukiumoortumik nalunaarusiani, Suliffeqarfinnut Qitiusumik Nalunaarsuivimmi (Det Centrale Virksomheddsregister, aaqq.) takuneqarsinnaasuni, Arctic Prime Fisheries ApS 2014-imiilli amigartooruteqangaartarsimavoq.
Jens Napãtôk paragraf 37 naapertorlugu apeqquteqarmat Aalisarnermut Naalakkersuisoqarfiup APF-ip umiarsuaataanik akiligassat misissorsimanerai Peter Borgip akissummini allassimanngilaa. Assersuutigalugu Gudmundur Kristjánssonip ingerlatseqatigiiffiisa ilaat umiarsuarnik akiligassaqarnersut, taamaappallu qanoq annertutigisumik akiligassaqarnersut.
Naalakkersuisut paarlakaajaallutik Arctic Prime Fisheries 2007-imiilli saarullittassiissutinik tunisarpaat. Ingerlatseqatigiiffik ukiorpassuarni sinerissap avataani saarullittassiissutinit tamarmiusunit annertuumik pisassinneqartarsimavoq, taamaalillunilu APF-ip Kujataani suliffissuanut tunisinissaa taamaalillunilu sumiiffimmi suliffissaqartitsinerup aalisarnerullu ineriartortinnissaa piumaasarineqartarsimavoq. Arctic Primettaaq allat assigalugit pisuussutinut ernianik Namminersorlutik Oqartussanut akiliisarpoq.
Ingerlatseqatigiiffiup Tunumi Kitaatalu kujataani saarullittassiissutit piffissami 2021-mit 2025-mut ukiumut 10.000 tonsit missaanniittut aamma 11.000 tonsit missaanniittut pissarsiarisarpai. Ingerlatseqqatigiiffiup 2020-mi pisassiissutai tamarmik tulaanneqartussaatinneqarput.
