Naalakkersuisut: Aatsitassarsiornissamut qinnuteqaatit suliarineqartarneri pisariillisarneqassapput
Naalakkersuisut aqutsisoqarfiit aaqqissuussaanerat ullutsinnut naleqqutinngitsoq isumaqarput. Aatsitassanut Ikummatissanullu Aqutsisoqarfik aamma Aatsitassanik Suliassaqarfinnut Avatangiisinut Aqutsisoqarfik pillugit aalajangersakkat ilaasa atorunnaarsinnissaat inatsisissatut siunnersuutigaat.
Naalakkersuisut aatsitassarsiornermut aqutsisoqarfik aaqqissuuteqqinniarpaat suliassat aqutsisunit immikkoortortaqarfinnut allanut nuunnerisigut. Imaanngilarli aqutsisut maannalu sulianik agguataarneq tamakkiisumik ilaannakuusumilluunniit atorunnaarsinneqarumaartut. Inatsisissatut siunnersuut oktobarip pingajuani Inatsisartut pingajussaaneerneqassaaq.
Assi: KSMS ApS og Departementet for råstoffer
Aatsitassarsiornermi sulianik pisariillisaanissamik siunertalik Inatsisartuni marlunngornermi februaarip pingajuanni aappassaaneerneqassaaq.
Ullumikkut inatsisitigut aalajangersakkat naapertorlugit aatsitassarsiornermut tunngasut ulluinnarni Aatsitassanut Aqutsisoqarfimmit aamma Aatsitassanik Suliassaqarfinnut Avatangiisinut Aqutsisoqarfik isumagineqartarput.
"Aqutsisoqarfiit
suliassat suut isumagisarissaneraat, inatsimmi aalajangersagaavoq,
aammalu aqutsisoqarfinni aalajangiinerit
naammagittaalliuutigineqarsinnaanerat inatsimmi
maleruagassiivigineqarpoq. Aatsitassanut suliassaqarfimmi
allaffissornermi misilittakkat takutippaat
allanngorartitsisinnaanerusumik aallaaveqarnissaq
pisariaqartinneqartoq. Taamaattumik siunnersuutigineqarpoq
suliassanik suliarinninnerup ilaata aqutsisoqarfinni marlunni
ingerlanneqarnissaa pillugu aalajangersakkat atorunnaarsinneqassasut." Naalakkersuisut saqqummiussinerminni taama allapput.
Aaqqissuusseqqinnissamut periarfissaq
Naalakkersuisut suliassat pisortanit immikkoortortaqarfinnut allanut nuunnerisigut aaqqissuusseqqinnissamut periarfissaqarnissartik kissaatigaat.
Imaanngilarli Naalakkersuisut maannalu suliassanik agguataarineq tamakkiisumik ilaannakuusumilluunniit atorunnaarsinneqassasut.
Taamaakkaluartoq “Naalakkersuisut suliassanik aalajangersimasunik ingerlatsivinnut aalajangersimasunut tunniussinissamut inatsisitigut pisussaaffeqalerput”.
Pinngortitamut avatangiisinullu tunngasunik suliaqarnermi, aamma suliassat siunissami aqutsisoqarfimmit naalakkersuisoqarfimmut nuunneqarpata, oqartussaasut imminnut attuumassuteqanngitsutut periuseqarneq attatiinnarneqassasoq, aamma allaqqavoq.
Partiinit sisamanit taperserneqartoq
Siumut, Demokraatit, IA aamma Atassut oqaaseqaamminni aatsitassarsiorneq pisariillisartariaqartoq allapput.
Demokraatit allannguummi maluginiarneqartoq ”tunngaviusut pingaarutillit attatiinnassavaat soorlu akuliutinnginnissaq,
naammagittaalliorsinnaaneq aammalu apeqqutinut avatangiisinut tunngasunut kiffaanngissuseqarluni
naliliinerit” allapput.
Partiilli aamma Sulisitsisunit Transparency International Greenlandimillu tusarniaanermi akissutigineqartut innersuussutigaat.
Erseqqissaaneq ammanerunerlu ujartorneqartut
Sulisitsisut siunissami qanoq aaqqissuussisoqassanersoq erseqqissarneqarnissaa piumasaraat, Demokraatillu ataatsimiititaliap suliaani tamanna qulaajarneqartariaqartoq isumaqarput.
Transparency International Greenlandip Avatangiisinut Aatsitassanullu Aqutsisoqarfik allanngortinneqarpat aaqqissuuteqqinneqarpalluunniit, akuliuttussaannginneq ammasumillu ingerlatsisoqartariaqartoq tikkuarpaat. ”Taanna isumakulunneq paasinarpoq suleriaqqinnermilu
pimoorunneqartariaqarluni”, Demokraatit allapput.
IA-p siunnersuut aamma taperserpaa, allaffissornikkut suliassat inuiaqatigiinnut 56.000-inik innuttaqartumut naleqqutinngitsut ikilisarniarlugit maannakkut kiisami iliuuseqartoqarniarnera nuannaarutigaat. Partiilli immikkoortortaqarfik nutaaq pilersinneqassanersoq, taamaaliortoqassappallu tamanna allaffissornermik oqilisarneqarani annertusineqaannassanersoq akissutiserusuppaa.
Akerleriinnermut oqallinnermullu pissutaasoq
Atassutip aamma inatsisissatut siunnersuut isumalluarfigivaa, taamaattoq; ”Naalakkersuisut taamannaannaq nutarteriuartillugit ajoraluartumik qularaarput Atassummiit, suli maanna
mut aatsitassarsiornikkut aningaasarsiorsinnaalernissatta siunissami qaninnerusumi pinissaa” allapput.
Allatut oqaatigalugu aatsitassarsiornerup isertitaqarlualernissaanik Kalaallit Nunaatalu aningaasaqarneranut tunngaviusumik inissinnissaanik takorluugaqarneq partiip qularaa.
"Maannali ajoraluartumik oqarluannaraanni, allaanngilaq ukiut tamarluinnapajaavisa inatsit
allanngortiterneqarluni piinnaleqqasoq, malittaanillu nunatsinni aatsitassarsiornikkut
isaatitsinerulernissamut sinnattoq qumaraluttuinnartoq, 2000-ikkullu aallartisimalerneranni
isumalluarujussuarsimanerungaluaq tassaalersimasoq taamaallaat maanna isummap taassuma
oqaasertaasa pavani innat akorngini akisuanerit."
Inatsisissatut siunnersuut Naleqqap itigartippaa
Naleraq partiini kisiartaalluni inatsisissatut siunnersuut itigartippaa, taakku nunatsinni aatsitassarsiornerup aallartinngisaannarsimasup matuneqarnissaanut siunertaqartoq isumaqarput. Aammattaaq Naalakkersuisut inatsisissatut siunnersuut aqqutigalungu EU-mut suli qaninnerusumik attavilerneqarnissaat siunertarigaat isumaqarput, tamannalu partii tunngaviatigut kukkulluinnartutut isigaa.
Immikkoortut 23 aamma 24 oktobarimi 2025-mi siullermeerneqarput. Aappassaaneerneq oktobarip pingajuanni pivoq, pingajuanneernerlu sapaatip-akunnerata tulliani februaarip qulingani pissalluni.
