- Sooruna politikerit danskit nunanilu allamiut suliffeqarfippassuinut Kalaallit Nunaanni kommuninut, Namminersorlutik Oqartussanut namminersortunullu akileraarummik akitsuummilluunniit pilersitsinngitsut?
Apeqqut
tamanna inuussutissarsiortup namminersortup
ilisimaneqarluartup ingerlalluartullu Martin Gjødvadip
Naalakkersuisut immikkut akileraarut pillugu siunnersuutaannik,
maanna inatsisartuni suliarineqartoq pillugu oqallinnermut
atatillugu, Sermitsiamit apersorneqarnermini qaqilerpaa.
Martin
Gjødvad, Danmarkimi najugaqartoq qarasaasialerivimmik inu:it-mik
20-nik sulisoqarluni, sulisut amerlassusaa uuttuutigalugu Kalaallit
Nunaanni anginersaasumik pilersitsisuuvoq.
Tamatuma
saniatigut ingerlatseqatigiiffimmik Inu:it Bolig-mik
piginnittuuvoq, taassumalu inissianik attartortitsineq pingaarnertut
ingerlataraa. Ingerlatseqatigiiffik aamma inissianik suliniutinik,
pingaarnertut inuinnarnut tunineqartartunik ineriartortitsinermik
suliaqarpoq.
- Akileraarutinik akiliutit Kalaallit Nunaanni akileraartarnermut aqutsisoqarfimmut akilikkagut tamaasa tunniuttarpagut, Martin Gjødvad oqarpoq.
Taannalu
maanna inatsisissatut siunnersuummik nutaamik
naammaginninngitsorujussuarnut, siunnersuummik kalaallit
suliffeqarfiinut pillaalluni akileraarummik taaguillutik
isornartorsiuisunut ilannguppoq.
Kingullermik
qullilerisutut suliffeqarfimmik Carl Lyngemik piginnittoq K’itdlak’
Knudsen, Auto-og Marine Servicemillu piginnittoq Knud Laursen,
inatsisissatut siunnersuummik isornartorsiuipput.
Immikkut
akileraarut pillugu inatsisip nutaap suliffeqarfiit danskinit
nunanilluunniit allanit aningaasaliivigineqarnerminnut, kinguaariit
nikinnerannut pisortalluunniit Danmarkimut nuunnerinut atatillugu
suliffeqarfinnik eqquinissaa, isornartorsiuisut aarleqqutigaat.
Akileraarutinut
akileerujussuarsinnaasut
Inu:it-p
pisortaa ilaqutariinni napparsimasoqarnera pissutigalugu Danmarkimut
aallarpoq. Maanna Martin Gjødvad ingerlatseqatigiiffimmi pisortatut
atuukkallarpoq.
- Inatsisit nutaaq una pissutigalugu taassuma Kalaallit Nunaannut uternissaa aarlerinartorujussuuvoq. Pisortarlu Danmarkiliaqqittariaqassaguni, nammineq aningaasaatinit, siorna 12 millionit koruunit missaanni annertussuseqartunit 17 – 19 procentiannik immikkut akileraarummik akiliisitsisoqassaaq. Taanna akileraarummik 2,5 millionit koruuninik naleqarpoq, Martin Gjødvad Sermitsiamut oqarpoq.
Ingerlatseqatigiiffiup
pigisai nalillit, naak inu:it-p pisortaa Danmarkimut aallaraluartoq,
suli suliffeqarfimmiillutik Kalaallit Nunaanni
akileraaruserneqarnerat, taassuma tikkuarpaa.
- Pisortaq Kalaallit Nunaannit annissaqanngilaq. Taamaalioraluarunimi tamanna tillinnerussaaq, Martin Gjødvad erseqqissaavoq.
Taassuma
inu:it-p Kalaallit Nunaanni amerlasuunik suliffeqartitsillunilu
ilinniartitsinera tikkuarpaa.
Gjødvad:
- Politikerit eqqarsarluartariaqarput
Politikerit
kalaallit ingerlatseqatigiffiutaannut immikkut akileraarut pillugu
inatsisissatut siunnersuutikkut kukkusumik samminnittut, Martin
Gjødvad isumaqarpoq.
- Kalaallit Nunaata suli danskit suliffeqarfii siunnersortiminnik Kalaallit Nunaannukaatitsillutik aningaasanik nunamit annissuisarnerat suli pisinnaatippaat.
- Inatsisartunut ilaasortat akileraarusiisarnermik nutaamik eqqussinnginnerminni eqqarsarluaqqaartariaqarput. Immikkummi akileraarut suliffeqarfinnik nunanit avataaneersunik kalaallit suliffeqarfiutaanut sanilliullutik unammilleqatigiinnikkut iluaqutsiititsivoq.
- Inatsisikkut nutaakkut Kalaallit Nunaanni kalaallit suliffeqarfiannik ingerlatsinissaq politikerit ajornakusoortorujussuanngortippaat.
- Kalaallit suliffeqarfii pillarneqarput, peqatigisaanillu suliffeqarfiit Danmarkimeersut maanngarlutik aningaasanik annissuinissaat suli pilerinarnerulersinneqarpoq, taanna oqarpoq.
Unammilleqatigiinnermik
equtitsisoq
Akileraartarnermut
malittarisassat iserfigiuminaallutillu paasiuminaassinnaanerat,
Martin Gjødvadip nassuerutigaa.
- Akileraarusiisarnermilli inatsisikkut nutaakkut danskit suliffeqarfiutaattut Kalaallit Nunaanni ingerlataqarneq annertoorujussuarmik pilerinarnerulersippaa. Ulluinnarni ingerlatsinermi kalaallit suliffeqarfii immikkut akileraaruserneqarnissamik aarlerinartorsiorput, akerlianillu danskit suliffeqarfii akileraaruserneqarnatik Kalaallit Nunaanni ingerlatsisinnaapput.
- Taamaalillutik danskit suliffeqarfiutaat kalaallit suliffeqarfiutaannut sanilliullutik unammilleqatigiinnikkut iluaqutserneqarput. Tamanna unammilleqatigiinnermik equtitsineruvoq, Gjødvad oqarpoq.
GJØDVADIP NUNATSINNI SULIFFEQARFIUTAI
Inu:it:
Sumiiffik:
Nuuk, Kommuneqarfik Sermersooq. Ingerlatseqatigiiffik Thistedimi,
Vejlemi Støvringimilu Danmarkimi immikkoortortaqarpoq.
Ingerlatseqatigiiffik
2023-2024-mi akileraarutinut akileereernermini 3,9 million koruuninik
sinneqartoorpoq, ukiullu siuliani 8,8 million koruuniusimapput.
Nammineq aningaasaatit siorna 12,4 million koruuniupput.
Ingerlatseqatigiiffiup
suliffeqarfeeqqat suliffeqarfiillu akunnattumik angissusillit IT-mik
ikiortarpai. Inu:it ilaatigut suliffeqarfinnut qarasaasiap
isumannaatsuuneranik attaveqaatillu isumannaatsuunerannik –
telefonimik – it-kkut attaveqaatinik – nittartakkakkut
quppernerni ineriartortitsinernik neqerooruteqartarpoq.
Ingerlatseqatigiiffiup
piginnittaa siulersuisunilu siulittaasua Martin Gjødvad, Aabybro.
Morten Kronvold Lykke Olsen, Aalborg, direktøriuvoq.
Inu:it
Bolig
Sumiiffik:
Nuuk, Kommuneqarfik Sermersooq.
Ingerlatseqatigiiffik
2023-2024-mi akileraarutinut akileereernermini 25,7 million
koruuninik sinneqartoorpoq, ukiullu siuliani 6,4 million
koruuniusimapput. Nammineq aningaasaatit siorna 77 millionit
koruuniupput.
Inu:it
Bolig Kalaallit Nunaanni inissianik suliniutinik pingaarnertut
inuinnarnut tunineqartartunik ineriartortitsisartuuvoq. Suliniutini
tamani inissiat ilaat attartortitassatut tigummisarpagut.
Ingerlatseqatigiiffiup ingerlataani inissianik attartortitsineq
pingaarnersaavoq.
Ingerlatseqatigiiffik
Nuummi arlalinnik inissianik aningaasaliivoq. Illuutit/inissiat 19-t
suliffeqarfiillu illutaat marluk.
2023-mi
ukiakkut Inu:it Boligip KNR-ip
illorsua Nuummi Kissarneqqortuunnguamiittoq pisiaraa. Tassani
inissiat minnerit 72-t tunisassat sanaartorneqassapput. Inuit:it
naapertorlugu sanaartukkat svanemik ilisarnaateqarlutik
piujuartitsisuussapput, illullu iluani silaannarissuunissaq
aallullugu sanaartornermi qisuit pingaarnertut atorneqassapput,
kiassarnerlu kiassarnermik atueqqiinikkut immikkoortitaartumik
pisariaqartitsinermik qunneqartuussaaq, ingerlatseqatigiiffillu
naapertorlugu oqorsaatai sanaartornermi piumasarineqartunit
annertunerussapput. Naqqani caféqassaq, allaffeqarluni
pisiniarfeqarlunilu. Sanaartorneq qanittumi aallartittussaq 2027-mi
naammassineqartussatut naatsorsuussaavoq.
Ingerlatseqatigiiffimmi
piginnittoq pisortarlu assaavoq Martin Gjødvad, Aabybro.
Issuaaffik:
CVR
Danskit
nunanilu allamiut suliffeqarfiini siunnersortit Kalaallit Nunaanni
suliaqartut, angerlaraangamik akileraarutinik nunatsinnut qimatsineq
ajorput. Ingerlatseqatigiiffimmut akileraarutinik, iluanaarutinit
akileraarutinik akileraarutinilluunniit A-nik akiliineq ajorput,
taanna oqarpoq.
Danskit
suliffeqarfiutaasa akitsuusigaanissaat siunnersuutigaa
- Inuiaqatigiinnut akilersueqataanngillat, akileraarutitigut allatigulluunniit nunaqqatigiinnut tapersiinikkut. Danmarkimi suliffeqarfimmik pilersitsiinnarsinnaavunga Kalaallillu Nunaanni suliassanik pissarsillunga. Ajornannginneruvoq qularnaannerullunilu, taamaaliorninnilu Danmarkimut akileraaginnassaanga.
- Tamannali politikerit isiginianngilluinnarpaat. Sooq Inatsisartut akileraarummik akitsuummilluunniit 15 procentimik, danskit nunanilu allamiut suliffeqarfippassuinut Kalaallit Nunaanni sulillutik kommuninut, namminersorlutik oqartussanut namminersortunullu sullissisunut akileraarusiinngillat? Taamaaliornikkut Kalaallit Nunaanni suliffeqarfimmik taamatut akitsuusigaanngitsumik pilersitsinissamut pilerilersitsisoqassaaq. Aaqqissut taamaattoq ajornaatsuaraavoq, Martin Gjødvad oqarpoq.
Akileraarutinut
100 millioninik akiliisimasoq
Inatsisartut
inatsisaat nutaaq atorlugu nunatsinni suliffeqarfiutimini marlunni
pisortamik nutaamik atorfinitsitsinissaq qunugaa.
- Pisortaq arlaannik patsiseqarluni Kalaallit Nunaat qimallugu nuuttariaqalerpat, nutaamillu pisortassarsiortariaqalissaguma qanoq pisoqassava? Taamaattoqassagaluarpammi suliffeqarfik nammineq aningaasaatimi 17 – 19 procentillu akornanni pillaammik akileraarummut akiliisariaqalissaaq. Tamannalu ingasattajaarneruvoq, Martin Gjødvad oqarpoq.
Taassuma
suliffeqarfiutai tassaapput inu:it aamma Inu:it Bolig taakkulu Kalaallit Nunaannut akileraartarput, Danmarkimullu
nunanulluunniit allanut akiliisarnatik.
Martin
Gjødvadip ukiuni 30-ngajanni Kalaallit Nunaanni suliffeqarfinnik
ingerlatsilluni Kalaallit Nunaannut 100 millionit sinnerlugit
akileraarutinik akiliisimanini oqaluttuaraa. Taakku
ingerlatseqatigiiffinnut akileraarutinut, iluanaarutisianit
akileraarutinut akileraarutinullu A-nut akiliutaapput.
- Tamanna tulluusimaarutigaara. Suna tamaat sakkugalugu akileraarutikka Kalaallit Nunaannut akiliutiginiartarpakka, naallu Danmarkimi najugaqaraluarlunga Danmarkimut akileraarutinik akiliinngingajavittarpunga, taanna oqarpoq.
Inissianik
amerlasuunik sanaartorneq aallartingajaleraa
Martin
Gjødvadip ingerlatseqatigiiffiutimi marluk inu:it-p Inuit:it Bolig-lu Kalaallit Nunaanni isertitai tamaasa
aningaasaliissutigeqqittarpai.
- Nuummi KNR-itoqqap toqqaviani inissianik 72-inik sanaartorneq aallartingajalerpara. Suliakka tamarmik Kalaallit Nunaanni ingerlataapput. Inatsisiliortulli, politikerit immikkut akileraarummik eqqunniakkaminnik uannit suna pissarsiarerusunneraat paasisinnaanngilara, Martin Gjødvad oqarpoq.
Inatsisartut
aningaasaqarnermut akileraartarnermullu ataatsimiititaliaata
aningaasarsianit akileraarutit pillugit inatsimmut allannguutissatut
siunnersuut sisamanngornermi ulloq 18. december suliaraa.
Inatsisissatut siunnersuut Inatsisartut ulloq 2. februar
aappassaaneerlugu suliarissavaat.
Aningaasaqarnermut
Akileraartarnermullu Naalakkersuisoq Martin Gjødvadip
isornartorsiuineranut oqaaseqaqqullugu qinnuigaarput. Tamannali
pisinnaasimanngilaq.
- Naalakkersuisut nittartakkakkut qupperneranni kingusinnerusukkut akissummik tamanut saqqummiussisoqarnissaa, Aningaasaqarnermut Akileraartarnermullu Naalakkersuisup Múte Bourup Egedep aalajangerpaa.
Taama
Aningaasaqarnermut Akileraartarnermullu Naalakkersuisoqarfik
ataasinngornermi ulloq 15. December tallimannguleraa mailikkut
allappoq.
