Inatsisartunut ilaasortaq: Inortuikulasoqaqaaq

Inatsisartunut ilaasortat Kalaallit Nunaanni ataatsimiittarfinni ataqqinarnerpaatut taaneqartartumi, tassa Inatsisartut ataatsimiittarfianni, ataatsimiissatillutik takkutinngitsoorlutilluunniit inortuikulaqisut, Naleqqameersoq, Jens Napãtôk’, isornartorsiulluni Sermitsiamut oqarpoq.

- Takkutinngitsoortut, inortuiuaannartut isiginnaarpagut. Namminneq partiiminni akisussaaffigimmassuk uagut susassarinngilarput, taanna oqarpoq.

Taassuma Inatsisartunut ilaasortat peqanngikulaarnerat ulluinnarsiutinngorsimasutut nalilerpaa.

- Tassa taamaalersimavoq, Jens Napãtôk’ oqarpoq.

Taassumali kikkut taama uparuarnerlugit aperineqaraluarluni oqaaseqarfigiumanngilai. Partiilli anginerit siulittaasui tamatuminnga siusinnerusukkulli apuussiffigisarsimallugit aamma oqaatigaa.

Siulittaasoq illersuisoq

Inatsisartunut ilaasortat atilerneqanngitsut Naleqqameersumit isornartorsiorneqarnerat, Inatsisartut Siulittaasuata, Kim Kielsenip (ATT), akuersaanngilaa. Taassuma oqarnera naapertorlugu inersuarmi ataatsimiiffimmiinngikkaluarluniluunniit malinnaasoqartarpoq.

- Inatsisartut ataasiakkaat inersuarmiinngitsut allaffimminni ataatsimoortarfinniluunniit malinnaarujoortarput. Taava taasisoqaleraangat aqutsisoq inersuarmiittunik kisitsereertarpoq. Taava ilisimatitsisarpoq Inatsisartunut ilaasortat inersuarmukarnissaannik kaammattorlugit, taasineq qanittukkut pisussaammat, Kim Kielsen Sermitsiamut oqarpoq.

Naleraq: Tamatta najuuttariaqaraluarpugut

Inatsisartut ataatsimiittarfiannili qinikkat 31-it tamarmik najuuttariaqaraluartut Naleqqameersoq isumaqarpoq.

- Pisussaaffiliigami pissaanermik tigummineq. Inatsisartunut ilaasortat tamarmik pisussaaffigaat qulakkiissallugu Inatsisartunut ilaasortat ataatsimiinnermi tamarmiusarnissaat, Jens Napãtôk’ oqarpoq.

Sermitsiap ataatsimiinnerni malinnaasarnermini, partiit ilaasortaatitaat 31-it, tamarmik inersuarmiinneq ajornerat, aamma takusarpaa. Tassa imaappoq isornartorsiuisup partiiata Naleqqap, imaluunniit partiit allat, ilaasortaatitaat tamatigut tamarmiullutik inersuarmi ataatsimiiffimmiinneq ajorput.

Tamannali pisussaaffioreermat immikkut inatsisiliuunneqarnissaa neriuutigineqanngilaq.

- Neriuppunga inatsisiliortariaqalissanngitsoq, tassami takkuttarnissaq pisussaaffiliivoq, Jens Napãtôk’ oqarpoq.

Amigarlutik unikkallartut

Inatsisartut sapaatit akunnerata siuliani aalajangiillutik taasisussaatillutik amigarput. Tassa ilaasortat affaannit ikinnerusut inersuarmi najuummata. Tamanna sulinerup unitsikkallarneqarneranik kinguneqarpoq. Taassuma kingorna qinikkat tamat oqallittarfiini imminnut nittarsaateqattaartut takuneqarsinnaapput. Pisoq tamanna Inatsisartut Siulittaasuata annerusumik oqaasissaqarfiginngilaa.

- Uanga angalavunga, taamaattumik qanorpiaq pisoqarsimanersoq ersarissumik paasinngilara, taamaallaat tusagassiutitigut takuara, Kim Kielsen oqarpoq.