KL

DK

19-inik ukiulik toqutseriarsimasutut pisuutinneqarluni pineqaatissinneqarpoq, killiligaanngitsumilli paarnaarunneqassanngilaq

Arnanut inuusuttunut biiliniittunut aallaasersorsimasutut allanillu arlalitsigut pinerluttuliorsimasutut, angut inuusuttoq ukiuni tallimani pineqaatissinneqarsimasunut inissiisarfianiittussanngortinneqarpoq. Killiligaanngitsumik paarnaarunneqarnissaanut unnerluussisussaatitaasup kissaateqarnera, eqqartuussiviup itigartippaa.

Eqqartuussiveqarfik Sermersuumi eqqartuussineq ulluni tallimani ingerlanneqarpoq.
Morten Okkels Morten Okkels Tusagassiortoq
Saqqummersinneqarpoq

Angut 19-inik ukiulik, Eqqartuussiveqarfik Sermersuumi sapaatip akunnerani kingullermi sisamanngornermili eqqartuunneqartoq pingasunngornermi ualikkut pineqaatissinneqarpoq.

Toqutseriarsimasutut eqqartuussinermi pineqaatissinneqarluni ukiuni tallimani pineqaatissinneqarsimasut inissiisarfianniittussanngortinneqarpoq.

Unnerluutigineqartuni ilungersunarnerpaaq juunip 27-ani 2025-mi pisumut, tunngavoq. Tassani arnat inuusuttut pingasut biiliniittut timmiarsiummik aallaasersorfigai. Arnanut marlunnut toqutseriarsimasutut pingajuannullu navianartorsiortissimasutut pineqaatissinneqarpoq.

- Unnerluunneqartup (...) toqutsissutaasinnaasoq nalusimagunanngilaa, taamaattumillu piaaraluni iliuuseqarsimavoq, eqqartuussisoq oqarpoq.

Unnerluussisussaatitaasoq angut inuusuttoq taanna piffissaligaanngitsumik paarnaarunneqarnissaanik piumasaqaraluarpoq, tamannali pinngilaq.

Apeqqummi tassani eqqartuussinermi nakorsat siunnersortit nalunaarutaat naapertorlugu, pinerluuteqartup pinerluttuliornermini ukiukittuusimanera maannamullu pillagaasimannginnera eqqartuussiviup pineqaatissiissut taama nassuiaateqarfigaa.

Eqqartuussiviup pissutsit tamaasa eqqarsaatigeqqissaareerlugit ukiuni tallimani parnaarussaanissaa aalajangerpaa.

- Eqqartuussiviup killilimmik parnaarussivimmiittussanngortitsinnginnera nuannaarutigeqaara, illersuisoq Kirsten Birch oqarpoq.

Angut 19-inik ukiulik aamma assigiinngitsunik, soorlu nammineq atugassaminik hashimik 50 grammimik tigummiaqarnermigut, aqqusinermi ujajaaniarnermik kiisalu arlaleriarluni nakuusernermigut oqartussaasullu ataqqinaataannik asissuisimanermigut, pisuutinneqarpoq.

Savilersorluni saassussisimasutut Nuummilu neriniartarfimmi tillinniarsimasutut unnerluutigineqarnermini aamma pinngitsuutinneqarpoq.

Angut 19-inik ukiulik pineqaatissinneqarpoq. Eqqarsarfissaatitaq ulluni 14-ini unnerluussisussaatitaasumit, atorneqassaaq. Taamaattumik oqaatigineqarsinnaanngilaq pingasunngornermi aalajangiineq, inaarutaasumik eqqartuussutaassanersoq.

Eqqartuussisoq angummut inuusuttumut toqqaannartumik oqaaseqarluni naggasiivoq:

- Alloriaqqinnissannut periarfissaqarluarputit. Silatusaartumik piffissaq atoruk.

aallaasersorneq inuiaqatigiit eqqartuussiveqarfik sermersooq toqutseriarsimasutut kirsten birch pineqaatissinneqarsimasut inissiisarfia

Atorfiit tamaasa takukkit

PODCASTI

Powered by Labrador CMS