24-nik ukiulik toqutseriarsimasutut pinngitsaaliisimasutullu eqqartuunneqartoq
Angut 24-nik ukiulik Qaqortumi toqutseriarsimasutut pinngitsaaliisimasutullu sisamanngornermi ullaap tungaani eqqartuunneqarpoq. Angut tarnikkut katsorsagassanngortinneqarpoq.
Suliaq Eqqartuussisoqarfik Kujallermi suliarineqartoq Eqqartuussisoqarfik Sermersuup inaataani suliarineqarpoq. Unnerluutigineqartoq immikkut ittumik atugaqarmat suliaq Nuummut nuunneqarpoq.
Assi: Morten Okkels
Qaqortumi pisimasoq sakkortooq sisamanngornermi ullaap tungaani naammassineqarpoq, Nuummilu eqqartuussut atuarneqarluni. Eqqartuussiviup angut 24-nik ukiulik toqutseriarsimasutut, kujanninngikkaluarluni pinngitsaaliisutut aamma kujannilluni pinngitsaaleeriarsimasutut uppernarsarneqartutut nalilerpaa.
Katsorsagassanngorlugu eqqartuunneqarpoq. 24-nik ukiulik 2025-mili juulimi Aarhusimi R3-mi, kalaallinik katsorsaanissamik immikkut suliaqarfimmi, tarnip pissusaanik ilisimasallit immikkoortortaqarfianniippoq.
Pisoq apriilip 17-ianni 2025-mi ullaakkut pivoq. Angutip arnaq savimmik saassuteriarlugu qimissimagaa unnerluussummi atuarneqarsinnaavoq. "Niparatik toqorusuppit imaluunniit anniarlutit?" aperisimagaa atuarneqarsinnaavoq.
Angut pisuunnginnerarpoq. Ullaaq taanna ima aalakoortigisimavoq silaarussimalluni, oqarpoq.
Ilisimannittut arlaqartut pingasunngornermi oqaluttuartinneqarput. Arnap pinerlineqartup nassuiaanera matoqqasumi ingerlanneqarpoq, taannalu eqqartuusseqataasunit uppernartutut nalilerneqarluni. Aamma uppernarsaatit takussutissat angutip pisuuneranik takutitsisut eqqartuussivimmi nalilerneqarpoq.
Eqqartuussivik sakkukinnerusumik aaqqiissuteqartoq
Unnerluussisup Line Pedersenip angutip tarnikkut ajornartorsiutai ilungersunartut pillugit uppernarsaatit arlallit saqqummiuppai. Naliliinerit naapertorlugit angut skizofrenimik nappaateqartoq eqqunngitsunillu takusuusisartutut nalilerneqarpoq. Ilaatigut nammineq immikkut piginnaasaqarluni anersaanut ajunngitsunut ajortunullu attaveqarsinnaasutut imminut isigisoq.
Taamaattumik unnerluussisup tarnikkut nappaatilinnut napparsimmavimmut unitsinnissaa piumasaraa, eqqartuussivilli aalajangerpoq katsorsarneqartariaqartoq.
Pineqaatissiissut sakkukinnerumaarpoq, angummi eqqartuussivimmut sassartinneqaqqinnani pisinnaatitaaffinnik aalajangersimasunik pissarsisinnaammat. Eqqartuussutilli Danmarkimiiginnarluni tarnikkut nappaatilinnut piffissaligaanngitsumik napparsimmavimmiinnissaa atuutiinnassalluni.
Angutip siornatigut assigusumik pinerluuteqarsimannginnera eqqartuussutip aalajangernissaanut eqqarsaatigineqarsimasoq, eqqartuussisup eqqartuussutip atuarnerani oqarpoq.
Angut 24-nik ukiulik pinerluffimminut 120.000 koruuninik aamma akiliisussanngortinneqarpoq.
Angutip eqqartuussut akueraa. Unnerluussisussaatitaasup eqqarsarnissamut piffissaq atorumavaa, taamaalillunilu ullut 14-it ingerlaneranni suliaq Nunatta Eqqartuussisuuneqarfianut suliareqqitassanngortinneqassanersoq aalajangertussaassallugu.
