27-nik ukiulik killisiorneqarnermini toqutsisutut nassuerpoq

Angutip 27-nik ukiullip, aggustip 30-ani Ittoqqortoormiini angummik 39-nik ukiulimmik toqutsisutut unnerluutigineqartup eqqartuussutigineqarnera ullumi nanginneqarpoq.

Unnerluussisoq Lars Petersen takunnissimasoq ataaseq peqataasussaajunnaarsimmagu, takunnissimasoq ataasiinnaq oqaluttuartussanngorpoq.

Videokkut attaveqaammik atuisoq tassaavoq politii Ittoqqortoormiineersoq, taassumalu unnerluutigineqartoq aggustip 30-ani tigusarineqarmat killisiorpaa.

Politiassistentip oqarnera naapertorlugu 27-nik ukiulik apersorneqarnermi nalaani eqqissisimavoq.

Unnerluutigineqartoq aalakoorluni tigusaavoq, illersuisorlu aperivoq unnerluutigineqartoq killisiorneqarami qanoq aalakoorsimatiginersoq.

- Pineqartoq killisiorneqarsinnaasimavoq. Killisiorneqarpoq, eqqissisimallunilu nipaappoq, imigassartorsimanera naamaneqalaarsinnaalluni, sanipuganili, politiassistant oqarpoq.

Takunnissimasunut marlunnut toqutsisimanerartoq

Takunnissimasut tallimat unnuami toqutsiffiusumi unnuup qanoq ingerlasimanera ippassaq oqaluttuaraat. Ikinngutit ilaasa festerneranni kamalluni ingerlasoq takusimallugu, arnaq oqaluttuarpoq.

Takunnittut pingasut angut 39-nik ukiulik festernermi allami naapippaat, taakkualu tamarmik uppernarsarpaat angutit marluk kisimik angerlarsimaffimmiiginnarlutik sinneri festernerup kingorna ingerlaqqissimasut.

Tamatuma kingorna arnap takunnittup unnerluutigineqartoq takoqqippaa, taassumalu ima oqarfigaa: “Toqoreerpara, naammalerpoq.”

Angutip 27-nik ukiullip ataataminut angerlarniarluni oqarfigaa.

Ataatami illuani nukkani naapippaa, taassumalu ippassaq takunnissimasutut oqaluttuaraa unnerluutigineqartoq oqartoq angut 39-nik ukiulik toqussimagini.
Unnerluutigineqartoq tamatuma kingorna nukkami siniffiani sinilerpoq. 

Aggustip 30-ani ullaakkut angut 39-nik ukiulik toqungasoq illumi unnuaq taanna unnerluutigineqartoq fiisterfigisimasaani nassaarineqarpoq.

Killisiorneqarluni qissasertoq

Unnerluutigineqartoq aggustip 30-ani killisiorneqarami allatut oqaluttuarpoq. Unnerluussisussaatitaasup killisiorneqarnera pillugu nalunaarusiaq atuffassutigaa.

Unnerluutigineqartup illersuisuata oqaatigaa unnuaq taanna eqqaamasaqannginnami, unnerluutigineqartoq eqqartuussivimmi nassuiaarusunngitsoq.

Killisiorneqarnerulli nalaani oqarpoq angut 39-nik ukiulik kamangaarami anisitaasimasoq. Allat animmata, angut 27-nik ukiulik kisimiilluni illumi eqqiaasimasoq. Kingornalu ataataminnut angerlarluni.

Politiip unnerluutigineqartoq killisiuinerup naalaani angut 39-nik ukiulik toqussimaneraa aperimmagu, taanna qissaserpoq.

Sooq taamaaliorsimanerluni aperineqarami oqaluttuarpoq meeraalluni ukiup ataatsip missaani angutip 39-nik ukiullip angerlarsimaffiani najugaqarsimalluni, angut taanna unnerluussaasup arnaanik aappaqarmat.

Unnerluutigineqartoq angummut 39-nik ukiulimmut toqungasumut nakuusersimasutut siornatigut eqqartuunneqarsimavoq, unnerluussisullu oqaatigaa unnerluutigineqartoq tamatumunnga atatillugu qaammatini arfinilinni pineqaatissinneqarsimasunut inissiisarfimmiittussanngortinneqarsimasoq.

Toqutsinermut sakkugineqartoq nassaarineqanngitsoq

Unnerluutigineqartoq tarnimigut qanoq innersoq misissorneqarpoq, misissuinermilu nalunaarusiap takutippaa, tarnimigut peqqissuusoq pisullu nalaani sianissutsimigut napparsimanngitsoq.

Unnerluussisup eqqartuussinermi nassuiarpaa unnerluutigineqartoq toqutsisuusimassasoq.

- Suut tamarmik imminnut naapertuupput. Unnerluutigineqartup nassuiaataa, takunnissimasut nassuiaataat teknikkikkullu misissuinerit inerneri — suut tamarmik imminnut naapertuullutik ataatsimut tikkuussipput — tassa unnerluutigineqartup tungaanut.

- Suliami matumani qularuteqartoqarsinnaanngilaq, ataasiinnarlu suliami pineqaatissinneqarsinnaavoq, tassaavorlu unnerluutigineqartoq, Lars Petersen oqarpoq.

Unnerluussisussaatitaasup ukiuni arfineq-marlunni pinerluuteqarsimasunut inissiisarfimmiittussanngortinnissaa piumasaraat.

Illersuisorli isumaqarpoq uppernarsaatit eqqortumik saqqummiunneqanngitsut, ilaatigut toqutsisoqarnerani takunnissimasoqanngimmat sakkulu nassaarineqarsimanngisaannarluni.

- Pinerluuteqartoqarpat aamma oqaatigineqarsinnaasariaqarpoq sakkoq qanoq atorneqarsimanersoq. Oqarsimavoq illumut ilisimallugu, kisiannili tassani sakkoqanngilaq, illersuisoq Martin Due Lomholdt oqarpoq.

Taamaattumik illersuisup pineqartoq pinngitsuutinnissaa piumasaraa.

Eqqartuussut decembarip 29-anni aalajangerneqarsimalluni nalunaarutigineqassaaq.