Aarhusimi politikerit Naalagaaffeqatigiinni innuttaasut atugarissaarnerulerlutillu ataatsimoornerulernissaat siunnersuutigaat

Aarhus Kommunemiit kalaallinik savalimmiormiunillu Naalagaaffeqateqarneq iliuuseqarfigineqarnerusariaqarpoq. Kommunalbestyrelsimut ilaasortat Jesper Kjeldsen (Soc.) Jakob Søgaard Clausenilu (DD) isumaqarput, taakkualu susassaqarfiit akimorlugit ataavartumik iliuuseqartoqartarnissaa siunnersuutigaat, tassa kalaallit savalimmiormiullu akornanni atugarissaarnerulersitsisoqarlunilu Naalagaaffeqatigiinneq illoqarfimmi takussaanerulersillugu.

Politikerit taakku marluk Danmarkip, Kalaallit Nunaata Savalimmiullu illoqarfimmi aallunneqarnerunissaannik pisariaqartitsisoqartoq isumaqarput.

– Naalagaaffeqatigiinneq ataatsimut oqaluttuarisaanitta ilagaa pingaarutilik, ataatsimulli siunissarput suli pingaaruteqarneruvoq. Kalaallit Savalimmiormiullu Aarhusimi najugallit illoqarfimmi ataatsimoornermi pissusissamisoortumik takussaasumillu peqataasutut misigisarnissaat akisussaaffigaarput. Taamaattumik ataavartumik ataatsimullu isigisumik iliuuseqartoqartarnissaa kissaatigaarput, atugarissaarnermik nukittorsaasussamik aamma Aarhusip, Kalaallit Nunaata Savalimmiullu ataqatigiilluarnerisa ersarinnerunissaanik, kommunalbestyrelsimut ilaasortaq Jesper Kjeldsen oqarpoq.

Jesper Kjeldsen Kalaallit Nunaanni najugaqartarnikuullunilu sulisarnikuuvoq, Naalagaaffeqatigiinnerlu pillugu assigiinngitsutigut ukiorpassuarni akuusarnikuulluni.

Susassaqarfiit akimorlugit iliuuseqarneq politikikkut angu

Aarhus Kommunemi immikkoortortaqarfinni tamani Naalagaaffeqatigiinneq qanoq nukittorsarneqarsinnaanera immikkut iliuuseqarfigineqassasoq siunnersuutigineqarpoq.

Suliniutit kulturimut, ilinniartitaanermut, sulisoqarnermut, akuutitsinermut, isumaginninnikkut suliniutinut, aaqqissuussinermut, illoqarfimmi sumiiffiinni aamma kalaallinik savalimmiormiunillu suleqateqarnermut tunngasinnaapput.

Suliniut Naalagaaffeqatigiinnermut Aarhus Kommunemilu kulturikkut ataatsimoornermut politikkimik kinguneqarumaartoq anguniarneqarpoq.

Politikerit taakkua marluk Naalagaaffeqatigiinnerup illoqarfimmi takussaanerulernissaa, soorlu Kalaallit Nunaata Savalimmiullu inuiattut ullorsiorneranni erfalasulertalernikkut, kiisalu eqqumiitsulianik imaluunniit qiperukkanik Danmarkip, Kalaallit Nunaata Savalimmiullu oqaluttuarisaanikkut kulturikkullu ataqatigiinnerannut takussutissanik illoqarfimmi peqalernissaa aamma siunnersuutigaat.

Jesper Kjeldsen aamma Jakob Søgaard Clausen partiinut assigiinngitsunut ilaasortaagaluarlutik suleqatigiillutik siunnersuusiortuupput, kommunalbestyrelsimilu taperserneqarluarnissatik neriuutigalugu.

– Kalaallit Nunaat, Savalimmiut Danmarkilu Kunngeqarfimmi ataatsimoorput, tamannalu Aarhusimi aamma malugineqarsinnaasariaqarpoq. Taamaattumik kommunalbestyrelsimi ilaasortat tamarmik kalaallit savalimmiormiullu kommunitsinni pingaartinneqartut, taakkualu Aarhusimi toqqussisimallutillu angerlarsimasutut misiginissaat immikkut iliuuseqarfiginissaat takutissagaat neriuutigaara, kommunalbestyrelsimi ilaasortaq Jakob Søgaard Clausen oqarpoq.

Siunnersuuteqartut Aarhus Kalaallit Nunaannut Savalimmiunullu ilinniartitaaneq, kulturi, peqatigiiffilerineq inuillu akornanni attaveqatigiinneq aqqutigalugit ukiorpassuarni attaveqarluartoq oqarput.