Aasivik ukiuni 50-nngortorsiorneqalerpoq

Narsami ulluni sisamani Aasivik ingerlanneqassaaq. Pilersaaruterpassuaqarpoq, aaqqissuussallu silami ingerlanneqassallutik.

Aasivik ukiormanna Narsami, Narsap Iluani taaneqartartumi ingelanneqassaaq. Asseq Nuup kangerluani Kapissit eqqaani 2012-mi Aasivik ingerlanneqarnerani assilisaavoq.

Foto: Leiff Josefsen

Masauna Peary Masauna Peary Tusagassiortoq

Saqqummersinneqarpoq 7. Juuli 2026 - 17:01

Aasivik ukiuni 50-nngortorsiorlugu Narsap Iluani taaneqartartumi, minutsini qulit 15-nillu missaani illoqarfimmiit biilerluni tikinneqarsinnaasumi, ulluni sisamani, juulip qulingiluaaniit aqqaneq-aappaat ilanngullugu, imigassartaqanngitsumik silami aaqqissuussinerit ingerlanneqassapput.

Nipilersoqatigiit 15-nit Aasivittoqarnerani nipilersortuussapput, soorlu ilaatigut nuannarineqarluartut Sauwestari, Naneruaq, Piitsukkut aamma Isua Band.

Aaqqissuisut Aasiviup ingerlanneqarnissaanut pilersaarutitik naammassisimavaat.

Ussassaarut

- Nipilersoriartorlutik tikittussat utaqqisaaginnalerput, Oleeraq Nielsen aaqqissueqataasoq Sermitsiamut oqarpoq.

Pilersaarutit allat

Aasiviup ilisarnaatigilluagaasa ilaat oqallitsitsineq aamma ukiormanna pilersaarutini takuneqarsinnaavoq.

Aasivik ukiuni 50-nngortorsiorlugu ingerlanneqarnissaanut aaqqissuisut piareerluinnarsimasut, aaqqissueqataasup Oleeraq Nielsennip oqaatigaa.

Kristine Lynge-Pedersen attaveqariaaseq pillugu eqimattakkaarluni oqallitsitsinermik ingerlatsissaaq, kingorna saqqummiinertalimmik.

Ilaatigut pilersaarutaapput Sorlak meeqqanut eqqumiitsuliornermi suliaqartitsissasoq isiginnaagassianik timersuutinillu takutitsisoqassaaq kiisalu Aasiviup oqaluttuarisaanera oqaluttuarineqassalluni. Pilersaarutit allat Aasivik Narsaq 2026 facebookkimi quppernerani atuarneqarsinnaapput.

Kujataarmiut Narsaliakaassangatinneqartut

Narsap avataaniit tikittussat amerlanissaat ilimagineqarpoq.

- Minkeqarfiup eqqaani aamma talittarfeeraqartussaavugut, taanna atorneqarsinnaassaaq, Oleeraq Nielsen, aaqqissuussisunut ilaasoq oqarpoq.

Oleeraq Nielsennip nunap panernera eqqarsaatigalugu sila siallilaartaraluarpat ajorinagu ilanngullugu oqaatigaa. Massakkumullu ulapittorujussuullutik eqqaallugu.