Aatsitassarsiorfik ajorsaqqittoq: Kuannersuarni misissuinerup sivitsorneqarnissaa itigartinneqarpoq

Aatsitassarsioqatigiiffik Greenland Minerals nunami aatsitassarsiornermik suliniummut akerleriissutaanerpaamut tunngatillugu ajorsaqqippoq.

Naalakkersuisut Kuannersuarni aatsitassarsiornissamut misissuinissamut akuersissummik sivitsuinissaq sisamanngormat itigartitsissutigaa.

Naalakkersuisut tusagassiuutitigut nalunaarummi allapput.

Sumiiffimmi annertunerusumik ujaasineq uranimut inatsimmut naapertuuttumik kinguneqarsinnaassanngitsoq naliliisoqarmat, sivitsuinissaq pillugu qinnuteqaatip itigartinneqarnissaa pillugu aalajangiisoqarsimasoq paasissutissiissutigineqarpoq.

Greenland Minerals Australiamiittumiit Energy Transition Mineralsimiit (ETM) pigineqarpoq, suliffeqarfiullu pisortaata misissuinissamut akuersissummik arsaarneqarnissartik ernumagalugu ukioq manna siusinnerusukkut oqaatigaa. Sivitsuinissamik qinnuteqaat itigartitsissutigineqassappat suliffeqarfiup pisinnaatitaaffii unioqqutinneqassasut pisortaq isumaqarpoq.

Ingerlatseqatigiiffik uranisioqqusaannginnermik inatsisip atuutilerseqqinneqarnikuunera pissutigalugu Namminersorlutik Oqartussanut akerleriissuteqareerpoq. Ingerlatseqatigiiffik taarsiivigineqarnissamik piumasaqarluni eqqartuussivilersuivoq, taakkumi naapertuilluanngitsoqarneranik piiaanissamut akuersissummik tunineqarumanatik isumaqarput.

Ingerlatseqatigiiffiup Namminersorlutillu Oqartussat akornanni suliaq Nunatta Eqqartuussisuuneqarfiani suliarineqassaaq. Eqqartuussivik isumaqatigiissitsiniartartup suliffeqarfiup Naalakkersuisullu akornanni suliamik suliaqarnissamut piginnaatitaanani 2025-mi oktobarimi aalajangerpaa, tassungalu atatillugu Greenland Minerals A/S Naalakkersuisut aningaasartuutaasa 90 procentiinik akiliisussanngortinneqarpoq, tassa 14.354.937,07 koruuninik.