Air Greenlandip aasaanerani angallassisarnini allanngortikkai
Nuup qulaani silaannartamik killilersuinerit aasaanerani pilersaarutit inniminniisarnerillu aaqqigallernissaat pisariaqalersikkaa, Air Greenland nalunaarpoq.
Angalasut ilaannut taakku inniminniigaasa nutaat angalanerup nalaani unnuineq kingunerissagaa, Air Greenland ilisimasaarivoq.
Foto: Oscar Scott Carl
Air Greenlandip 2026-mi aasaanerani aallarfissat inniminnikkallu
arlallit allanngortinnissaat ilimagaa. Ilaasut eqqorneqartut piffissami
aggersumi aallarfissaminnik nutaamik ilisimatinneqassapput.
Taama timmisartortitseqatigiiffik nittartakkakkut quppernermini nalunaarpoq.
– Amerlanerpaanut allannguineq annikitsuaraassaaq, angalasunulli atasiakkaanut
aaqqigalliineq angalanerup nalaani unnuinermik kinguneqarsinnaasoq, Air
Greenland allappoq.
Timmisartortitseqatigiiffiup
allannguinerit Nuummi oqaluuserineqaqisunik unammilligassaqartoqarneranik
tunngaveqartippai:
– Angalanissamik pilersaarutitta Nuup Mittarfiata silaannartaani
killilersuutinik atuuttunik suli malinninnissaa qulakkeerniarlugu, allannguinerit
pisariaqarput. Allannguinerit persaqqusersuutigisinnaasaat ajuusaarutigaarput,
angalasussallu tamaasa isumannaatsumik angalalluarnissaannik kissaappagut.
Aallarfissat sorliit qanorlu amerlatigisut eqqorneqarnersut, Air
Greenlandip itisilinngilaa.
Nalunaaquttap akunneranut
ingerlatat sisamat
Nuup Mittarfianut killilersuutit pineqartut 2025-p ukiaanerani
atulersinneqarput, taamanikkummi silaannakkut angallattut
naammassinnissinnaassutsimut sanilliullugit annertuallaalersut, Trafikstyrelse
naliliivoq.
Taamaammat malittarisassanik ilaatigut mittarfimmi nalunaaquttap
akunneranut ingerlatanik sisamanik (tikinnerit aallarnerilluunniit)
killiliisumik malittarisassanik atulersitsisoqarpoq.
December 2025-mi silaannartami naammassinnissinnaaneq annertusarniarlugu, Greenland
Airports Naviairilu Nuup mittarfiani flyvelederit pillugit
isumaqatigiissuteqarput. Pilersaarut malillugu flyvelederit siulliit maj
2026-mi piareersimasussaapput.
