Kialuunniit, ingammik politikkip iluani suliaqartup 2025-mi suna eqqaamanerpaaneraa aperigaanni nunatta nunarsuarmioqatigiinnit ukkatarineqarnerujussua pisoqangaatsiarneralu akissutaanut ilaakkajuppoq. Aamma Aki-Matilda Høegh-Damimut.
- Ukioq 2025 eqqaamassavara ukioq pisoqangaarfiusoq. Ukioq aallartiinnaavittoq nunarput avataaninngaanniit annertuumik sammineqalerpoq. Taamaammat ukioq tassaavoq erseqqissaassutigineqaqqittoq nunarput inoqarfiunngitsutut eqqaamaneqaannartussatut nunarsuarmioqatitsinniit isigineqartussaq. Kisianni nunaq aamma soqutigisaqartoq, inuiaqartoq taavalu akisussaassuseqartoq, Aki-Matilda taama oqarpoq.
Kialuunniit, ingammik politikkip iluani suliaqartup 2025-mi suna eqqaamanerpaaneraa aperigaanni nunatta nunarsuarmioqatigiinnit ukkatarineqarnerujussua pisoqangaatsiarneralu akissutaanut ilaakkajuppoq. Aamma Aki-Matilda Høegh-Damimut.
- Ukioq 2025 eqqaamassavara ukioq pisoqangaarfiusoq. Ukioq aallartiinnaavittoq nunarput avataaninngaanniit annertuumik sammineqalerpoq. Taamaammat ukioq tassaavoq erseqqissaassutigineqaqqittoq nunarput inoqarfiunngitsutut eqqaamaneqaannartussatut nunarsuarmioqatitsinniit isigineqartussaq. Kisianni nunaq aamma soqutigisaqartoq, inuiaqartoq taavalu akisussaassuseqartoq, Aki-Matilda taama oqarpoq.
Inuttaali eqqarsaatigissagaanni sulinerani ukioq manna aamma pisoqarfiuvoq.
- Taakkua saniatigut Inatsisartunut isernera, Inatsisartunngorninnilu aamma pissutsit assigiinngitsut ilikkarlugit. Nunatsinni politikkikkut suleriutsit qaninneroqqilerlugit.
Nunarput malinnaasariaqalerpoq
Nunatta nunarsuarmioqatigiinnit ukkatarineqarnerujussua peqqutaalluni pissutsit allanngorput.
- Unammillernarnerpaat ilaaniissimassaaq nunarsuarmioqatitsinni pissutsit aallaavigalugit, nunarsuarmi sakkulerngusaannerit annertusiartuaarneranni nunarsuarmioqatitta imminnut unammilleraluttuinnarneranni aamma nunarput inissisimagami malinnaasariaqalerluni, akisussaaffimmillu tigusisariaqalerluni. Taamaasilluni unammillernarnerpaat ilaasimapput ataqatigiissaarnissaat taakku, Folketingimi Inatsisartunilu.
- Immaqa siornatigut nunanut allanut politikki eqqartorneqaraangat ungasittutut misinnartartut kalaaleqaterpassuatsinnut, maanna ungasittorujussuunatik eqqaralaannguatsinni malunniutilimmik sunniuteqarlutillu pisarput.
Ukioq manna suliniutigisarni suna naammassinngitsoorpiuk?
- Taanna akiuminaatsilaarpara, pissutigalugu politikkikkut suliniarnermi suliat tamatigut ingerlaannaavittarput, kisianni aamma naammassineq ajuliusattutut ittarlutik.
Taamaakkaluartoq assersuutissaqarpoq.
- Immaqa eqqaaneqarsinnaavoq tamakkiisumik suli naammassisorinngilara suliaq, nunatta oqaluttuarisaanermi pigisaasa angerlaateqqinnissaat. Suliaq taanna ingerlavoq, aningasaliinikuugaluarpugut aamma katersugaasiviit piginnaasaasa annertusarnissaanut, kisianni taakkua angerlaanneqavinngillat. Taamaammat suliaq taanna ingerlasoraara. Politikki taamaattarami.
Suliat iluatsitat aappaagulu suliarerusutat
Suliarni suna iluatsilluarnerpaasoriviuk?
- Sulianni annertuumik nuannaarutigaakka sunniiniaqataanerit nunanut allanut politikkimut taavalu illersornissamut politikkimut annertuumik aamma eqqaaneqarsinnaapput. Kisianni aamma toqqaannaq nunaqqatitta ulluinnarni inuunerannut allanngueqataasinnaasut, assersuutigalugu qulakkeerinnilluta aamma makku meeqqanik arsaarinnittarnerit eqqarsaatigalugit inatsisinngortillugit unioqqutitsinerusoq FKU-mik atuineq, Aki-Matilda oqarpoq nangillunilu.
- Ilaatigut aamma inatsisitigut illersugaanerup nukittorsarneqarnissaanut annertoorujussuarmik suliaq ingerlasimalluni maanna naammassiartuaarpoq.
Aappaagussamut suliniutissarni suna pingaarnerpaava?
-Aappaagussamut suliassat arlallit massakkut ingerlareersut nangeqqinnissaat naatsorsuutigaara. Kisianni taakkua saniatigut akisussaassuseqarnermik aamma takutitseqataanissarput inuiaqatitsinnut aamma nunarsuarmioqatitsinnut annertunerusumik initusariaqarsoraara. Nunarsuarmi pissutsit allanngoriartuaarneranni aamma eqqarsaatigalugu, qulakkeernissaa nunarput eqqartorneqartillugu peqataasarnissarput, Inatsisartunut Folketingimullu ilaasortaq taama oqarpoq.
Taasami saniatigut nunatsinni inuit ulluinnaannut qaninnerusut Inatsisartutigut suliaqarfiginissaanut qilanaarluni Aki-Matilda Høegh-Damip oqaatigaa.
