Aleqa Hammond Siumumi siulittaasutut 2014-imi tunuartoq ukiut aqqanillit qaangiuttullu partiimi siulittaasunngoqqippoq. Partii siuttuuffigeqqiligaa Inatsisartunut marsimi qinersisoqarmat oqaluttuarisaanermi aatsaat taama mikitigilerpoq.
- Ukioq 2025 eqqaamaneqassaaq Siumup Inatsisartunut qinersinermi appariaateqarujussuarnera, taamaattorli aamma eqqaamaneqassalluni kinguninngua kommunimut qinersinermi annersaasoq. Pissutsit nutaarluinnaat aammalu tupaallannaateqartut, Aleqa Hammond oqarpoq.
Aleqa Hammond Siumumi siulittaasutut 2014-imi tunuartoq ukiut aqqanillit qaangiuttullu partiimi siulittaasunngoqqippoq. Partii siuttuuffigeqqiligaa Inatsisartunut marsimi qinersisoqarmat oqaluttuarisaanermi aatsaat taama mikitigilerpoq.
UKIOQ NAAGUJOQ
Partiit siuttuinut tamanut apeqqutit nassiussagut aallaavigalugit allaaserisanik juullip nalaani saqqummiussisassaagut.
Partiit siuttui politikkikkut pisut pillugit kingumut qiviartissavagut, ukiumi unammillernartuutaat tusagaqarfigalugit, aammali siunissamut pilersaarutaat paasisaqarfigilaassallugit.
- Ukioq 2025 eqqaamaneqassaaq Siumup Inatsisartunut qinersinermi appariaateqarujussuarnera, taamaattorli aamma eqqaamaneqassalluni kinguninngua kommunimut qinersinermi annersaasoq. Pissutsit nutaarluinnaat aammalu tupaallannaateqartut, Aleqa Hammond oqarpoq.
Ukiorlu 2025 kingumut qivialaassaguniuk nunatta nunarsuarmioqatigiinni qitiunerujussua eqqaanngitsoorsinnaanngilaa.
- Politikkikkut nunarput kisiat pisoqarfittut inissisimajunnaarluni nunarsuarmioqatigiinnit nunarput annertuseriartorujussuarmik soqutigineqarluni timitalikkamik suleqatiginnikkumassuseq piulerpoq, taamaattorli aamma ernumanartumik tatineqarluni inissisimalernera nunarsuarmi nunanit pissaaneqarnerpaanit qitiutinneqalermat, Aleqa Hammond oqarpoq nangillunilu.
- Naalagaaffeqatigisat nunatsinnut inussiarnernerulerlutillu suleqataajumanerulerneranik kinguneqarpoq.
Angorusutani anguai
Suna unammillernarnerpaanikuua?
- Isumaqarpunga unammillernarnerpaasimasoq tassaasoq nunatta avataaniit ukkatarineqarnerujussuata kingunerisaanik danskit illersornissakkut annertusaanerat, taamaasilluni NATO-p soqutigisaasa issittumi illersuinissamut annerusumik pisussaaffilerneqarnerat, nunatsinni illersornissakkut sillimaniarnikkut nunatta qanoq atorneqarnera pillugu inuiaqatigiinnit toqqississimanartumik atugaqarniarnermi oqallinneq ernumanartumiititisiniarsarinerup kingunerisaanik annilaangatitsineq piummat, taamaattoq isumaqarpunga nunatta naalakkersuinikkut sunniuteqarneratigut danskit tungaanniit iluarisaannarmik pisoqannginnera anguneqarpoq.
Aleqa Hammond politikkimut partiimullu uternermini angusaminik iluarisimaarinnippoq.
- Ukioq manna isumaqarpunga suliniutigisannik angorusutakka angullugit, politikkikkut eqqarsaraanni. Nunatsinnit politikkikkut sunniuteqarsinnaanermi nunarput ukkatarineqarnerani akisussaaqataajumallunga Siumup siulittaasussaattut sassarama tamanna anguara.
- Sulianni iluatsilluarnerpaatut taajumasara ukioq manna siulittaasunngorninniit tassaavoq siulersuisuuninngortut pitsaasumik qanimullu suleqatiginissaat tunngavileeqataaffigigakku, suleqatigiinneq nuannersoq anguniagaqarfiusoq tunngavilerneqarmat. Inuusuttunik suleqateqarnerup nukittorsarnera aallartilluarpoq, immikkoortortaqarfiit attavigiortorneqarneri aammalu qinersisoqassagaluarnerani piareersareernerit aallartisareerneqarneri suliani iluatsittumik aallartippoq, Aleqa Hammond taama oqarpoq.
2026-mi suliniutigerusutai
Aappaagussamut suliniutissarni suna pingaarnerpaava?
- Aappaagussamik innuttaasut pingaarnerpaatillugit sulinerput nangissallugu suleriaqqissuugut. Nunaqqaterpassuaqarpugut pitsaasumik nukittuumillu ingerlalluartunik, ilinniartorpassuit, allagartartaartorpassuit, aalisartortavut aalisarluartut, namminersortut amerliartortut aammalu piumassuseq angisoorsuaq nukigalugu inuiaqatigiinni kivitsisunik, Aleqa Hammond oqarpoq nangillunilu.
- Taamaattoq aamma nunaqqateqarpugut immikkut isiginiarneqartariaqartut, ilaqutariit meerartallit, angajoqqaat kisimiittut aammalu utoqqartavut sanngiinnerusortavullu immikkut naalakkersuisoqarnikkut pitsaasumik tunuliaqutserneqarlutik sullinneqartariaqartut. Nunarput sullinneqassaaq, politikkertassaagut uummaterput anersaarpullu puigornagu.
