Allat qularuteqanngitsut Malu naggataa tikillugu qularpoq: - Nalunarpallaalaarami

Malu Kajangmat Nuummi GUX-imi inimut ilinniartitsivimmut 2.T-mut iserpoq.

ATUARUK AAMMA

Fina aamma Malu siullermeerlutik qinersissapput: - Qinersineq manna pingaarnerpaavoq

Ullap tungeraa qanittukkullu ilinniaqatini tamaasa ilagalugit Illorsuaq Timersortarfimmut Folketingimut qinersiartussaaq. Arlalissuit qinerserngaartussaapput.

– Inersimasuusutut misinnarpoq, ilaa? 18-inik ukiulik Liv Cortzen oqarpoq illariarlunilu.

Malu Kajangmat nerriviup sanianut ingippoq. Nerrivimmi tassani issiapputtaaq ikinngutai Fina Winberg aamma Maria De Renouard.

– Siorna kina qinissanerlugu ilisimanngivippara. Taamanikkut angajoqqaakka qanoq iliortarnersut pineqarneruvoq, Maria De Renouard oqarpoq.

19-inik ukioqarpoq siornalu Inatsisartunut kommunalbestyrelsemullu qinersisinnaavoq.

– Ukioq manna ilisimasaqarnerulaarpunga, oqarpoq.

Malu Kajangmat siullermik qinersisussat ilagaat. Pissanganartippaa aammali kipiluttunartilaarlugu.

– Suli naluara kina qinissanerlugu, oqarpoq.

Immaqa aatsaat inimi qinersivimmi taaasiffissap iluaniileruni aalajangissaaq. Imaassinnaavoq taasaqanngitsunga, oqarpoq.

– Qinersineq taama pingaartigimmat ajornakusuulaarpoq, Malu Kajangmat oqarpoq.

Ikinngutini isumaqataallutik anngaasut qiviarpai. Ingammik Donald Trumpimut pisut peqqutigalugit manna qinersinissaq pingaarnerusutut misinnarpoq, isumaqarput.

Nalunaaqutaq qulinngulerpoq.

– Qaa, anivugut! Ilinniartitsisuat oqarpoq.

– Let’s gooo, anilerlutik ilinniartut ilaat oqarpoq.

Nipittorani isumaqatigiinniarsinnaasoq

Malu Kajangmat kamippaasa moon bootsit ataani aput qeraarpaluppoq. Ikinngutaa Fina Winberg saniani pisuppoq kajortumik takisuumik qaatigooqarluni.

– Pissanganaq. Pissangaqaanga, Fina Winberg oqarpoq.

Qinersivissaq Nuummi Illorsuaq Timersortarfik ammaqqammerpoq ikinngutigiit marluk klasseqataallu takkummata.

Biilit taxallu kigaaqalutik Kissarneqqortuunnguakkorput, tassaniillutik partiit assigiinngitsut containerimik saani takutitsisut. Folketingimut qinequsaartut partiimilu ilaasortat allat inunnik ilassiorput.

Ukioq manna Folketingimut qinersinermi qineqqusaartut aatsaat taama amerlatigaat. Ukioq manna 27-ersuullutik, 2022-mmi 15-iinnaallutik.

– Eqqumiilaarpoq, Fina Winberg oqarpoq.

– Aap, amerlaqaat, Malu Kajangmat inuppassuit, biilit, erfalasut erfalasuararpassuillu qimerloorlugit oqarpoq.

Qinigassat taama amerlatiginerat Malu Kajangmammut ajornannginnerulersitsinngilaq.

– Misigisimavunga tamaasa tusarnaarsimanagit. Qineqqusaarnermi marlussuinnaat tusaasimavakka, oqarpoq.

Containerit ilaanni Demokraatit qinersisartunut kalaallit kaagillerput. Justus Hansen sukkuaqqanik qillertuusamiittunik Malu Kajangmammut Fina Winbergimullu isaassivoq.

– Marlunniit amerlanerunngitsunik! Inatsisartuni politikeri suaarpoq illarlunilu.

– Asuliuna, tigusiinnaritsi.

Malu Kajangmat Fina Winbergilu ingerlaqqipput, meterialuinnarnilli ingerlareerlutik Siumumiit Ineqi Kielsenimit unitsinneqarput, vingummiaqqanik sungaartunik bamsinik poortanik tunisillutik.

Ippassaammalli Fina Winberg aalajangersimavoq kina qinerniarlugu. Tassaavoq Demokraatiniit Anna Wangenheim.

– Isumaqarpunga piviusorsiortuusoq nipittunngikkaluarlunilu isumaqatigiinniarsinnaasoq. Isumaqarpunga tamanna atorfissaqartikkipput, oqarpoq.

– Aamma peqqissaasutit ilinniarsimavoq Nunatsinnilu peqqinnissaqarfiup pitsaanngorsarnissaa sulissutigalugu, isumaqarpunga tamanna pingaartuusoq.

Fina Winberg Malu Kajangmammut qiviarpoq.

– Uanga suli naluara, oqarpoq.

Isumalluarnartoq

Timersortarfimmi Fina Winberg Malu Kajangmallu avissaarput.

Fina Winberg tunuleriiaanut qaammatip aallartinnerani inuuissiortartunut inissippoq. Malu Kajangmat ungasinnerusunut inissippoq. Tunuleriiaaqatai amerlanerupput.

Fina Winberg tullinnguutipallapoq. Nerrivimmut qaqortumut pivoq tassani taasiffissaminik tunineqarluni, partiip qineqqusaartulluunniit taaniakkami atianik allaffissaminik.

Qinersivissap iluanukarpoq, saagorlugulu qanorlu ilerianngitsoq illuatungaatigut anivoq. Taasiffia karsimut nakkartinneqarpoq.

– Ajornanngingaarami, Fina Winberg oqarpoq qungujullunilu.

– Iserama anivunga. Tunuleriiaani ikittuniikkama. Malu sivisunerulaartumik utaqqissasoraara.

Fina Winbergip pissanngatigaa tusassallugu ikinngutini qanoq ingerlasimanersoq. Utaqqiniarlugu klasseqatini taasereersimasut ornippai. Ilagaat Maria De Renouard.

– Ajunngilaq. Ajornanngeqaaq. Isersimaninnili ataatannut sianerpunga kina qinissanerlugu aperalugu, illarluni oqarpoq.

– Klassemi kisiartaallunga 18-it inorlugit ukioqarpunga, Maalia Skifte anersaarululluni oqarpoq.

– Naalakkersuinikkut akuusupilussuugaluarpunga, taamaammat qinngarnaqaaq. Qinerseqqinnissamut ukiut pingasut ingerlagallassapput.

Minutsialuit qaangiummata kiisami Malu Kajangmat tullinnguuppoq. Qinersivissaq tigullugu taasiffissamut iserpoq.

Minutsit marluk missaanni qaangiummata aneqqippoq. Taasinerit karsianut taasiffini nakkartippa ilanilu ornillugit.

– Alee, ilassivoq.

– Taasivit? Fina Winberg aperaaq.

Malu Kajangmat niaqquminik anngaavoq. Naaja Nathanielsen qinersimavaa, toqqissisimanarporlu, isumaqarpoq.

Oqiliallassimarpasippoq.

– Taava inuunitta sinnera ukiut sisamakkaarlugit taamaaliortassaagut, Fina Winberg oqarpoq.

Ikinngutigiit illarput timersortarfimmiillu ingiaqatigiillutik anillutik.