Allorfiup immikkut ittumik ammanerani innuttaasunik takkuttoqanngitsoq 

Qaqortumi Allorfik sapaammi immikkut ittumik ammatinneqarpoq, tamanna pivoq Kommune Kujallermi imigassanik aalakoornartortalinnik tuniniaaneq sassaallernerlu matugallarneqareersorlu. Immikkut ittumik ammatitsisoqaraluartoq innuttaasunik saaffiginnittoqarsimanngilaq.

- Innuttaasunik takkuttoqanngilaq. Allorfik Kujalleq Qaqortumi assingusumik aaqqissuusseqqammerpoq, tassanilu takkuttut 150-t missaanniipput, Peqqinnissaqarfiup Pisortaqarfianiit Sermitsiamut allakkatigut taama akissuteqarput.

Taakkua paasissutissiinerat naapertorlugu innuttaasunik katsorsaavimmut siuliatigut saaffiginnissimanngitsunik imigassamik matusigallarnerup kingorna saaffiginnittoqarsimanngilaq.

Katsorsaaviup piffissami kingullermi saqqumilaarnikuunera sapaatiummat saaffiginnittoqannginneranut peqqutaaqataasinnaasoq Allorfiup nalilerpaa. Katsorsaavimmi Majoriami, Højskolemi Campus Kujallermilu eqimattakkaartunik ilinniartitseqqammivoq.

Innutaasoq ataaseq inerteqquteqarallartoqarnerani tapersiisoq

Allorfik qanigisaasunik, inuusuttunik allanillu ikiorneqarnissamik pisariaqartitsisunik inerteqquteqarallarneq aallartimmalli aamma naammattuuisimanngilaq.

Innutaasulli ataatsip, katsorsartileruttortup, imigassanik tuniniaanerup unitsinneqarallarnera iminnginnissaminut iluaqutiginerarsimavaa.

- Innuttaasoq ataaseq katsorsartittoq inerteqquteqalerneq iminnginnissaminut iluaqutigalugu nalunaarpoq, Peqqinnissaqarfimmi Pisortaqarfik allappoq.

Allorfik katsorsaanissamut piareersimavoq

Imigassat matoqqatinneqarallalermatali saaffinnittoqarsimanngikkaluartoq ikiorneqarnissamut pisariaqartitsisunut Allorfik assigiinngitsunik neqerooruteqarpoq.

- Innuttaasunik ikinnerpaamik arfineq-pingasut katsorsartikkusullutik saaffiginnissagaluarpata, Kujataani illoqarfinnut nunaqarfinnullu eqimattakkaartunik katsorsaajartortitsisinnaavugut. Katsorsaanerit sapaatit-akunneri sisamat arfinillillu akornanni sivisussuseqarput. 

- Taakkua saniatigut internet aqqutigalugu oqaloqateqartoqarsinnaavoq, najugarisamilu katsorsartittoqarsinnaanngippat Nuummut sapaatit-akunnerini sisamani arfinilinniluunniit katsorsartikkiartortoqarsinnaalluni, Peqqinnissaqarfiup Pisortaqarfia allappoq.

Innuttaasut atornerluisuunertik pillugu ikiorneqarnissamik pisariaqartitsisut Sullissivik.gl aqqutigalugu imaluunniit sulllissisorisartik nunaqarfimmiluunniit kommunip allaffiani immersuinermikkut aamma katsorsarneqarnissaminnut qinnuteqarsinnaapput.

Allorfik Kujalleq 34 14 51-imut sianerluni attavigineqarsinnaavoq.