Ane Lone Bagger Folketingimut ilaasortanngorusuppoq
Ilinniartitaanermut naalakkersuisuusimasoq Iluliarmiu Ane Lone Bagger Siumut sinnerlugu Folketingimut qinigassanngortippoq.
Ane Lone Bagger politikkimut uteqqinniarluni Folketingimut qinigassanngortippoq. (Toqqorsivimmit).
Assi: Leiff Josefsen
59-inik ukiulik Ane Lone Bagger Qaasuitsup Kommuniani kommunalbestyrelsimut ilaasortaasimasoq, kingullermillu 2018-imiit Ilinniartitaanermut Naalakkersuisuusoq, politikkimut uteqqikkusuppoq.
Siumut sinnerlugu Folketingimut qinigassanngortinniarnini maanna nalunaarutigaa.
Silap pissusiata allanngoriartornera pingaarnertut sulissutiginiagaanut ilaavoq:
- Silap pissusaata allanngoriartornerata malitsigisaanik issittulerngusaanneq ukiuni kingullerni annertoorujussuuvoq. Allaallu oqarsinnaalluta nunarsuatta pissaanilissuit qiterpiaani nunarput inissisimalersimasoq, nipimik ersarissumik folketinngimi nunarput pisariaqartitsivoq. Allaat nunap iligisatut suleqatitsinnik tatisiniarneq imaannaanngitsoq ingerlanneqarluni, tamatta toqqissimanngissutigisatsinnik, nalunaarummi allassimavoq.
Namminiilivinnissaq aamma sulissutigigaa
Ane Lone Bagger naalakkersuisuunermini Issittumi tunngaviusumik ilinniarfiup maanna atuuttup eqqortumik sinaakkuserneqarnissaa sulissutiginikuuaa. Ilinniartitaaneq Kalaallit Nunaata namminiilivinnissaanut aqqutissaasoq taamani pingaartitaraa, issittumullu periusissiaq sulissutiginikuullugu, allassimavoq.
Ane Lone Bagger politikkimik tunuarnermi kingorna inuiaqatigiinni assigiinngitsutigut suliaqarpoq. Ilaatigut 2020-miit 2022-mut Advisory Board I Arctic Initiative ilaasortaavoq Visit Greenlandimilu siulersuisunut ilaasortaalluni.
