Angallassisinnaanermut allagartartaartut nutaat sisamat

Avgo Barselajsen, Åge Danielsen, Martin Madsen aamma Gaba Abelsen Ittoqqortoormiini najugallit angallassisinnaanermut pikkorissartinneqarput, taamaalillutik aqqaneq-marlunnik ilaasoqarlutik angallassisinnaatitaalerlutik. Kommuneqarfik Sermersooq tusagassiuutitigut nalunaarummi allappoq.

- Illoqarfimmi innuttaasut isumannaatsumik pitsaasumillu takornariaqarnermik ingerlatsinissaannut pisariaqartitaminnik piginnaaneqalernerat tulluusimaarutigaarput. Tamanna inuussutissarsiornermik aamma sumiiffimmi inuiaqatigiinnut nukittorsaataassaaq, Visit East Greenlandimi takornariaqarnermi ataqatigiissaarisoq Anna Burdenski oqarpoq.

Ilinniarneq illoqarfimmi takornariaqarnerup siuarsarnissaanut pingaaruteqarpoq aamma inuussutissarsiornermi aallarnissaanermilu nutaanik periarfissaqalersitsilluni.

Pikkorissaaneq Imarsiornermik Ilinniarfimmi Nuummiittumi ingerlanneqarpoq.