Angerlarsimaffeqanngitsut pillugit ilisimatusartut: Tasiilami iliuuseqartoqarnera qujanarpoq, kisianni...

Hak, hak, hak.

Ilimmarfiup iggavianut pingasunngornermi ualingaatsiartoq iseratta agguerpalussuaq kisimi nipisiassaavoq.

Kukkukuut igamut ikereermata kuuloruujut, porrit naatsiiallu aggorlugit ulapittut tassaapput angerlarsimaffeqanngitsuuneq pillugu ilisimatusartut Steven Arnfjord Kevin Perrylu. 

Taakku Nuummi angerlarsimaffeqanngitsunut suppiliorlutik ulappuseruttorput. Frelsens Hærip iggavia iluarsartuunneqaleruttormat Ilimmarfiup iggavia ulloq taanna ulapiffigaat.

Iserlugit nuannisarpaseqaat, ilisimatusartulli taakkua marluk sooq suppiliornerlutik aperineqaramik ilumoorsaaleriasaarput.

- Ilisimatusarfigisatsinni paasisaqarneruniarutta atuarlutalu kisitsisinik misissuiinnaraluarutta ilisimasaqarnerulernavianngilagut. Inuit pineqartut naapittariaqarpagut. Piviusoq takusariaqarparput nerisitsilluta oqaluttuaallu tusarnaarlugit, Steven taama oqarlunilu suppiliaminik taratsiisimanani qaatulerpoq taratsunillu ujaasipallalluni.

AAMMA ATUARUK

Tasiilami containerit inissiat pilerngunneqartut

Ilisimatusartut taakkua marluk suliaminnut ukkasseqisut ingerlaannartumik malugineqarsinnaavoq. Tasiilami angerlarsimaffeqanngitsunut containerinik inissianik atulersitsineq pillugu eqqartuileratta nersualaarinnipput.

- Kommuneqarfik Sermersooq tassuuna nersorneqartariaqarpoq. Suliassaq imaannaanngitsoq kommunitut akisussaassuseqarlutik kivinniarlugu iliuuseqarput, Stven Arnfjord oqarpoq kuuloruujullu aggorlugit aallarteqqilluni.

Iliuuserineqartulli naammaqqajanngillat.

- Iliuuseqarnerat imarsuarmi kuserneeqqamut assersuunneqarsinnaavoq. Malunnaateqalaassaaq, kisianni pisariaqartitsineq annertoorujussuummat naammanngilaq, Steven oqarpoq.

Ersinngitsumik angerlarsimaffeqanngitsuuneq

Tasiilami innuttaasut 1.800-t missaanniipput. Illoqarfimmi angerlarsimaffeqanngitsut 64-usut angerlarsimaffeqanngitsut kingullermik kisinneqarmata 2022-mi paasineqarpoq. Kisitsineq taanna Stevenip Kevinillu peqataaffiginikuuaat.

Inunnik nalunaarsuiffimmi kisitsisit 2025-meersut takugaanni aalajangersimasumik adresseqanngitsut Tasiilami 56-upput. Imaanngilarli angerlarsimaffeqanngitsut taama amerlatigilersimasut.

- Aalajangersimasumik adresseqanngitsut angerlarsimaffeqanngitsut amerlassusaannut assersuunneqarsinnaanngillat. Imaassinnaasoq adresseqaraluarluni allami qimarngusoqartoq. Soorlu assersuutigalugu arnaq angerlarsimaffigisimasamini adresseqaraluarluni, persuttaasoqartarnera peqqutigalugu angerlarsimaffimminiit qimarngusimasinnaavoq, Steven oqarpoq.

Ilisimatusartut oqartarnerat malillugu aamma ersinngitsumik angerlarsimaffeqanngitsoqarpoq. Tasiilaq assersuutigigaanni imaanngilaq aqqusiniinnarmi sinittoqartartoq, ilaquttanili ikinngutiniluunniit tattoqisaatereersuni inisimanngikkaanni sinnumasoqartarluni.

- Issittumi angerlarsimaffeqanngitsuuneq Los Angelesimut, Københavnimut Londonimullu sanilliullugu allarluinnaavoq. Kialaarnerummat naatsiiviliarsuarni assigisaanilu unnuisoqarsinnaasarpoq, sumiiffinnimi pineqartuni ukiumut qaammatialuinnaat issittarpoq, Steven oqarpoq.

Kommunip Sermitsiamut paasissutissiinera malillugu containerinut inissianut utaqqisut 30-t missaaniilereersimapput.

Aaqqiigallarnerit

Containerit arfineq-pingasut najugaqalernissamut sungiusarfittut atorneqartut qanittukkut qulinngussapput. Taakkunani ukiut marluk tungaanut najugaqartoqarsinnaavoq.

Containerilli angerlarsimaffeqanngitsunullu unnuisarfiit piffissaq ungasinnerusoq eqqarsaatigalugu aaqqiissutissatsialaanngitsut ilisimatusartut oqaatigaat.

- Unnuisarfinni piffissami sivikitsumi eqqissigallartoqarsinnaavoq, taassumali kingorna pissutsit ajorsiartulertarput, Steven taama oqarmat Kevin ilaliivoq.

- Unnuisarfiit ajornartorsiutinut ilaaginnarput, Kevin taama oqarpoq.

Inuit angerlarsimaffeerussimasut utaqqiisaasumik najugassittarnerat naammanngilaq. Tapersersorneqarnissaminnik ataavartumillu najugassaminnik pisariaqartitsisarput.

- Soorlu Kevin oqartoq, containerit unnuisarfiillu siullertut aaqqiissutissaapput, kingorna ikiorneqarnissaq pisariaqarpoq inissamillu neqeroorfigineqartariaqarluni Steven oqarpoq.

Periuseq housing firstimik taaneqartarpoq, tassa angerlarsimaffittaarnissaq siullertut iliuuserineqartariaqarpoq.

- Aaqqiissutissaq tassaavoq ataavartumik angerlarsimaffissaq, Steven oqarpoq.

Nuuliartartorpassuupput

Nuummi angerlarsimaffeqanngitsunut inuuniarnikkullu ajornartorsiuteqartunut neqeroorutit arlaqarput, soorlu angerlarsimaffeqanngitsunut unnuisarfeqarpoq Kofoedsskoleqarlunilu. Taamaammat Tasiilamiit Nuummukartartut arlaqarput.

- Nuummi unnuisarfinniittartut 18 procentii Tasiilamiinngikkunik Tasiilap eqqaaneersuusut misissuinitsinni paasinikuuarput, Steven taama oqarpoq, taakkulu katillugit 30-t missaaniinnerarlugit.

- Nuummii assigiinngitsunik neqerooruteqartoqarnera peqqutaaqataalluinnarpoq, Steven oqarpoq.

Nuummulli nuunneq aamma illuatungeqartarpoq.

- Nuuliarneq ajortumik aamma kinguneqartarpoq. Pimmatigisaaneq assigiinngisinneqarnerlu Kitaanut pigaangamik misigikkajuppaat, Steven oqarpoq.

Kevin isumaqataavoq, ilisimatusarnerminullu atatillugu Danmarkimiinnermini paasisani eqqaavai.

- Morgencafémik atilik pulaarakku, paasitinneqarpunga kitaamiut tunumiullu akunnerminni aaqqiagiinngissuteqakkajuttut. Taakkumi akornanni aaqqiagiinngittoqartillugu eqqissisaakkajuttarsimapput, Kevin oqarpoq.

Akisussaaffik tamaniippoq

Ilisimatusartut taakkua oqaatigerusutaat ersarippoq: Angerlarsimaffeqanngitsuunerup ajornartorsiutaanera kommunip kisimi kivitassarinngilaa.

- Inatsisartut inatsisiliortuummata kommunit naalakkersuisullu suleqatigiittariaqarput, Kevin oqarpoq.

Inatsisitigummi sinaakkutit eqqortuunngippata suliassaq kommunit kisimik kivikkuminaatsittarpaat.

- Angerlarsimaffeqanngitsunut unnuisarfiit containerillu utaqqiisaasumik aaqqiissutissatut isigineqartariaqarput, Kevin oqarpoq.

Najukkammi allat sinnattuaqissutigisarpaat.

- Najugaqariaatsit allaanerusut sanaartorneqartariaqarput, Kevin tuluttut sumiorpaluutini ersarissoq nipigalugu taama oqarpoq.

- Tassa taanna uagut aaqqiissutissatsialattut takorloortagarput, Steven taama oqarpoq igaanilu isumagiartoqqillugit.

Igaatimmi qalalermata Frelsens Hærimukarlutik suppinik sassaalliiaartussamaalerput. Kukkukuumillu suppiliaat tipigissivimmata qularnanngilaq mamarsaattoqarumaassasoq.