Angut arnamut nakuusersimasutut tigusarineqarlunilu unnerluutigineqartoq

Angut 20-t sinnerlugit ukiulik eqqartuussivimmi ataasinngornermi sassartinneratigut sapaatip-akunnerini sisamani tigummigallagassanngortinneqarpoq.

Angut nakuusersimasutut unnerluutigineqarpoq, pisoq politiinut sapaatiummat nalunaarutigineqarpoq. Pigaartut pisortaat Aqqalu Petersen paasissutissiivoq.

Ulloqeqqata siorna nalunaaqutaq 10.55 pisoq nalunaarutigineqarpoq, tassa angut arnamut Nuup illoqarfiata ilaani Nuussuarmi nakuusersimasutut pasineqarpoq. Arnaq 30-t sinnerlugit ukioqarpoq.

Angut arlaleriarluni nakuusertarsimanera pissutigalugu eqqartuussivimmut sassartinneqarsimasoq, maannalu paasiniaanerup nalaani sapaatip-akunnerini sisamani tigummigallarneqartoq, pigaartut pisortaata oqaatigaa.

Pinerlineqartoq pinerluttorlu imminnut nalunngisariittut aamma oqaatigaa.

Biilit tillitat ajutoortut

Biilinik tillittoqarsimasoq nalunaaqutaq 18.09 aamma nalunaarutigineqarsimasoq, Aqqalu Petersenip aamma paasissutissiissutigaa.

Tillinniarnerinnaanngilaq, biilimmi tillitat Nuup ilaani Nuussuarmi ajutoorsimapput.

Biilinik aquttoq, angut 20-t sinnerlugit ukiulik, tigusarineqarluni tillinniarsimasutut, imigassartorsimalluni biilersimasutut aamma biilersinnaanermut allagartaqarani biilersimasutut unnerluutigineqartoq, Aqqalu Petersen oqarpoq.

Angut tigusarineqarpoq kingusinnerusukkullu iperagaalluni.

Sulisoq toqunniarlugu sioorasaarneqartoq

Politiit Nuummi Brugseneeqqamut Kongevejimiittumut ataasinngornermi unnukkut nal. 23.49 aamma ornigupput. Tassani sulisoq pisiniamit aalakoortumit toqunniarlugu sioorasaarneqarsimavoq.

Angut pisumi unnerluutigineqarpoq.

Ilulissani sunngiffimmi ornittakkap igalaava aserorneqarsimasoq politiit marlunngornermi ullaakkut nalunaaqutaq 05.09 aamma nalunaarfigineqarput.